မိူဝ်ႈၼႆႉ ဝၼ်းတီႈ 23/11/2023 ယၢမ်းၵၢင်ၼႂ်မွၵ်ႈ 9 မူင်း မၢၵ်ႇလူင် တူၵ်းသႂ်ႇၵႃးတၢင်ႇၵုၼ်ႇ ဢွင်ႈတီႈၵိုတ်းၵႃး (7 ၶႂႃႇ ၵျိၼ်း) တီႈဝၢၼ်ႈၵွင်းၶၢင် ႁိမ်းသဵၼ်ႈတၢင်းလူင်သၢမ်ၸဵင်ႇၶမ်း (သျိၼ်ႊသၢၼ်ႊၵျေႃႉ) ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၵႃးလူင်တၢင်ႇၵုၼ်ႇ ဢၼ်ထုၵ်ႇၾႆးမႆႈၵႂႃႇၼၼ်ႉ ဢမ်ႇယွမ်း 10 လမ်း ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မၢင်ၸိူဝ်းၵေႃႈဝႃႈ ပဵၼ်တရူၼ်းမႃးပွႆႇမၢၵ်ႇသႂ်ႇ၊ မၢင်ၸိူဝ်းဝႃႈ ပဵၼ် မၢၵ်လူင်ယိုဝ်းမႃး တူၵ်းသႂ်ႇၼႆၶႃႈဝႃႈ။ ၵႃးလူင်တၢင်ႇၵုၼ်ႇ ဢၼ်ထုၵ်ႇၾႆးမႆႈၵႂႃႇၼၼ်ႉ ပဵၼ်ၵႃး 12 လေႃႉတင်း 22 လေႃႉ ၸိူဝ်းၼႆႉဢေႃႈ။ တင်းမူတ်းမႆႈၵႂႃႇ ဢမ်ႇယွမ်း 10 လမ်းၶႃႈ။ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး”- ဝႃႈၼႆ။

ၵႃးလူင်တၢင်ႇၵုၼ်ႇ ဢၼ်ထုၵ်ႇၾႆးမႆႈၵႂႃႇၼၼ်ႉ ပဵၼ်ၵႃးတေႃႉတၢင်ႇၶူဝ်းၵုၼ်ႇ ဢၼ်လုၵ်ႉတၢင်းမိူင်းၶႄႇ ၶဝ်ႈမႃးတၢင်းမိူင်း တႆးၼႆႉသေ သူင်ႇၸူးတၢင်းဝဵင်းလိူဝ်ႇ (မၼ်းတလေး) ၸိူဝ်းၼၼ်ႉ ဝႃႈၼႆ။

“ယၢမ်းလဵဝ် တိုၵ်ႉပဵၼ်ၽွင်းသုၵ်ႉယူႇလႄႈ လွင်ႈလူႉသုမ်း တင်းမူတ်းမီးၵႃႈႁိုဝ်တႄႉ ပႆႇႁူႉ။ ၵႃးတၢင်ႇၵုၼ်ႇ ဢၼ်ၵိုတ်းဝႆႉ တီႈ သျိၼ်ႊသျၢၼ်ႊၵျေႃႉၼႆႉ ၶဝ်ပႂ်ႉဢဝ်ဝႂ်လူင်ႈၼႃႈ (ၸူႇတီႇ) တီႈ 105 လၵ်းဝႆႉ။ သင်ဝႃႈ တီႈ 105 လၵ်းၼႆႉ ပၼ် ၶႂၢင်ႉယဝ်ႉ ၵႃး တၢင်ႇၵုၼ်ႇၸိူဝ်းၼႆႉ ၸင်ႇတေလႆႈတေႃႉၶူဝ်းၵုၼ်ႇၼၼ်ႉ သူင်ႇၸူးတၢင်းဝဵင်းလိူဝ်ႇၼၼ်ႉၶႃႈဢေႃႈ”- ၵူၼ်းပိုၼ်ႉတီႈ ဝဵင်းမူႇ ၸေႊ သိုပ်ႇလၢတ်ႈၼႄၼင်ႇၼႆ။

မိူဝ်ႈၽွင်းၾႆးမႆႈ ၵႃးလူင်တၢင်ႇၵုၼ်ႇၼႆႉ ယူႇတီႈ ၾၢႆႇၶႄၾႆး ဝဵင်းပၢင်ႇသၢႆး လႆႈဢဝ်ၵႃးမႃးႁူတ်းၸွႆႈၶႄ။ ၵူၺ်းၵႃႈ ၵႃး ၶႄၾႆး တၢင်းဝဵင်းမူႇၸေႊတႄႉ ဢမ်ႇမႃး – ၵူၼ်းပိုၼ်ႉတီႈလၢတ်ႈ။

မိူဝ်ႈဝႃး ဝၼ်းတီႈ 22/11/2023 ယၢမ်းၵၢင်ဝၼ်း 11:49 မူင်းၼႆႉၵေႃႈ မီးတရူၼ်း မႃးပွႆႇမၢၵ်ႇသႂ်ႇ တီႈဝတ်ႉၸေႇယ မင်ႇၵလႃႇ တီႈဝၢၼ်ႈၼမ်ႉႁွႆတႂ်ႈ (အောက်နမ့်ဟွယ်ကျေးရွာ) မိူင်းယူႉ 105 လၵ်း ၸႄႈဝဵင်းမူႇၸေႊသေ တႅၵ်ႇတိူဝ်ႉသႂ်ႇ သင် ၶၸဝ်ႈ တူၼ်ၼိုင်ႈ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ရူတ်ႉၵႃး ၼႂ်းဝတ်ႉထႅင်ႈလၢႆလမ်းလႄႈ ၸလွပ်ႈထႅင်ႈ 3 လင်။

ယဝ်ႉၵေႃႈ ၼႂ်းဝၼ်းတီႈ 22/11/2023 ၼႆႉ သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်းၵၼ်ႁၢဝ်ႈႁႅင်း တီႈဝၢၼ်ႈလွၼ်ႊဢိၼ်ႇ ဝဵင်းပၢင်ႇသၢႆးသေ မၢၵ်ႇလူင်တူၵ်းသႂ်ႇ တီႈဝတ်ႉမုၼ်ၸဝ်ႈလႄႈ ဢွင်ႈႁုင်မိုဝ်ႉ ၸိူဝ်းၼႆႉ လူႉၵွႆထႅင်ႈတင်းၼမ်။