မိူဝ်ႈၼႆႉ ဝၼ်းတီႈ 27/11/2023 ယၢမ်းဝၢႆးဝၼ်းမွၵ်ႈ 3 မူင်းၶိုင်ႈ သိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇသႂ်ႇ တီႈ 105 လၵ်း ၸႄႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ တိူဝ်ႉသႂ်ႇ ၵူၼ်းမိူင်းတၢႆထင်တီႈ 2 ၵေႃႉ မၢတ်ႇၸဵပ်း 4 ၵေႃႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇသႂ်ႇ တီႈ 105 လၵ်း မိူဝ်ႈၵႆႈ ယၢမ်းဝၢႆးဝၼ်းမွၵ်ႈ 3 မူင်းၶိုင်ႈၼႆႉဢေႃႈ။ တိူဝ်ႉၺႃး ၽူႈၸၢႆး လူႉတၢႆထင်တီႈ 2 ၵေႃႉ။ ယဝ်ႉၵေႃႈ တိူဝ်ႉၺႃး ၵူၼ်းမိူင်းထႅင်ႈ မၢတ်ႇၸဵပ်း 4 ၵေႃႉ”- ဝႃႈၼႆ။
ၽူႈၸၢႆး 2 ၵေႃႉ ဢၼ်လႆႈလူႉတၢႆ တီႈ 105 လၵ်းၼႆႉ ပဵၼ်ၵူၼ်းႁဵတ်းၵၢၼ် တီႈဝၢင်းလဵင်ႉဝူဝ်း ဢၼ်ႁွင်ႉဝႃႈ (ဝၢင်းလဵင်ႉဝူဝ်း ၼမ်ႉတူႈ) ၼႆယဝ်ႉ။
မိူဝ်ႈၼႆႉ ယၢမ်းဝၢႆးဝၼ်း သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇတီႈ 105 လၵ်း 2 လမ်း ယဝ်ႉၵေႃႈ ပၼ်ႇလဵပ်ႈၸွမ်းသၢပ်ႇဝဵင်း မူႇၸေႊ ဢမ်ႇယွမ်း 8 ႁွပ်ႈယဝ်ႉ။
ယဝ်ႉၵေႃႈ မိူဝ်ႈၼႆႉ ဝၼ်းတီႈ 27/11/2023 ယၢမ်းဝၢႆးဝၼ်းမွၵ်ႈ 2 မူင်း တရူၼ်းမႃးပွႆႇမၢၵ်ႇ သႂ်ႇတီႈၵူဝ်ႇတွင်ႇ ၶိူင်ႈၾႆး ၾႃႉ (ဢွင်ႈတီႈ ၵဵပ်းၶွင် ၶိူင်ႈၾႆးၾႃႉ) တီႈ 105 လၵ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထုၵ်ႇၾႆႈမႆႈၵႂႃႇ ဝႃႈၼႆ။
