ပၢင်တိုၵ်း တီႈဝဵင်းမူႇၸေႊ မၢၵ်ႇလူင် တူၵ်းသႂ်ႇႁိူၼ်းယေးလင်ၼိုင်ႈ တိူဝ်ႉသႂ်ႇၵူၼ်းမိူင်း လူႉတၢႆထင်တီႈ 1 ၵေႃႉ မၢတ်ႇၸဵပ်း 1 ၵေႃႉ။
မိူဝ်ႈဝႃး ဝၼ်းတီႈ 28/11/2023 ယၢမ်းဝၢႆးဝၼ်း 2 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် မႃးပွႆႇမၢၵ်ႇတၢင်း 105 လၵ်းသေ မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းမၢၼ်ႈမေႃႈ ဢိူင်ႇမိူင်းယု ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ် တႆး – ၶႄႇ တိူဝ်ႉသႂ်ႇမႄႈႁိူၼ်းၼုမ်ႇ ဢႃယု 30 ပၢႆ ၵေႃႉၼိုင်ႈ လူႉတၢႆထင်တီႈ ၵိုၵ်းႁိူၼ်း။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈၶႃႈဢေႃႈ ၶဝ်ၸႂ်ႉၶိူင်ႈမိၼ် မႃးပွႆႇသႂ်ႇ တူၵ်း မႅၼ်ႈႁိူၼ်းၵူၼ်းမၢၼ်ႈမေႃႇ လူႉၵွႆလင်ၼိုင်ႈ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ မႄႈႁိူၼ်းၼုမ်ႇ ဢႃယု 30 ပၢႆ ၵေႃႉၼိုင်ႈ လူႉတၢႆ ၵိုၵ်းႁိူၼ်းလႄႈ ၵေႃႉပဵၼ် ၸဝ်ႈၽူဝ်မၼ်းၼၢင်း လႆႈတိူဝ်ႉမၢတ်ႇၸဵပ်းၶႃႈ။ ၵေႃႉပဵၼ်လုၵ်ႈဢွၼ်ႇၶဝ်တႄႉ လွတ်ႈၽေးတင်း သွင်ၵေႃႉဢေႃႈ”- ဝႃႈၼႆ။
ယၢမ်းလဵဝ် ၵူၼ်းၼႂ်းဢိူင်ႇမိူင်းယု 105 လၵ်းၼႆႉ ဢွၼ်ၵၼ်ပၢႆႈမႃးသွၼ်ႈဝႆႉ တီႈဝၢၼ်ႈၼမ်ႉၶူမ်လႄႈ ဝတ်ႉဝုၺ်ႇလုဝုၼ်ႇ ၸိူဝ်း ၼႆႉ တင်းမူတ်းယဝ်ႉ။
ၶၢဝ်းတၢင်း 3 ဝၼ်း ထပ်းၵၼ်မႃးၼႆႉ မၢၵ်ႇလူင် တူၵ်းသႂ်ႇၵူၼ်းမိူင်း တီႈ 105 လၵ်း ၸႄႈဝဵင်းမူႇၸေႊ လူႉတၢႆ 5 ၵေႃႉ မၢတ်ႇ ၸဵပ်း 6 ၵေႃႉယဝ်ႉ။
မိူဝ်ႈဝၼ်းတီႈ 26 ၼၼ်ႉ မၢၵ်ႇလူင်တူၵ်းသႂ်ႇ ၵူၼ်းၼုမ်ႇ ၽူႈၸၢႆး ဢႃယုမွၵ်ႈ 27 ပီ လူႉတၢႆ ၵေႃႉၼိုင်ႈ။ ဝၼ်းတီႈ 27သမ်ႉ မၢၵ်ႇလူင် သိုၵ်းမၢၼ်ႈ တူၵ်းသႂ်ႇၵူၼ်းမိူင်း လူႉတၢႆထႅင်ႈ 3 ၵေႃႉ မၢတ်ႇၸဵပ်း 5 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ