မၢၵ်ႇလူင် တူၵ်းသႂ်ႇ ႁိူၼ်းၵူၼ်းဝၢၼ်ႈသေ တႅၵ်ႇတိူဝ်ႉသႂ်ႇ ၵူၼ်းထဝ်ႈလူႉတၢႆထင်တီႈ 1 မၢတ်ႇၸဵပ်း 2 ၵေႃႉ ၵူၼ်းပိုၼ်ႉတီႈ ဝဵင်းသႅၼ်ဝီလၢတ်ႈ။
ဝၼ်းတီႈ 21/11/2023 ယၢမ်းၵၢင်ဝၼ်း မၢၵ်ႇလူင် တူၵ်းသႂ်ႇၼႂ်းဝၢၼ်ႈၼမ်ႉတူၼ်ႈၸူင် ဢိူင်ႇၼမ်ႉၸလၢပ်ႈ ၸႄႈဝဵင်းသႅၼ် ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇ ထဝ်ႈၸၢႆး ဢႃယု 70 ပၢႆ ၵေႃႉၼိုင်ႈ လူႉတၢႆထင်တီႈၵိုၵ်းႁိူၼ်း ၼႆ ယဝ်ႉ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၸုမ်းလႂ်ယိုဝ်းမႃးတႄႉ ဢမ်ႇႁူႉ တူၵ်းသႂ်ႇႁိူၼ်းၵူၼ်းဝၢၼ်ႈ ၼမ်ႉတူၼ်ႈၸူင်သေ ၸၢၵ်ႇမၢၵ်ႇတိူဝ်ႉသႂ်ႇ ထဝ်ႈၸၢႆး ဢႃယု 70 ပၢႆ လူႉတၢႆထင်တီႈၼႂ်းႁိူၼ်း ယဝ်ႉၵေႃႈ တိူဝ်ႉသႂ်ႇပႃးထႅင်ႈၵူၼ်း ဝၢၼ်ႈ 2 ၵေႃႉ။ တီႈဝၢၼ်ႈၼမ်ႉတူၼ်ႈၸူင်ၼႆႉ ၵူၼ်းဝၢၼ်ႈပၢႆႈၽေးသိုၵ်းဝႆႉမူတ်းယဝ်ႉ။ ဢၼ်မၢၵ်ႇတူၵ်းသႂ်ႇၼၼ်ႉ ပဵၼ်ၵူၼ်းပႂ်ႉ ႁိူၼ်းယေး ဝႆႉၶႃႈဢေႃႈ။ ႁၢၼ်ႉတေႃႇထိုင်မိူဝ်ႈဝႃး ဝၼ်းတီႈ 21 ယၢမ်းၵၢင်ၼႂ်ၼႆႉ ပႆႇမီးၽႂ်ႁတ်းၵႂႃႇဢဝ် ၶၢပ်ႈတူဝ်တၢႆ ထဝ်ႈၸၢႆး ၼၼ်ႉ ဢွၵ်ႇမႃးၶႃႈ”- ဝႃႈၼႆ။
ယၢမ်းလဵဝ် ၵူၼ်းမၢတ်ႇၸဵပ်း 2 ၵေႃႉ တီႈဝၢၼ်ႈၼမ်ႉတူၼ်ႈၸူင်ၼႆႉ လႆႈပၢႆႈဢွၵ်ႇမႃးသွၼ်ႈဝႆႉ တၢင်းဢိူင်ႇၵုၼ်ၵွၵ်ႇ ၼႆႉယဝ်ႉ။ ၵၢင်လိူၼ်ၼႆႉ မၢၵ်ႇလူင်တူၵ်းသႂ်ႇ ၼႂ်းဝၢၼ်ႈၵွင်းၵေႃႇ 5 လုၵ်ႈ။ ၼႂ်းၼၼ်ႉ တႅၵ်ႇ 1 လုၵ်ႈ ဢမ်ႇတႅၵ်ႇ 4 လုၵ်ႈ ၵူၼ်းဝဵင်းသႅၼ်ဝီလၢတ်ႈ။
မိူဝ်ႈဝၼ်းတီႈ 12/11/2023 ယၢမ်းၵၢင်ဝၼ်း မၢၵ်ႇလူင် လုၵ်ႈၼိုင်ႈ တူၵ်းသႂ်ႇႁိူၼ်းၵူၼ်းဝၢၼ်ႈ လင်ၼိုင်ႈ တီႈဝၢၼ်ႈပူၵ်ႇ ဢိူင်ႇၼမ်ႉၸလၢပ်ႈၼႆႉ တႅၵ်ႇတိူဝ်ႉသႂ်ႇ ထဝ်ႈယိင်းလူႉတၢႆထင်တီႈ ၵေႃႉၼိုင်ႈလႄႈ မၢတ်ႇၸဵပ်းၸွမ်း ထႅင်ႈ 2 ၵေႃႉ။
ၸွမ်းၼင်ႇ ၽႅၼ်ၵၢၼ် 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း ႁႅၼ်းသိုၵ်းလေႃႇတိုၵ်း သိုၵ်းမၢၼ်ႈမႃးႁၢဝ်ႈႁႅင်းသေ တီႈ ၸႄႈဝဵင်းသႅၼ်ဝီၼႆႉ ၸုမ်းဢူၺ်းလီ 3 ၸုမ်း လေႃႇတိုၵ်း တီႈတပ်ႉၸၵၶ 16 မႃးႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် ပႆႇ ယိုတ်းလႆႈ။ ယဝ်ႉၵေႃႈ တီႈတပ်ႉသိုၵ်းမၢၼ်ႈ ဢိူင်ႇၼမ်ႉၸလၢပ်ႈၼႆႉၵေႃႈ ပႆႇယိုတ်းလႆႈ။
ႁဵတ်းႁႂ်ႈၵူၼ်းဝၢၼ်ႈ ၼႂ်းဢိူင်ႇၼမ်ႉၸလၢပ်ႈ မိူၼ်ၼင်ႇ ဝၢၼ်ႈတၢင်ႉသေႃႇ၊ ၼမ်ႉၸလၢပ်ႈ၊ ဝၢၼ်ႈၵွင်း၊ မိူင်းပွၼ်းတႆး၊ မိူင်းပွၼ်းႁူၺ်ႈ၊ ၵွင်းၵေႃႇ၊ ၼမ်ႉတူၼ်ႈၸူင် ၸိူဝ်းၼႆႉ ဢွၼ်ၵၼ်ပၢႆႈၽေးမႃးသွၼ်ႈဝႆႉ တၢင်းဢိူင်ႇၵုၼ်ၵွၵ်ႇ၊ ၸေႈဢူလႄႈ ၼႂ်းဝဵင်းၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ