Sunday, May 26, 2024

ၵူၼ်းမိူင်းတူၼ် ငိၼ်းၶၢဝ်ႇလိုဝ်းဝႃႈတေမီးမၢႆမီႈႁၢမ်ႈဢွၵ်ႇႁိူၼ်းယၢမ်းၵၢင်ၶိုၼ်း ဢွၼ်ၵၼ်မႆႈၸႂ်

Must read

ၶၢဝ်းတၢင်း ၸုမ်းဢူၺ်းလီပွတ်းႁွင်ႇလေႃႇတိုၵ်းသိုၵ်းမၢၼ်ႈမႃးၶိူဝ်းယႂ်းၼႆႉ လၢႆၸႄႈဝဵင်းၺႃး သိုၵ်းမၢၼ်ႈႁၢမ်ႈ ဢွၵ်ႇၼွၵ်ႈႁိူၼ်းယေး ထိုင်မႃးႁၢင်လိူၼ်ၼူဝ်ႊဝႅမ်ႊပိူဝ်ႊ ၼႆႉ မီးၶၢဝ်ႇလိုဝ်းဢွၵ်ႇမႃးဝႃႈ သိုၵ်းမၢၼ်ႈ တေႁၢမ်ႈၵူၼ်းၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ  ဢွၵ်ႇၼွၵ်ႈႁိူၼ်းယေး ယၢမ်းၵၢင်ၶမ်ႈၵၢင်ၶိုၼ်း ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ငိၼ်းမႅၼ်ႈဝႃႈ တေႁၢမ်ႈၼႆဢေႃႈ ။ ၵူၺ်းၼႃႇ လိၵ်ႈပဵၼ်တၢင်းၵၢၼ်တႄႉဢမ်ႇႁၼ်ဢွၵ်ႇၶႃႈ။ယွၼ်ႉသင်လႄႈ ၶဝ်တေႁၢမ်ႈၼႆၵေႃႈ ဢမ်ႇမီးၽႂ်ႁူႉၸွမ်းၶႃႈ။ငိၼ်းဝႃႈ တႄႉ တေႁၢမ်ႈဝၼ်းတီႈ 27 ၼႆ ၵူၺ်းၵႃႈ ပိူၼ်ႈၵေႃႈ ၵႂႃႇၵႂႃႇမႃးမႃးၵၼ်ယူႇ ” – ဝႃႈၼႆ။

- Subscription -

ၵူၼ်းမိူင်းၸိူဝ်းၽုၵ်ႇၽၵ်းယိူဝ်ႈၼၢင်းၶဵဝ် ၼႂ်းၸႄႈဝဵင်းမိူင်းတူၼ်ၼႆႉ ၵမ်ႈၼမ် လုၵ်ႉၸဝ်ႉ 3-4 မူင်း သေ ၵႂႃႇၶၢႆၼႂ်းၵၢတ်ႇလႄႈ ပေႃးမီးလွင်ႈႁေႉႁၢမ်ႈဢွၵ်ႇၼွၵ်ႈႁိူၼ်းယေးတႄႉ ၵူၼ်းမိူင်းၸၢင်ႈထူပ်းတၢင်းယၢပ်ႇၽိုတ်ႇ  ၼႆယဝ်ႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူၼ်မိူင်းႁဝ်းသမ်ႉ ၵၢတ်ႇပႆႇမီးတင်းၶိုၼ်းတင်းဝၼ်းလူင် ပေႃးၶဝ်ႁၢမ်ႈမႃးတေႉတႄႉ ယၢပ်ႇယဝ်ႉ ။ ၵၢတ်ႇမိူင်းတူၼ်ၼႆႉ ပိုတ်ႇၸဝ်ႉ ဝၢႆးၸဝ်ႉ ၶႃႈဢေႃႈ ။ ပေႃး 7-8 မူင်းၵၢင်ၼႂ်ၼႆႉတႄႉ ဢမ်ႇပေႃးမီးၽႂ်သိုဝ်ႉၽႂ်ၶၢႆယဝ်ႉၶႃႈ ” – ဝႃႈၼႆ။

ပေႃးထိုင်မႃး ၼႂ်းလိူၼ်ၸဵင်မႂ်ႇပီၼႆႉ တေပိုတ်ႇပၢင်တိုဝ်းၵမ်တြႃး တီႈဝတ်ႉၵျွင်းၵမ်ႇမထၢၼ်း သထူင်ႇမူႇလမိၼ်းၵုၼ်းၸေႇတဝုၼ်ႇ ၸႄႈဝဵင်းမိူင်းတူၼ်ယဝ်ႉလႄႈ ၵူၼ်းမိူင်းဢွၼ်ၵၼ်မႆႈၸႂ် ၵူဝ်ၵႂႃႇမႃးၶဝ်ႈဢွၵ်ႇ ၸၢင်ႈမီးလွင်ႈၶွင်ႈၶမ် တႃႇၵႂႃႇႁဵတ်းဝေႇယႃဝိတ်ႉၸၼႆယဝ်ႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တေႃႈၼင်ႇၶဝ်ယင်း ဢမ်ႇပႆႇဢွၵ်ႇလိၵ်ႈႁၢမ်ႈ ။ ႁဝ်းလတ်းၵႂႃႇမႃးၸွမ်းတၢင်းၵႂႃႇၵျွင်းၵမ်ႇမထၢၼ်းၸိူဝ်းၼၼ်ႉၵေႃႈ ပေႃးပဵၼ်ယၢပ်ႇ။ သိုၵ်းမၢၼ်ႈ ဢၼ်တင်ႈၵဵၵ်ႉပႂ်ႉၸွမ်းတၢင်းၼၼ်ႉ ၸႅတ်ႈထၢမ်တႂ်ႈၼိူဝ် ပေႃးၶၢၼ်ႉတွပ်ႇ ။ သဵၼ်ႈတၢင်းၵႂႃႇၵျွင်းမထၢၼ်းၼၼ်ႉၵေႃႈ မၼ်းတေႃႇတၢင်းမိူဝ်းတပ်ႉ ၶလယ 277 ၶဝ်လႄႈ ဢမ်ႇၶႂ်ႈပၼ်လတ်း။ ၸႂ်ႉၵူၼ်းမိူင်းၵႂႃႇ  တၢင်းၾင်ႇၼမ်ႉတူၼ် ၼၼ်ႉဢေႃႈ။ ပေႃးၶဝ်ဢွၵ်ႇလိၵ်ႈႁၢမ်ႈဢွၵ်ႇၼွၵ်ႈၵၢင်ၶမ်ႈၶိုၼ်းမႃးတေႉတႄႉ  ၶႅၼ်းတေယၢပ်ႇယဝ်ႉ ” – ဝႃႈၼႆ။

ဝၢႆးသေ ၾႆးမႆႈႁူင်းၵဵပ်းမၢၵ်ႇၵွင်ႈၸိုၼ်းယၢမ်းတီႈမိူင်းသၢတ်ႇ ဢၼ်ယၢၼ်ၵႆၵၼ်တၢင်းဝဵင်းမိူင်းတူၼ် 40 လၵ်းပၢႆၼၼ်ႉယဝ်ႉ ၾၢႆႇသိုၵ်းမၢၼ်ႈယိုတ်းမိူင်း ၵႆႉၸႅတ်ႈၵႆႉထၢမ်ၵူၼ်းမိူင်းၸိူဝ်းၵႂႃႇမႃးၸွမ်းတႃႈၸွမ်းတၢင်း။ မိူဝ်ႈဝၼ်းတီႈ 20/11/2023 ယၢမ်းၵၢင်ဝၼ်းၼၼ်ႉၵေႃႈ ၾႆးမႆႈႁွင်ႈထႅဝ်ႁၢၼ်ႉၶၢႆၵုၼ်ႇယွႆႈတႅဝ်းၼိုင်ႈ ၼႃႈၵၢတ်ႇၸႄႈဝဵင်းမိူင်းတူၼ်ၼၼ်ႉ လူႉယႂ်ႇသုမ်းၼမ်။သိုၵ်းမၢၼ်ႈဢဝ်လွင်ႈတၢင်းၸိူဝ်းၼႆႉသေ ၼႄၶေႃႈဢၢင်ႈ တေဢမ်ႇႁႂ်ႈၵူၼ်းမိူင်းၵႂႃႇမႃးၵၢင်ၶမ်ႈၵၢင်ၶိုၼ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း