ၵူၼ်းပၢႆႈၽေးၼမ်ႉၶမ်း ၵိုင်ႉၵင်ႉလႆႈပၢႆႈၽေးလႄႈ ဢမ်ႇတၼ်းလႆႈသင် မိူဝ်ႈလဵဝ် မႆႈၸႂ်ႁိူၼ်းယေးၽႂ်မၼ်း ။
ၼႂ်းလိူၼ်ၼူဝ်ႊဝႅမ်ႊပိူဝ်ႊ ပီ 2023 ၼႆႉသိုၵ်းတဢၢင်း TNLA လေႃႇတိုၵ်းသိုၵ်းမၢၼ်ႈၼႂ်းၼမ်ႉၶမ်း မႃးဢမ်ႇထၢတ်ႇ ထိုင်မိူဝ်ႈလဵဝ်ၵေႃႈ သဵင်ၵွင်ႈသဵင်မၢၵ်ႇပႆႇယဵၼ် ၵူၼ်းပၢႆႈၽေးၸိူဝ်းပၢႆႈသွၼ်ႈဝႆႉတီႈလွတ်ႈၽေးၵေႃႈ ဢမ်ႇၸၢင်ႈၶိုၼ်းပွၵ်ႈ ၵမ်ႈၼမ်ဢွၼ်ၵၼ်မႆႈၸႂ် ႁိူၼ်းယေး ၵူဝ်ၺႃးသိုၵ်းၶဝ်ႈသွၵ်ႈတဝ်ယႃႉလႅဝ် ၵူဝ်ၺႃးမၢၵ်ႇလူင်တူၵ်းသႂ်ႇ။
ၵူၼ်းပၢႆႈၽေးၼမ်ႉၶမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပၢင်တိုၵ်းၼႆႉ ပဵၼ်ယူႇတင်းဝၼ်းတင်းဝၼ်းယဝ်ႉၶႃႈ။ ႁိူဝ်းမိၼ်သိုၵ်းၵေႃႈ မႃးပၼ်ႇလဵပ်ႇယူႇၵူႈဝၼ်း။ သမ်ႉပွႆႇမၢၵ်ႇသႂ်ႇၵူၼ်းဝၢၼ်ႈၵူၼ်းသူၼ်ၸိူဝ်းၼႆႉ။မိူဝ်ႈလဵဝ်ႁဝ်းၶႃႈတႄႉ ပၢႆႈမႃး သွၼ်ႈဝႆႉ တီႈမူႇၸေႊၼႆႉဢေႃႈ ” – ဝႃႈၼႆ။
ၵူၼ်းပၢႆႈၽေးၼမ်ႉၶမ်းၸိူဝ်းပၢႆႈသွၼ်ႈယူႇၸွမ်းႁိူၼ်းယေးပီႈၼွင်ႉ ၸိူဝ်းဢမ်ႇမီးပီႈၼွင်ႉတီႈမူႇၸေႊတႄႉ ပၢႆႈသွၼ်ႈယူႇဝႆႉတီႈ ဝတ်ႉၵျွင်းၵၢင်မိူင်း ၸႄႈဝဵင်းမူႇၸေႊ မီးယူႇလၢႆဝၢၼ်ႈ မိူၼ်ၼင်ႇ ပွၵ်ႉတႂ်ႈ ၊ ပွၵ်ႉဝဵင်းသႃႇ ၊ ပွၵ်ႉဢွင်ႇမႅတ်ႉတႃႇ ၊ ပွၵ်ႉဢွင်ႇမင်ႇၵလႃႇ လႄႈ မၢၼ်ႈၼႃး ၸဵမ်ၸိူဝ်းၼႆႉ လိူဝ်ၼၼ်ႉ ၵူၼ်းပၢႆႈၽေးပၢင်ႇသၢႆး မႃးသွၼ်ႈယူႇဝႆႉၵေႃႈမီး တၢင်းသဵင်ႈ ဢမ်ႇယွမ်း 200 ၼႂ်းၼၼ်ႉ ၵူၼ်းၼမ်ႉၶမ်း မီး100 ပၢႆ။ၵူၼ်းပၢင်ႇသၢႆးတႄႉ ပွၵ်ႈၶိုၼ်းၵမ်ႈၽွင်ႈယဝ်ႉဝႃႈၼႆ။
ၵူၼ်းပၢႆႈၽေးၼမ်ႉၶမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ႁဝ်းၶႃႈတႄႉ ပၢႆႈမႃးမီး 8 ဝၼ်းဢေႃႈ ။တီႈဝၢၼ်ႈႁဝ်းပွၵ်ႉတႂ်ႈၵေႃႈ ၺႃးမၢၵ်ႇတူၵ်းသႂ်ႇ တိူဝ်ႉပႃးႁိူၼ်းႁဝ်းၶႃႈဢေႃႈၼၼ်ႉ။ ၶႂ်ႈမိူဝ်းတူၺ်းႁိူၼ်းၶိုၼ်းၵေႃႈ ဢမ်ႇၸၢင်ႈ။တေမိူဝ်းၵေႃႈ သဵင်ၵွင်ႈသဵင်မၢၵ်ႇပေႃးပၼ်းၵႂႃႇသဵင်ႈ။ႁဝ်းသမ်ႉ မီးလုၵ်ႈဢွၼ်ႇလဵၵ်ႉဝႆႉလႄႈ မႆႈၸႂ်ၼၼ်ႉထႅင်ႈ။ၵူၼ်းၸိူဝ်းပၢႆႈမႃးၸိူဝ်းၼႆႉ လႆႈဝႃႈၶႂ်ႈပွၵ်ႈၶိုၼ်းၵူႈၵေႃႉယဝ်ႉၶႃႈ။ၵူၺ်းၼႃႇ ဢမ်ႇၸၢင်ႈႁဵတ်းႁိုဝ်။ပေႃးမီးၵူၼ်းမိူင်းၵႂႃႇမႃးၵေႃႈ သိုၵ်းလွႆၶဝ် ၸႅတ်ႈၸႅတ်ႈထၢမ်ထၢမ်လႄႈ ဢွၼ်ၵၼ်ၵူဝ်ထႅင်ႈ။သမ်ႉၵူဝ်ၶဝ် ၺွပ်းဝႆႉၵေႃႈလွင်ႈၼိုင်ႈ” – ဝႃႈၼႆ။
ၵူၼ်းမိူင်းၼမ်ႉၶမ်း ၽူင်ႉပၢႆႈမိူဝ်ႈသဵင်ၵွင်ႈသဵင်မၢၵ်ႇတိုၵ်ႉတႅၵ်ႇလႄႈ ဢမ်ႇတၼ်းလႆႈသိမ်းၶိူင်ႈၶူဝ်းၼႂ်းႁိူၼ်းၼႂ်းယေး၊ ၵမ်ႈၼမ်ဢမ်ႇတၼ်းလႆႈသင် ယွၼ်ႉၼၼ် ဢွၼ်ၵၼ်မႆႈၸႂ်ႁိူၼ်းယေးၽႂ်မၼ်း။
ၵူၼ်းပၢႆႈၽေးၼမ်ႉၶမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သဵင်ၵွင်တႅၵ်ႇလႄႈ ၸင်ႇပၢႆႈၶႃႈၼႃႇၼေႃ။တၼ်းလႆႈဢဝ် တူဝ်ၸႂ်လွတ်ႈၵူၺ်းဢေႃႈ။တီႈႁိူၼ်းၵေႃႈ ဢမ်ႇတၼ်းလႆႈသိမ်းသင်။ဢွၼ်ၵၼ်မႆႈၸႂ် ၶႂ်ႈမိူဝ်းတူၺ်းႁိူၼ်း။သဵင်ၵွင်ႈၵေႃႈ သမ်ႉပႆႇယဵၼ်။တူၺ်းပၢင်တိုၵ်းတႄႉ လႅပ်ႈတေၵႂႃႇထႅင်ႈသိုပ်ႇထႅင်ႈၶၢဝ်းယၢဝ်းယူႇၶႃႈယူဝ်ႉ။ႁဝ်းၶႃႈၵူၼ်းမိူင်းတႄႉ ယၢပ်ႇၵိၼ်းၸႂ်တေႉယဝ်ႉၶႃႈ ” – ဝႃႈၼႆ။
တႄႇဢဝ် ဝၼ်းတီႈ 24/11/2023 ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ ယိုတ်းမိူင်းတင်း သိုၵ်း တဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းဝဵင်းၼမ်ႉၶမ်း ႁဵတ်းႁႂ်ႈၵူၼ်းမိူင်း တူၵ်းၸႂ်တိုၼ်ႇသၢၼ်ႈၵူဝ်ႁေ ၼွၼ်းၶိုၼ်းပေႃးဢမ်ႇလပ်း ၼႆယဝ်ႉ။
