သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ႁူမ်ႈတင်း PDF ပဵၼ်ပၢင်တိုၵ်းၵၼ် တီႈဝဵင်းမိူင်းမိတ်ႈ ႁၢဝ်ႈႁႅင်း မၢၵ်ႇလူင်တူၵ်းသႂ်ႇ ၵူၼ်းမိူင်းလူႉတၢႆ ဢမ်ႇယွမ်း 5 ၵေႃႉ မၢတ်ႇၸဵပ်းမွၵ်ႈ 10 ၵေႃႉ။
ဝၼ်းတီႈ 09/07/2024 ယၢမ်းၵၢင်ၶမ်ႈ မၢၵ်ႇလူင်တူၵ်းသႂ်ႇ ၼႂ်းဝၢၼ်ႈၼႃးၶူဝ်ပၢင်ႇ (လက်ခုပ်ပင်ရွာ) ဝဵင်း မိူင်းမိတ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇၵူၼ်းမိူင်း လူႉတၢႆ 2 ၵေႃႉ ယွၼ်ႉသိုၵ်းမၢၼ်ႈ ပွႆႇမၢၵ်ႇလူင်ၶဝ်ႈၼႂ်းဝၢၼ်ႈ ၼႆယဝ်ႉ။
ၵူၼ်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၽွင်းမိူဝ်ႈသိုၵ်းသွင်ၾၢႆႇ လႆႈဢဝ်မၢၵ်ႇလူင် ယိုဝ်းသႂ်ႇၵၼ် ၼၼ်ႉ သိုၵ်းမၢၼ်ႈ ယိုဝ်းမၢၵ်ႇလူင် ၶဝ်ႈၼႂ်းဝၢၼ်ႈ တိူဝ်ႉၺႃးၵူၼ်းဝၢၼ်ႈတၢႆထႅင်ႈ 2 ၵေႃႉ ၼႂ်းဝၼ်းတီႈ 9 ယၢမ်းၵၢင်ၶမ်ႈၼႆႉ။ မိူဝ်ႈဝၼ်းတီႈ 7 ၼၼ်ႉၵေႃႈ ၵူၼ်းဝၢၼ်ႈၼႃးၶူဝ်ပၢင်ႇ ဢၼ်တိူဝ်ႉၺႃးမၢၵ်ႇလူင်ဝႆႉ 3 ၵေႃႉ ၼၼ်ႉၵေႃႈ လႆႈလူႉတၢႆၵႂႃႇတင်း 3 ယဝ်ႉ။ တေလႆႈဝႃႈ ဝၢၼ်ႈၼႃးၶူဝ်ပၢင်ႇၼႆႉၵူၺ်း ၵူၼ်းဝၢၼ်ႈ ၺႃးၸၢၵ်ႇမၢၵ်ႇသေ လူႉတၢႆ မီး 5 ၵေႃႉယဝ်ႉ။ ဢၼ်ႁဝ်းၶႃႈ ဢမ်ႇႁူႉၵေႃႈ တေမီးထႅင်ႈယူႇ”- ဝႃႈၼႆ။
တႄႇဢဝ် ဝၼ်းတီႈ 1 လိူၼ်ၵျူႊလၢႆႊၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 9 ၼႆႉ မၢၵ်ႇလူင် တူၵ်းသႂ်ႇ ၵူၼ်းမိူင်းမိတ်ႈ မိူၼ်ၼင်ႇ ဝၢၼ်ႈလွၵ်းလူင် 7 ၵေႃႉ ၼႂ်းၼၼ်ႉ လူႉတၢႆ 1 ၵေႃႉ၊ ဝၢၼ်ႈၼႃးၶူဝ်ပၢင်ႇ လူႉတၢႆ 5 ၵေႃႉ၊ ဝၢၼ်ႈၺွင်ႇလႅင် (ၼိူဝ်) မၢတ်ႇၸဵပ်း 1 ၵေႃႉလႄႈ ဝၢၼ်ႈဢုင်းၵျေႃးမႂ်ႇ မၢတ်ႇၸဵပ်း 1 ၵေႃႉ ၼႆယဝ်ႉ။
မိူဝ်ႈဝၼ်းတီႈ 7 ပူၼ်ႉမႃးၼၼ်ႉၵေႃႈ မၢၵ်ႇလူင် တူၵ်းသႂ်ႇ တီႈႁူင်းၸၢၵ်ႈတမ်ၶဝ်ႈ ႁိမ်းတႃႈရူတ်ႉၵႃး ၸဵင်ႇၼၢင်းသူဝ်း (စိန်နန်းစိုး) ၼၼ်ႉၵေႃႈ ထုၵ်ႇၾႆးမႆႈပႅတ်ႈမူတ်း။ လိူဝ်ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝၢၼ်ႈသူၺ်ႇ ၸႃႇလီႇ 6 လုၵ်ႈ တိူဝ်ႉၺႃးႁိူၼ်းယေး ၵူၼ်းဝၢၼ်ႈလူႉၵွႆၸွမ်းထႅင်ႈ 5 လင်။
ၼႂ်းဝၼ်းတီႈ 8 ယၢမ်းၵၢင်ၼႂ် 9 မူင်းၶိုင်ႈ ထိုင် 12 မူင်းၵၢင်ဝၼ်း သွင်ၾၢႆႇပဵၼ်ပၢင်တိုၵ်းၵၼ်ထႅင်ႈ ၾၢႆႇသိုၵ်းမၢၼ်ႈ ၸႂ်ႉ ၶိူင်ႈမိၼ် မႃးပွႆႇမၢၵ်ႇ 2 လုၵ်ႈ တိူဝ်ႉသႂ်ႇဝတ်ႉသၢၵ်ႈတေႃႇ ဝဵင်းမိူင်းမိတ်ႈ လွင်ႈလူႉသုမ်းတႄႉ ပႆႇႁူႉ ဝႃႈၼႆ။
ဝၼ်းတီႈ 9 ယၢမ်းၵၢင်ၼႂ်ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် 2 လမ်းမႃးပွႆႇသႂ်ႇ တီႈဝတ်ႉသၢၵ်ႈတေႃႇထႅင်ႈ 4 လုၵ်ႈလႄႈ တီႈဝၢၼ်ႈသူၺ်ႇၸႃႇလီႇ 1 လုၵ်ႈ ၼၼ်ႉၵေႃႈ ပႆႇႁူႉလွင်ႈလူႉသုမ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ