ပၢင်တိုၵ်း တီႈဝဵင်းပၢင်ႇသၢႆး တုမ်ႉတိူဝ်ႉႁိူၼ်းယေး ၵူၼ်းဝၢၼ်ႈလူႉၵွႆ ဢမ်ႇယွမ်း 30 လင် တိူဝ်ႉပႃးဝတ်ႉမုၼ်ၸဝ်ႈၸလွပ်ႈ ၸိူဝ်း ၼႆႉ လူႉၵွႆၸွမ်းထႅင်ႈလၢႆလင်။

တႄႇဢဝ် ဝၼ်းတီႈ 30/10/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပိုတ်းယိုဝ်းၵၼ် ၼႂ်းဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မႃးႁၢဝ်ႈႁႅင်း မၢၵ်ႇ လူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈ တီႈပွၵ်ႉ 3 တင်းမူတ်း 6 လင်၊ ပွၵ်ႉ 4 သမ်ႉ 10 လင်လႄႈ ပွၵ်ႉ 6 တင်းမူတ်း 6 လင် တီႈဝၢၼ်ႈမႂ်ႇသမ်ႉ 12 လင် ၼႆယဝ်ႉ။

ႁိူၼ်းယေး ၵူၼ်းဝၢၼ်ႈ ပွၵ်ႉ 3 တီႈဝဵင်းပၢင်ႇသၢႆး ဢၼ်ၺႃးၸၢၵ်ႇမၢၵ်ႇ တူၵ်းသႂ်ႇသေလူႉၵွႆၵႂႃႇၼၼ်ႉသမ်ႉ မိူၼ်ၼင်ႇ ႁိူၼ်း လုင်းသႅင်သႂ် – ပႃႈမၢၼ်ႈပွၵ်ႉ၊ ၸၢႆးတၢၼ်းဢွင်ႇ – ၼၢင်းဢေယုင်ႉ၊ ပႃႈမျႃႉ၊ ပႃႈသႅင်သူဝ်း၊ ၸၢႆးဢၢႆႈဢွင်ႇ – ၼၢင်းဢေသိုင်ႇ လႄႈ ၸၢႆးဢႅၼ်  ၸိူဝ်းၼႆႉ။

တီႈပွၵ်ႉ 4 သမ်ႉ ပဵၼ်ႁိူၼ်း ၸၢႆးလၢဝ်ငိုၼ်းထုၼ်းတိၼ်ႇ၊ ၶိင်းမူဝ်ႁိူင်းသၢင်ႇမႅတ်ႈဢွင်ႇ၊ ၸၢႆးသၢင်ႇလူႇ – ဢႃးလိၼ်ႉ၊ ပႃႈၵျႃႇ၊ လုင်းသြႃႇပူႉ၊ လုင်းလၢဝ်သႅင် – ပႃႈထေးယူင်ႇ၊ ၸၢႆးဢၢႆႈမၢဝ်း၊ သႅင်ႇလၢင်ႉၵႃး ၸၢႆႈဢၢႆႈလၢဝ်၊ ပႃႈၸၢမ်ႇမႆ၊ ၽူႈလၢဝ်းသၢၼ်ႊ (ၸၢဝ်းၶႄႇ) ၸိူဝ်းၼႆႉ။

တီႈပွၵ်ႉ 6 သမ်ႉ ႁိူၼ်းလုင်းငူဝ်ႉ – ပႃႈၸိင်ႇဢူႉ ၸၢၵ်ႇမၢၵ်ႇတိူဝ်ႉၺႃး လုင်ႈငူဝ်ႉ လႆႈၶိုၼ်ႈႁူင်းယႃတီႈဝဵင်းမူႇၸေႊဝႆႉ။ ႁိူၼ်းၸၢႆး လၢဝ် – ၼၢင်းၸိင်ႇပုၼ်ႉ၊ ၸၢႆးဝုၼ်းဢေး – ၼၢင်းၼူၼ်းသိၼ်ႇ၊ ပႃႈယဵၼ်ႇ၊ ႁွင်ႈယႃ (သႅင်ႇသေးၶၢၼ်း) ဢႃးယႅၼ်ႇၸေး၊ ႁိူၼ်းၸၢႆးဢၢႆႈပီး ၸၢၵ်ႇမၢၵ်ႇတိူဝ်ႉၺႃး ၸၢႆးဢၢႆႈပီး လႆႈသူင်ႇယူတ်းယႃတူဝ်ဝႆႉ တီႈဝၼ်းတဵင်ႈ ၾင်ႇမိူင်းၶႄႇ။

တီႈဝၢၼ်ႈမႂ်ႇသမ်ႉ မၢၵ်ႇလူင် တူၵ်းသႂ်ႇႁိူၼ်း လုင်းသၢမ်မွင်ႇ၊ ၸၢႆးဢၢႆႈပဝ်း၊ လုင်ႈယီႈ – ပႃႈသူၺ်ႇ၊ ၼၢႆးၵျွင်းၶမ်း ဢွင်ႇၼူၼ်း၊ ၼၢႆးမၢၼ်ႇႁိူင်း၊ လုင်းပဝ်း – ပႃႈပဝ်း၊ လုင်းဢၢႆႈဢွင်ႇ – ပႃႈသူဝ်းဝႃႇ၊ လုင်းယီႈ – ပႃႈမႆၶမ်း၊ ၸၢႆးယီႈထွၼ်းလႅင်ႇ၊ ၶိင်းလၢဝ်းဝူး – ၼၢႆးယႃႈၸၢမ်ႇ၊ ၼၢႆးယႃႈယေႈ ၸိူဝ်းၼႆႉ။ ဝတ်ႉ/ ၵျွင်းၽြႃး ၸလွပ်ႈ ၶိင်း/ ၼၢႆးလႄႈ ၼႃႈမိုဝ်ႉၵူၼ်းၼုမ်ႇ တီႈၼႂ်းဝၢၼ်ႈမႂ်ႇ ၸိူဝ်း ၼႆႉ။  

ဝၼ်းတီႈ 20/11/2023 ယၢမ်းၵၢင်ၼႂ် 10 မူင်း သိုၵ်းၵဝ်းၵၢင်ႉ ဢဝ်တရူၼ်းလႄႈ ႁႅင်းသိုၵ်းလေႃႇတိုၵ်း သိုၵ်းမၢၼ်ႈ တီႈ ဝၢၼ်ႈၵဵင်းယၢင်းလွႆႊ၊ ၵဵင်းယၢင်းတူင်ႊ၊ ဝၢၼ်ႈလွၼ်ႊဢိၼ်ႇလႄႈ ဝတ်ႉမုၼ်ၸဝ်ႈ ၸိူဝ်းၼႆႉ လူႉၵွႆၼမ်။

ႁိူၼ်းၵူၼ်းဝၢၼ်ႈ ဢၼ်ၺႃးၸၢၵ်ႇမၢၵ်ႇတူၵ်းသႂ်ႇၼႆႉသမ်ႉ ယွၼ်ႉသိုၵ်းမၢၼ်ႈ မူၵ်ႈသွၼ်ႈယူႇၸွမ်းၼႂ်းႁိူၼ်းယေးလႄႈ ထုၵ်ႇ သိုၵ်းၵဝ်းၵၢင်ႉ ဢဝ်တရူၼ်းမႃးပွႆႇမၢၵ်ႇသႂ်ႇ – ၵူၼ်းပိုၼ်ႉတီႈ ဝဵင်းပၢင်ႇသၢႆးလၢတ်ႈ။

ယဝ်ႉၵေႃႈ မၢၵ်ႇတရူၼ်း ဢၼ်တူၵ်းသႂ်ႇထႅင်ႈ တီႈဝၢင်းဝႆႉၵႃး တၢင်ႇၶူဝ်းၵုၼ်ႇ တီႈဝၢၼ်ႈၵွင်းၶၢင် ႁိမ်းသဵၼ်ႈတၢင်းလူင်သျိၼ်ႊ သၢၼ်ႊၵျေႃႇ (သၢမ်ၸဵင်ႇၶမ်း) ၸႄႈဝဵင်းမူႇၸေႊၼၼ်ႉ ထုၵ်ႇၾႆးမႆႈ ၵႃးတၢင်ႇၵုၼ်ႇ 12 လေႃးတင်း 22 လေႃႉ လူႉသုမ်း ဢမ်ႇယွမ်း 100 လမ်း ၼႆယဝ်ႉ။