ပၢင်တိုၵ်း တီႈဝဵင်းမူႇၸေႊ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း လူႉတၢႆထင်တီႈ ၵေႃႉၼိုင်ႈ ယွၼ်ႉသိုၵ်းမၢၼ်ႈတင်း ၸုမ်း ဢူၺ်းလီ ယိုဝ်းၵၼ်။

မိူဝ်ႈဝႃး ဝၼ်းတီႈ 26/11/2023 ယၢမ်းၵၢင်ၶမ်ႈမွၵ်ႈ 7 မူင်းၶိုင်ႈ သိုၵ်းမၢၼ်ႈ ယိုတ်းမိူင်းတင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈ 105 လၵ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၸၢၵ်ႇမၢၵ်ႇ တိူဝ်ႉသႂ်ႇ ၵူၼ်းၼုမ်ႇ ၽူႈၸၢႆး ဢႃယုမွၵ်ႈ 27 ၵေႃႉၼိုင်ႈ လူႉတၢႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းမိူဝ်ႈၶမ်ႈဝႃးၼႆႉ တႄႇယၢမ်းၵၢင်ၶမ်ႈမွၵ်ႈ 7 မူင်း ထိုင် မိူဝ်ႈ ၼႆႉ ယၢမ်းၵၢင်ၼႂ်မွၵ်ႈ 2 မူင်း သဵင်ၵွင်ၸင်ႇယဵၼ်လူင်း။ မၢၵ်ႇလူင်ၼႆႉ မႃးတူၵ်းသႂ်ႇႁိမ်းႁိူၼ်းၵူၼ်းဝၢၼ်ႈသေ ၸၢၵ်ႇ မၢၵ်ႇတိူဝ်ႉ သႂ်ႇ ဢွၼ်ႇၸၢႆးၼုမ်ႇ ဢႃယုမွၵ်ႈ 27 ပီၼႆႉ တၢႆထင်တီႈၵေႃႉၼိုင်ႈ ယဝ်ႉၵေႃႈ တိူဝ်ႉပႃးၵႃးမၼ်းၸၢႆး လူႉၵွႆထႅင်ႈ တင်းၼမ်”- ဝႃႈၼႆ။

ပၢင်တိုၵ်း တီႈ 105 လၵ်း မိူဝ်ႈၶမ်ႈဝႃးၼႆႉ ၾၢႆႇသိုၵ်းမၢၼ်ႈ ၸႂ်ႉမၢၵ်ႇလူင်ယိုဝ်းမႃးတင်းၼမ်။ ယဝ်ႉၵေႃႈ ၸႂ်ႉၶိူင်ႈမိၼ်တိုၵ်း မႃး ပွႆႇမၢၵ်ႇၸွႆႈထႅင်ႈ ဢမ်ႇယွမ်း 3 ပွၵ်ႈ။

“ပၢင်တိုၵ်းတီႈ 105 လၵ်းၼၼ်ႉ ႁႅင်းတႄႉႁႅင်းဝႃႈ ၼၼ်ႉယဝ်ႉ သဵင်ၵွင်ႈသဵင်မၢၵ်ႇၶဝ် ယွၼ်ႈထိုင် ၼႂ်းဝဵင်းမူႇၸေႊၼႆႉဢေႃႈ သဵင်မၢၵ်ႇလူင်ၶဝ် တူၵ်းတႅၵ်ႇၼႆႉ။ လႆႈငိၼ်းဝႃႈ တုမ်ႉတိူဝ်ႉပႃး ႁိူၼ်းယေးၵူၼ်းဝၢၼ်ႈ တီႈၵဵၵ်ႉၵူတ်ႇထတ်းရူတ်ႉၶဝ်ႈဢွၵ်ႇ ၸိူဝ်း ၼႆႉၵေႃႈ လူႉၵွႆထႅင်ႈတင်းၼမ်”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ယွၼ်ႉပၢင်တိုၵ်း မိူဝ်ႈၶမ်ႈဝႃး တီႈ 105 လၵ်း ၸႄႈဝဵင်းမူႇၸေႊၼႆႉသေ မၢၵ်ႇလူင် တူၵ်းသႂ်ႇႁိူၼ်းယေးၵူၼ်းဝၢၼ်ႈ၊ ရူတ်ႉၵႃး တၢင်ႇၵုၼ်ႇ၊ ဢွင်ႈတီႈၵဵၵ်ႉၵူတ်ႇထတ်းရူတ်ႉၵႃးၶဝ်ႈဢွၵ်ႇလႅၼ်လိၼ်တႆး – ၶႄႇလႄႈ ႁွင်ႈၶၢတ်ႈ(ႁွင်ႈသဝ်း) ၸိူဝ်းၼႆႉ လူႉၵွႆ ၸွမ်းတင်းၼမ် ၼႆယဝ်ႉ။