ၵူၼ်းၸုမ်းၼိုင်ႈၶဝ်ႈမႃးၼႂ်းႁူင်းလဵၼ်ႈၵဵမ်းတေႃႇလွင်း တီႈ 105 လၵ်း မိူင်းယု ၼၼ်ႉသေ ပိုတ်းယိုဝ်းလႄႈ ၵူၼ်းမိူင်းၵေႃႉ 1 လႄႈ ပျီႇတူႉၸိတ်ႉ ၵေႃႉ 1 လူႉတၢႆ။
လွင်ႈပိုတ်းယိုဝ်းၵၼ်ၼႂ်းႁၢၼ်ႉလဵၼ်ႈၵဵမ်းတီႈမူႇၸေႊၼႆႉပဵၼ်မိူဝ်ႈဝႃးဝၼ်းတီႈ 26/10/2021 ယၢမ်းၵၢင်ၼႂ်မွၵ်ႈ 11 မူင်း။
“ၵူၼ်းမိူင်းၵေႃႉ 1 လႄႈ ပျီႇတူႉၸိတ်ႉၵေႃႉ 1 တၢႆ 2 ၵေႃႉ။ ဢၼ်မၢတ်ႇၸဵပ်းသမ်ႉၵေႃႉၼိုင်ႈဢေႃႈ။ ပၼ်ၵူၼ်းမႃးလဵၼ်ႈၵဵမ်းဢေႃႈ။ ၵူၼ်းမႃးယိုဝ်းပဵၼ်ၽႂ် ၶဝ်မီးပၼ်ႁႃသင်ၵၼ်တႄႉဢမ်ႇႁူႉၶႃႈ။ တူဝ်တၢႆၵူၼ်း 2 ၵေႃႉတႄႉ ၸုမ်းၸွႆႈထႅမ် ပႃႇရမီႇ မႃးဢဝ်ၵႂႃႇသၢင်းၵဵဝ်ႇပၼ်ယဝ်ႉၶႃႈ ”– ၵူၼ်းယူႇတီႈ မိူင်းယု 105 လၵ်းၵေႃႉၼိုင်ႈလၢတ်ႈ။
ႁၢၼ်ႉလဵၼ်ႈၵဵမ်းၼၼ်ႉ တိုၵ်ႉမႃးပိုတ်ႇယင်းပႆႇႁိုင်သင်။ ၵူၼ်းပိုၼ်ႉတီႈ ပႃးၸဵမ်ၵူၼ်းမိူင်းလႄႈပျီႇတူႉၸိတ်ႉ ဢွၼ်ၵၼ်ၵႂႃႇလဵၼ်ႈၵဵမ်း လူၺ်ႈဢမ်ႇသူၼ်ၸႂ်ဝႆႉၼၵ်းတၢင်းပဵၼ်ၶူဝ်ႊဝိတ်ႉ။
“မိူၼ်မိူဝ်ႈဝႃးၼႆႉ ၵူၼ်းလဵၼ်ႈၵဵမ်းၼႆႉၼမ်ၼႃႇ။ ပျီႇတူႉၸိတ်ႉလၢႆလၢႆပေႃးၶႆႈမီးပဵၼ် 100 ယဝ်ႉယူဝ်ႉ။” ၵူၼ်းပိုၼ်ႉတီႈလၢတ်ႈ။
ထုင်ႉတၢင်းၶဝ်ႈမူႇၸေႊ မိူင်းယု 105 လၵ်းၸိူဝ်းၼႆႉမီးၸုမ်းယိပ်းၵွင်ႈၵၢင်ႇယူႇသဝ်းၼမ်။ မိူဝ်ႈဝႃးၼႆႉၵေႃႈတၢင်းၶဝ်ႈမူႇၸေႊ တီႈဝၢၼ်ႈမေႃႈတွင်း ႁိမ်း 105 လၵ်းၼၼ်ႉ ၸုမ်းသိုၵ်းမၢၼ်ႈလႄႈၸုမ်းယိပ်းၵွင်ႈၸုမ်းၼိုင်ႈယင်းပဵၼ်ပၢင်ပိုတ်းယိုဝ်းၵၼ်ယူႇ။
