သိုၵ်းဢူၺ်းလီ 3 ၸုမ်း ပိုတ်ႇၼႃႈသိုၵ်း လေႃႇတိုၵ်းသိုၵ်းမၢၼ်ႈမႃး ၶၢဝ်းတၢင်း တဵမ်လိူၼ်ၼႆႉ ၵူၼ်းၸိူဝ်းမႃး ႁဵတ်းၵၢၼ်ၼႂ်းဝဵင်းလၢဝ်ႇၵၢႆး ဢၼ်ၶမ်ၵႄႈပၢင်တိုၵ်းၸိူဝ်းၼၼ်ႉ ယၢမ်းလဵဝ်သဵၼ်ႈတၢင်းပိုတ်ႇဝႆႉလႄႈ ၼႅတ်ႈ ဢွၼ်ၵၼ် ပွၵ်ႈၶိုၼ်း တၢင်းသဵၼ်ႈတၢင်းလႃႈသဵဝ်ႈ-ၼမ်ႉလၼ်ႈ၊ ပီႈၼွင်ႉၼမ်ႉလၼ်ႈ ႁၢင်ႈႁႅၼ်းၸွႆႈထႅမ် ၶဝ်ႈၼမ်ႉတၢင်းၵိၼ် ။
ၵူၼ်းၼႂ်းပိုၼ်ႉတီႈၼမ်ႉလၼ်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၸိူဝ်းယူႇ မိူင်းမၢၼ်ႈတူင်ႈပဵင်း လႄႈ လၢႆလၢႆ ၸႄႈဝဵင်း ၼႂ်းမိူင်းတႆး ဢၼ်မႃးၶမ်ယူႇဝႆႉ ၼႂ်းပၢင်တိုၵ်း ၼႃႈလိၼ်ၵဝ်ႈၵၢင်ႉၵုမ်းၵမ်ၼၼ်ႉ မိူဝ်ႈလဵဝ်ပၢင်တိုၵ်းယဵၼ်ဝႆႉလႄႈ သဵၼ်ႈတၢင်းၶိုၼ်းပိုတ်ႇၶိုၼ်း။ ၵူၼ်းမိူင်းၸိူဝ်း ၶမ်ယူႇဝႆႉ ၼႂ်းၵႄႈပၢင်တိုၵ်းၸိူဝ်းၼႆႉၵေႃႈ ဢွၼ်ၵၼ်ၼႅတ်ႈပွၵ်ႈႁိူၼ်းၽႂ်မၼ်း ” – ဝႃႈၼႆ။
ၵူၼ်းပၢႆႈၽေးၸိူဝ်းၶမ်ဝႆႉၼႂ်းၼႃႈလိၼ်ၵဝ်ႈၵၢင်ႉၵုမ်းၵမ်ၼႆႉ ၵမ်ႈၼမ်ငိုၼ်းတွင်းဢမ်ႇမီးလႄႈ ယၢပ်ႇၽိုတ်ႇတႃႇၵိၼ်ယမ်ႉ။ယူႇတီႈ ၵူၼ်းမိူင်းၼမ်ႉလၼ်ႈသေ ဢွၼ်ၵၼ်ႁၢင်ႈႁႅၼ်းၵမ်ႉၸွႆႈပၼ် ၶဝ်ႈၼမ်ႉတၢင်းၵိၼ်ပွတ်းတၢင်း ၼႆယဝ်ႉ။
ၵူၼ်းၼႂ်းပိုၼ်ႉတီႈၼမ်ႉလၼ်ႈလၢတ်ႈတီႈၽူႈတွႆႇႁွၵ်ႈဝႃႈ – “ တႄႇဢဝ်ဝၼ်းတီႈ 10 လိူၼ်ၼူဝ်ႊဝႅမ်ႊပိူဝ်ႊၼၼ်ႉမႃး ၵူၼ်းၸိူဝ်း ႁႃလွၵ်းလၢႆး ဢွၵ်ႇလၢဝ်ႇၵၢႆး တႃႇလွတ်ႈၽေးၼပ်ႉႁူဝ်ပၢၵ်ႇ ။ မၢင်ဝၼ်းၵေႃႈ သီႇႁႃႈပၢၵ်ႇ။ မၢင်ဝၼ်းထိုင်ႁဵင် ၶႃႈဢေႃႈ။ ပဵၼ်ၵူၼ်းလၢႆတီႈလၢႆတၢင်းၶႃႈဢေႃႈ။ၵူၼ်းၸိူဝ်းယူႇ ၶူဝ်လမ် ၊ ၵႃလီႉ ၊ ၵုၼ်ႁဵင် ၊ၼမ်ႉၸၢင် ၊ လၢင်းၶိူဝ်း ၸိူဝ်းၼႆႉဢေႃႈ။ ႁၼ်ပဵၼ်ၸၢဝ်းမၢၼ်ႈၵမ်ႈၼမ်ၶႃႈယဝ်ႉဝႃႈၼႆ။ ၵူၼ်းပၢႆႈၵမ်ႈၽွင်ႈၵေႃႈ ဢွၵ်ႇမႃးၸွမ်း ၵႃး 12 လေႃႉ၊ ၵမ်ႈၽွင်ႈၵေႃႈ ၵႃး 16 လေႃႉၸိူဝ်းၼႆႉ။ လိူဝ်ၼၼ်ႉၵူၼ်းၶီႇ ရူတ်ႉၶိူင်ႈသေ ဢွၵ်ႇမႃးၵေႃႈမီး။ မၢင်ၵေႃႉ ငိုၼ်းၵေႃႈ သဵင်ႈပွတ်းတၢင်းယဝ်ႉလႄႈ ယၢပ်ႇတႃႇၵိၼ်ယမ်ႉ။ ယွၼ်ႉၼၼ် ၵူၼ်းမိူင်းၼမ်ႉလၼ်ႈဢုပ်ႇၵၼ်သေ ၸင်ႇႁၢင်ႈႁႅၼ်း ၸွႆႈထႅမ်ၶဝ်ႈၼမ်ႉတၢင်းၵိၼ် ” – ဝႃႈၼႆ။
ၵူၼ်းပၢႆႈၽေးလၢဝ်ႇၵၢႆး ၸိူဝ်းလႆႈၽူင်ႉပၢႆႈ ၽွင်းပၢင်တိုၵ်းၼႆႉ ပေႃးႁွတ်ႈထိုင်ၼမ်ႉလၼ်ႈၸိုင် ငိုၼ်းဢမ်ႇပေႃး ၸႂ်ႉ ပေႃးၸၢႆႇလႄႈ လႆႈလတ်းႁႃ ႁၢၼ်ႉတၢင်းၵိၼ်ဢၼ်ၵႃႈၶၼ်ထုၵ်ႇ ။ ၸဝ်ႈႁၢၼ်ႉၸဝ်ႉသႅင်ႇ ၵူၼ်းမိူင်းၼမ်ႉလၼ်ႈ ႁၼ်ၸိူင်ႉၼၼ်သေ ၸင်ႇဢွၼ်ၵၼ် တႄႇႁၢင်ႈႁႅၼ်း လဵင်ႉလူၵူၼ်းပၢႆႈၽေး ၸိူဝ်းပွၵ်ႈႁိူၼ်းၸိူဝ်းၼၼ်ႉမႃး မိူဝ်ႈဝၼ်းတီႈ 26/11/2023 ၵူၼ်းၼမ်ႉလၼ်ႈလၢတ်ႈၼႄၼင်ႇၼႆ။
ၵူၼ်းၼႂ်းပိုၼ်ႉတီႈၼမ်ႉလၼ်ႈလၢတ်ႈတီႈၽူႈတွႆႇႁွၵ်ႈဝႃႈ – “ တေႃႇထိုင်ဝၼ်းတီႈ 29 ၼႆႉ ၶဝ်ႈသၢၼ်ႈသဵင်ႈ 70 ထူင်ယဝ်ႉ။ တီႈၸႅၵ်ႇၶဝ်ႈၼမ်ႉတၢင်းၵိၼ်ႁဝ်းၶႃႈ လႆႈၸႅၵ်ႇဝႆႉ 3-4 တီႈၶႃႈဢေႃႈ။ၵူၼ်းပၢႆႈၽေးၵမ်ႈၽွင်ႈ ႁွတ်ႈမႃး ပေႃးၶမ်ႈ ယဝ်ႉလႄႈ ႁႂ်ႈၶဝ်ၵႂႃႇၼွၼ်းတီႈဝတ်ႉမႁႃႇမျၢတ်ႉမုၼိၸိူဝ်းၼၼ်ႉဢေႃႈ ” – ဝႃႈၼႆ။
ၵူၼ်းၸိူဝ်း မႃးႁဵတ်းၵၢၼ်တီႈလၢဝ်ႇၵၢႆးသေ ၶမ်ႈယူႇၼႂ်းၵႄႈပၢင်တိုၵ်းၼႆႉ ၵူၼ်းမိူင်းမၢၼ်ႈတူင်ႈပဵင်းၵေႃႈ မီးၼမ် ၼႂ်းၼၼ်ႉ ၸိူဝ်းတေလႆႈပွၵ်ႈၶိုၼ်းထိုင်ၼေႇပျီႇတေႃႇၵေႃႈမီး။မၢင်ၸိူဝ်း ႁေႃႈရူတ်ႉၶိူင်ႈပွၵ်ႈၶိုၼ်းႁင်းၵွႆးသေတႃႉ ယွၼ်ႉဢမ်ႇႁူႉတၢင်းလီလီလႄႈ လႆႈၶမ်ယူႇၸွမ်းပွတ်းတၢင်း ပဵၼ် 3-4 ဝၼ်း။မၢင်ၸိူဝ်းၵေႃႈ မီးလုၵ်ႈဢွၼ်ႇလဵၵ်ႉ ၶႅၼ်းယၢပ်ႇၽိုတ်ႇၽွင်ႈဢွၵ်ႇၶၢဝ်းတၢင်း။
