ၵူၼ်းၼုမ်ႇတႆး ဝဵင်းၵဵင်းမႂ်ႇ ႁူမ်ႈၵၼ်သေ လူင်းပိုၼ်ႉတီႈ ႁႃငိုၼ်းၵွင်ၵၢင် တႃႇၸွႆႈထႅမ်ၵူၼ်းပၢႆႈၽေး ၼႂ်းမိူင်းတႆးပွတ်း ႁွင်ႇထႅင်ႈ။

မိူဝ်ႈဝႃး ဝၼ်းတီႈ 27/11/2023 တႄႇဢဝ်ယၢမ်းၵၢင်ၼႂ် 7 မူင်းထိုင် 11 မူင်းၵၢင်ဝၼ်း (ၼႂ်းဝၼ်းလူႇတၢၼ်း သၢင်ႇၵၢၼ်း ၵထိၼ်ႇ လိူၼ်သိပ်းသွင်မူၼ်း) ၵူၼ်းၼုမ်ႇတႆး ဝဵင်းၵဵင်းမႂ်ႇ လူင်း ပိုၼ်ႉတီႈ ႁႃငိုၼ်းၵွင်ၵၢင် တႃႇၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းတႆးပွတ်းႁွင်ႇ တီႈဝတ်ႉမွၼ်ႉ ၸႄႈဝဵင်းလွႆသၵဵတ်း ၸႄႈ တွၼ်ႈၵဵင်းမႂ်ႇ ၸိုင်ႈထႆး တင်းမူတ်း လႆႈငိုၼ်းၵမ်ႉၸွႆႈ 140,000 ဝၢတ်ႇပၢႆ။

ၵူၼ်းၼုမ်ႇတႆး ၽူႈၶဝ်ႈႁူမ်ႈတူင်ႉၼိုင် လၢတ်ႈတီႈၽူႈတွႆႇႁွၵ်ႈဝႃႈ – “ယူႇတီႈ ၸုမ်းႁဝ်းၶႃႈ ၵူၼ်းၼုမ်ႇတႆးသေ ႁူမ်ႈတင်း ၸဝ်ႈ သြႃႇဝတ်ႉမွၼ်ႉ လႆႈၸႂ်ၵၼ်ဝႃႈ ငိုၼ်းတီႈလူႇၶၢမ်ႇလႆႈမႃးတင်းမူတ်းၼႆႉ ႁဝ်းၶႃႈ တေၸွႆႈထႅမ် တႃႇၵူၼ်းပၢႆႈၽေးသိုၵ်း မိူင်းတႆး ပွတ်းႁွင်ႇ တင်းမူတ်းဢေႃႈ။ မိူဝ်ႈဝႃး ႁဝ်းၶႃႈလႆႈမႃး ငိုၼ်းၵမ်ႉၸွႆႈ 20,000 ဝၢတ်ႇပၢႆ။ တီႈၸဝ်ႈ ၶူး ဝတ်ႉမွၼ်ႉ ႁဝ်းၶႃႈထႅင်ႈ 120,000 ပၢႆ ႁူမ်ႈၵၼ်မွၵ်ႈ 150,000 ဝၢတ်ႇ ၼႆႉဢေႃႈ”- ဝႃႈၼႆ။

ယူႇတီႈ ၸုမ်းၵူၼ်းၼုမ်ႇတႆး ဝဵင်းၵဵင်းမႂ်ႇၼႆႉသေ ႁူမ်ႈၵၼ် လူင်းပိုၼ်ႉတီႈ ႁႃငိုၼ်းၵွင်ၵၢင်တႃႇၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းတႆးပွတ်းႁွင်ႇမႃး တင်းမူတ်းမီး 6 ပွၵ်ႈယဝ်ႉ။ တင်ႈတႄႇ ဝၼ်းဢွၵ်ႇဝႃႇ ၼႂ်းဝၼ်းတီႈ 29/10/2023 ၼၼ်ႉမႃး လႆႈလူင်းပိုၼ်ႉတီႈ မိူၼ်ၼင်ႇ – ဝတ်ႉပႃႇပဝ်ႈ၊ ဝတ်ႉၵူႇတဝ်ႈ၊ ၼႃႈၸၼ်ႉၸွမ် ၵဵင်းမႂ်ႇ၊ ဝတ်ႉၼွင်ပိုင် 2 ပွၵ်ႈလႄႈ ဝတ်ႉမွၼ်ႉ ၸိူဝ်းၼႆႉ။

ၶၢဝ်းတၢင်း ၸုမ်းၵူၼ်းၼုမ်ႇတႆး လႆႈလူင်းပိုၼ်ႉတီႈ ႁႃငိုၼ်းၵွင်ၵၢင်ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းမိူင်းတႆးပွတ်းႁွင်ႇမႃးၼႆႉ တင်းမူတ်းလႆႈငိုၼ်းၵမ်ႉၸွႆႈမႃး ဢမ်ႇယွမ်း 2 သႅၼ်ဝၢတ်ႇယဝ်ႉ – ၵူၼ်းၼုမ်ႇတႆးလၢတ်ႈ။