ၽွင်းပၢင်တိုၵ်းၼၼ်ႈမေႃးၼႂ်းၸိုင်ႈတႆးပွတ်းႁွင်ႇလႄႈလႅၼ်လိၼ်တႆး – ယၢင်းလႅင်ၼၼ်ႉ သိုၵ်းမၢၼ်ႈတဵၵ်းသင်ႇႁႂ်ႈၵူၼ်းမိူင်းဝဵင်းတူၼ်ႈတီးႁဵတ်းပွႆးႁူင်းၾႆးမိၼ် ႁႂ်ႈၵိုၼ်းၶွၼ်ႈ။ ၵူၺ်းၵႃႈတီႈဝဵင်းပၢင်ႇဢူႈလူင်တႄႉ ပွႆးလိူၼ်သိပ်းသွင်ဢၼ်ၸတ်းႁဵတ်းတီႈၽြႃးလူမ်ႉ မႃးၵူႈပီပီၼၼ်ႉ ပီၼႆႉဢိင်ၼိူဝ်လွင်ႈႁူမ်ႇလူမ်ႈသေ ဢမ်ႇၸတ်းႁဵတ်းယဝ်ႉဝႃႈၼႆ။

လွင်ႈၼႆႉယူႇတီႈၵေႃးပၵ ၽူႈၸတ်းပွင်ၵၢၼ်ပဵၼ်ပၢင်ပွႆး ဢိၵ်ႇပႃးပေႃႈၾႃႉမႄႈမိူင်းဝဵင်းပၢင်ႇဢူႈဢုပ်ႇၵုမ်ၵၼ်တႅပ်းတတ်းသေ ပိုၼ်ၽၢဝ်ႇၼႂ်းဝၼ်းတီႈ 20/11/2023 ဝႃႈ ဢမ်ႇပဵၼ်ၸတ်းပွႆးယဝ်ႉ။

ၵူၼ်းမိူင်းဝဵင်းပၢင်ႇဢူႈလၢတ်ႈဝႃႈ -“ ပွႆးၼႆႉဢၢၼ်းၸတ်းၼႂ်းဝၼ်းတီႈ 24 ထိုင် 28 ၼူဝ်ႇဝႅမ်ႇပိူဝ်ႇ။ ႁၢင်ႈႁႅၼ်းယဝ်ႉမူတ်းယဝ်ႉ တေမီးပွႆးႁွင်ႉၵႂၢမ်း၊ ပွႆးၶၢႆၵၢတ်ႇ ပွႆးပွႆႇႁူင်းၾႆးမိၼ် ၸိူဝ်းၼႆႉ။ လႆႈငိၼ်းဝႃႈ ဝၼ်းတီႈ 20 ယၢမ်းၵၢင်ၼႂ် သိုၵ်းမၢၼ်ႈၼေႇပျီႇတေႃႇၸီႉသင်ႇမႃး ဢမ်ႇႁႂ်ႈႁဵတ်းပွႆးယဝ်ႉၼႆလႄႈ ၶပ်ႉမၢႆပွႆးလႆႈၵိုတ်းပႅတ်ႈမူတ်း ”- ဝႃႈၼႆ။

ဢိင်ၼိူဝ်ၽႅၼ်ၵၢၼ်သိုၵ်း 1027 သေ ၸုမ်းဢူၺ်းလီပွတ်းႁွင်ႇ 3 ၸုမ်း လႄႈ PDF ပိုတ်းယိုဝ်းသိုၵ်းမၢၼ်ႈမႃးၶၢဝ်းတၢင်း 20 ဝၼ်းပၢႆ ။ ပၢင်တိုၵ်းၼႆႉလုၵ်ႉလႅၼ်လိၼ်တႆး-ၶႄႇ သေလၢမ်းလူင်းမႃးထိုင် ဝဵင်းၼွင်ၶဵဝ်ယဝ်ႉ။ ၵူၼ်းမိူင်းဝဵင်းၼွင်ၶဵဝ် ပၢႆႈၽေးသိုၵ်းလူင်းမႃးထိုင်ဝဵင်းပၢင်ႇဢူႈလူင် ဢမ်ႇယွမ်း 400-500။ သိုၵ်းမၢၼ်ႈၸင်ႇႁႃလိုပ်ႈၵူၼ်းဝၢၼ်ႈၸိူဝ်းၼၼ်ႉပွၵ်ႈမိူဝ်းၶိုၼ်းမိူဝ်ႈဝူင်ႈပူၼ်ႉမႃးၼႆႉၵူၺ်း။

“တလဵဝ်သိုၵ်းမၢၼ်ႈဢဝ်ႁူမ်ႇလူမ်ႈဝႆႉၼႅၼ်ႈၼႃ တီႈဝဵင်းပၢင်ႇဢူႈလူင်ၼႆႉ။ ပၢင်တိုၵ်းၵေႃႈ လၢမ်းလူင်းမႃးၸမ်ၼႃႇယဝ်ႉလႄႈ ၶဝ်ၵေႃႈၵူဝ်သဵင်ၵွင်ႈတႅၵ်ႇၼႂ်းဝဵင်းပၢင်ႇဢူႈၼင်ႇၵဝ်ႇၵႂႃႈ ၵွပ်ႈၼႆၶဝ်ၸင်ႇသင်ႇႁၢမ်ႈႁဵတ်းပွႆးၼၼ်ႉၼႃႇ”- ၵူၼ်းၼုမ်ႇဝဵင်းပၢင်ႇဢူႈၵေႃႉၼိုင်ႈၵေႃႈလၢတ်ႈၼင်ႇၼႆ။

တီႈဝဵင်းပၢင်ႇဢူႈလူင်ၼႆႉၸတ်းႁဵတ်းပွႆးမူၼ်ႈသိူဝ်း ပွႆးလိူၼ်သိပ်းသွင်မႃးၵူႈပီ ႁိုင်မႃးၶၢဝ်းတၢင်း 17 ပီယဝ်ႉ။

တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းတႄႉ သိုၵ်းမၢၼ်ႈႁၢမ်ႈၵူၼ်းပၢႆႈၽေးသိုၵ်းမိူင်းယၢင်းလႅင်ၶဝ်ႈၼႂ်းဝဵင်းတူၼ်ႈတီးသေ တဵၵ်းသင်ႇႁႂ်ႈၵူၼ်းမိူင်းၸတ်းပွႆးႁူင်းၾႆးမိၼ်။ ပိုတ်ႇပၢင်ပွႆးၵႂႃႇမိူဝ်ႈဝၼ်းတီႈ 21 /11/2023 တေၸတ်းပွႆးထိုင်ဝၼ်းတီႈ 28/11/2023 ဝႃႈၼႆ။