ပၢင်တိုၵ်း တီႈဝဵင်းလၢဝ်ႇၵၢႆး ပဵၼ်ႁၢဝ်ႈႁႅင်းထႅင်ႈ မၢၵ်ႇလူင်တူၵ်းသႂ်ႇႁိူၼ်းယေး ၵူၼ်းဝၢၼ်ႈလူႉၵွႆ မွၵ်ႈ 40 လင် ဝႃႈၼႆ။
ၵၢင်လိူၼ်ၼူဝ်ႊဝႅမ်ႊပိူဝ်ႊ 2023 ၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် တီႈဝဵင်း လၢဝ်ႇၵၢႆး ၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းၵဝ်ႈၵၢင်ႉ ၼႂ်းၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇထႅင်ႈ ႁၢဝ်ႈႁႅင်းမၢၵ်ႇ လူင် တူၵ်းသႂ်ႇႁိူၼ်းယေးၵူၼ်းဝၢၼ်ႈပႃႇသိင်ႇၵျေႃႇ တၢင်းဢွၵ်ႇဝဵင်း လူႉၵွႆမွၵ်ႈ 40 လင် ၼႆယဝ်ႉ။
ၵူၼ်းပိုၼ်ႉတီႈ ဝဵင်းလၢဝ်ႇၵၢႆးလၢတ်ႈၽူႈတွႆႇႁွၵ်ႈဝႃႈ – “ယွၼ်ႉပဵၼ်ပၢင်တိုၵ်း သိုၵ်းမၢၼ်ႈတင်း သိုၵ်းၵဝ်ႈၵၢင်ႉသေ မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈပႃႇသိင်ႇၵျေႃႇ ဢၼ်မီးဝႆႉတၢင်းဢွၵ်ႇဝဵင်းလၢဝ်ႇၵၢႆးၼၼ်ႉ လူႉၵွႆၵူၼ်ႇပင်းပႅတ်ႈ မွၵ်ႈ 40 လင် ၼႆႉ။ ဝၢၼ်ႈၼႆႉသမ်ႉ ယူႇၸွမ်းႁိမ်းသဵၼ်ႈတၢင်းဝႆႉလႄႈ ၸဵမ်ရူတ်ႉၵႃး၊ ရူတ်ႉၶိူင်ႈ ၵူၼ်းမိူင်းၸိူဝ်းၼႆႉ ပႅတ်ႈမၢၵ်ႇမိူဝ်ႇပဵၼ်ၵွင်ဝႆႉ ၸွမ်းၶၢင်ႈတၢင်း ၸိူင်ႉၼႆႉ တင်းၼမ်ၶႃႈ ၵူၼ်းဝၢၼ်ႈတႄႉ ဢွၼ်ၵၼ်ပၢႆႈၽေးဝႆႉမူတ်းယဝ်ႉ”- ဝႃႈၼႆ။
ဝၢၼ်ႈပႃႇသိင်ႇၵျေႃႇၼႆႉ မီးဝႆႉတၢင်းဢွၵ်ႇဝဵင်းလၢဝ်ႇၵၢႆး ယဝ်ႉၵေႃႈ တီႈဝၢၼ်ႈၼၼ်ႉ ပဵၼ်ၸၢဝ်းၵဝ်ႈၵၢင်ႉ ယူႇသဝ်းဝႆႉ ဝႃႈၼႆ။
မိူဝ်ႈဝၼ်းတီႈ 22/11/2023 ယၢမ်းၵၢင်ၼႂ် မၢၵ်ႇတႅၵ်ႇ တၢင်းဢွၵ်ႇဝဵင်းလၢဝ်ႇၵၢႆး တႅၵ်ႇတိူဝ်ႉသႂ်ႇ ၵူၼ်းပၢႆႈၽေးသိုၵ်း မိူဝ်ႈၽွင်း ၶီႇၵႃး တေပွၵ်ႈၶိုၼ်းႁိူၼ်းၽႂ်မၼ်းၼၼ်ႉ လူႉတၢႆ 14 ၵေႃႉ ဝႃႈၼႆ။
ဢိင်ၼိူဝ် လွင်ႈၼႆႉ ယူႇတီႈ သိုဝ်ႉၶၢဝ်ႇ The Kokang တႅမ်ႈတၢင်ႇဝႆႉဝႃႈ ပဵၼ်မၢၵ်ႇလူင် သိုၵ်းမၢၼ်ႈ ယိုဝ်းမႃးတူၵ်းသႂ်ႇ။ တၢင်း ၾၢႆႇတပ်ႉသိုၵ်းမၢၼ်ႈၵေႃႈ တွပ်ႇလၢတ်ႈၶိုၼ်း တီႈၽိုၼ်ၶၢဝ်ႇ မျၢၼ်ႇမဢႃႈလိၼ်းၼၼ်ႉဝႃႈ ဢၼ်ယူႇတီႈ ၽူႈၶၢၼ်ပၢၵ်ႇ MNDAA ဝႃႈ ပဵၼ်မၢၵ်ႇသိုၵ်းမၢၼ်ႈၼႆၼၼ်ႉ ဢမ်ႇၸႂ်ႈပဵၼ်ၶေႃႈမုလ်းတႄႉ ၾၢႆႇၸုမ်းယိပ်းၵွင်ႈၵၢင်ႇၶဝ် ႁဵတ်းႁႂ်ႈၵူၼ်းမိူင်း ထၢင်ႇၽိတ်းၼိူဝ်တပ်ႉသိုၵ်းမၢၼ်ႈၵူၺ်း ယွၼ်ႉၼၼ် မၢၵ်ႇလူင်ဢၼ်တူၵ်းသႂ်ႇၵူၼ်းမိူင်းလူႉတၢႆၼႆႉ ပဵၼ်မၢၵ်ႇၸုမ်းဢူၺ်းလီ ၶဝ် ဢၢၼ်းယိုဝ်းသႂ်ႇတပ်ႉသိုၵ်းမၢၼ်ႈသေ တူၵ်းတိူဝ်ႉသႂ်ႇရူတ်ႉၵႃး ၵူၼ်းမိူင်းၵူၺ်း ဝႃႈၼႆ။
