ၶၢဝ်းတၢင်း 2 ဝၼ်းမႃးၼႆႉ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း တီႈ 105 လၵ်း ဝဵင်းမူႇၸေႊ တၢႆ 3 ၵေႃႉ မၢတ်ႇၸဵပ်း 5 ၵေႃႉ။
မိူဝ်ႈၼႆႉ ဝၼ်းတီႈ 28/11/2023 ယၢမ်းၵၢင်ၼႂ်မွၵ်ႈ 7 မူင်း မၢၵ်ႇလူင်တူၵ်းသႂ်ႇ ႁိူၼ်းယေး ၵူၼ်းမိူင်း တီႈ 105 လၵ်း ၸႄႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၸၢၵ်ႇမၢၵ်ႇတိူဝ်ႉသႂ်ႇၵူၼ်းမိူင်း မၢတ်ႇၸဵပ်းထႅင်ႈ 3 ၵေႃႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ် မၢၵ်ႇလူင် တူၵ်းသႂ်ႇ ၵူၼ်းမိူင်း တီႈ 105 လၵ်း တိူဝ်ႉၺႃး ထဝ်ႈယိင်း 2 ၵေႃႉလႄႈ ထဝ်ႈၸၢႆး 1 ၵေႃႉ မၢတ်ႇၸဵပ်း။ ယၢမ်းလဵဝ် လႆႈသူင်ႇယူတ်းယႃဝႆႉ တီႈႁူင်းယႃမူႇၸေႊယဝ်ႉ။ မၢၵ်ႇလူင် ဢၼ်တူၵ်းမႃးမိူဝ်ႈၼႆႉ ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ဢမ်ႇႁူႉၶႃႈ”- ဝႃႈၼႆ။
မိူဝ်ႈဝႃး ဝၼ်းတီႈ 27/11/2023 ယၢမ်းဝၢႆးဝၼ်းမွၵ်ႈ 4 မူင်း သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇ တီႈ 105 လၵ်း ၼႆႉသေ တိူဝ်ႉသႂ်ႇ ၵူၼ်းမိူင်းလူႉတၢႆထင်တီႈ 2 ၵေႃႉ မၢတ်ႇၸဵပ်း 3 ၵေႃႉ။
“ၵူၼ်းမၢတ်ႇၸဵပ်း မိူဝ်ႈဝႃး 3 ၵေႃႉၼၼ်ႉ။ ၼႂ်းၼၼ်ႉ တႃႇၵေႃႉၼိုင်ႈ ပဵၼ်လုၵ်ႈဢွၼ်ႇ လႆႈမႃးလူႉတၢႆ တီႈႁူင်းယႃမူႇ ၸေႊ မိူဝ်ႈၼႆႉ ယၢမ်းၵၢင်ၼႂ်ၶႃႈဢေႃႈ။ ဢၼ်လူႉတၢႆ မိူဝ်ႈဝႃးၼၼ်ႉသမ်ႉ ပဵၼ်သွင်ၵေႃႉမႄႈလုၵ်ႈ တီႈၶွၵ်ႈလဵင်ႉဝူဝ်း။ ၶၢဝ်းတၢင်း 2 ဝၼ်းမႃးၼႆႉ မၢၵ်ႇလူင် တိူဝ်ႉသႂ်ႇၵူၼ်းမိူင်း လူႉတၢႆ 3 ၵေႃႉ မၢတ်ႇၸဵပ်း 5 ၵေႃႉယဝ်ႉ တီႈ 105 လၵ်းၼႆႉ”- ၵူၼ်းပိုၼ်ႉတီႈ ဝဵင်း မူႇၸေႊ သိုပ်ႇလၢတ်ႈၼႄၼင်ႇၼႆ။
မိူဝ်ႈဝၼ်းတီႈ 26/11/2023 ယၢမ်းၵၢင်ၶမ်ႈမွၵ်ႈ 7 မူင်းၶိုင်ႈ သိုၵ်းမၢၼ်ႈ ယိုတ်းမိူင်းတင်း ၸုမ်းဢူၺ်းလီ ပွတ်းႁွင်ႇ ပဵၼ် ပၢင်တိုၵ်းၵၼ် ႁၢဝ်ႈႁႅင်း တီႈ 105 လၵ်း ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းၼုမ်ႇ ၽူႈၸၢႆး ဢႃယုမွၵ်ႈ 27 ၵေႃႉၼိုင်ႈ လူႉတၢႆ။
ၸွမ်းၼင်ႇ ၽႅၼ်ၵၢၼ် 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း ႁူမ်ႈၵၼ် လေႃႇတိုၵ်းတပ်ႉသိုၵ်းမၢၼ်ႈ ယိုတ်းမိူင်း မႃးႁၢဝ်ႈ ႁႅင်း ၼႂ်းၸိုင်ႈတႆးပွတ်းႁွင်ႇ မီးၶၢဝ်းတၢင်း လိူၼ်ပၢႆယဝ်ႉ သဵင်ၵွင်ႈ ယင်းပႆႇယဵၼ်။ တုမ်ႉတိူဝ်ႉၵူၼ်းမိူင်းပၢႆႈ ၽေးသိုၵ်း ၼပ်ႉႁူဝ် မိုၼ်ႇလႄႈ ႁိူၼ်းယေးၵူၼ်းဝၢၼ်ႈ လူႉၵွႆၸွမ်းထႅင်ႈတင်းၼမ်။ လိူဝ်ၼၼ်ႉ တုမ်ႉတိူဝ်ႉပႃး ၵူၼ်းမိူင်းမၢတ်ႇၸဵပ်းလူႉတၢႆၸွမ်းထႅင်ႈ။
