ပၢင်တိုၵ်း တီႈဢိူင်ႇမိူင်းၵႅတ်ႈ ဝဵင်းလႃႈသဵဝ်ႈ ပဵၼ်ႁႅင်းထႅင်ႈ

ၸုမ်းဢူၺ်းလီပွတ်းႁွင်ႇ 3 ၸုမ်း လေႃႇတိုၵ်း သိုၵ်းမၢၼ်ႈ တီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ႁၢဝ်ႈႁႅင်းထႅင်ႈ ၾၢႆႇသိုၵ်း မၢၼ်ႈ ၸႂ်ႉၶိူင်ႈမိၼ်ယိုဝ်းၸွႆႈ။

တႄႇဢဝ် ဝၼ်းတီႈ 20/11/2023 ၼႆႉမႃး ၸုမ်းဢူၺ်းလီ ပွတ်းႁွင်ႇ 3 ၸုမ်း မိူၼ်ၼင်ႇ သိုၵ်းၵဝ်ႈၵၢင်ႉ၊ သိုၵ်းရၶႅင်ႇလႄႈ သိုၵ်းတဢၢင်း ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ တီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၾၢႆႇသိုၵ်း မၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇယိုဝ်းၸွႆႈ ဢမ်ႇယွမ်း 3 ပွၵ်ႈယဝ်ႉ။  

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈဢိူင်ႇမိူင်းၵႅတ်ႈၼႆႉ သိုၵ်းမၢၼ်ႈတင်း ၸုမ်းဢူၺ်းလီ သိုပ်ႇပဵၼ် ပၢင်တိုၵ်းၵၼ်ထႅင်ႈ ႁၢဝ်ႈႁႅင်း။ တင်ႈတႄႇဝၼ်းတီႈ 20 ယၢမ်းဝၢႆးဝၼ်း 1 မူင်းၼၼ်ႉမႃး မိူဝ်ႈဝႃး ဝၼ်းတီႈ 21 ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇၵႂႃႇ 3 ပွၵ်ႈ။ ပွၵ်ႈၼိုင်ႈ ၶဝ်မႃးပွႆႇမၢၵ်ႇၵႂႃႇ လုၵ်ႈၼိုင်ႈ၊ ပွၵ်ႈသွင်မႃးပွႆႇထႅင်ႈ သွင်လုၵ်ႈလႄႈ ပွၵ်ႈသၢမ် သမ်ႉ ၶဝ်ယိုဝ်းၵွင်ႈၸၢၵ်ႈသႂ်ႇ ႁဵတ်းၼၼ်ၶႃႈ။ ဢၼ်ၶဝ်မႃးၵွႆႇမၢၵ်ႇ/ ယိုဝ်းသႂ်ႇၼႆႉ မၼ်းၵႆၵၼ်ၼႃႇ ၶဝ်လၢမ်းပွႆႇ ၸိူင်ႉၼၼ် ၵူၺ်း။ ႁၢၼ်ႉတေႃႇထိုင်ယၢမ်းလဵဝ် တီႈတပ်ႉမိူင်းၵႅတ်ႇၼႆႉ ၸုမ်းဢူၺ်းလီၶဝ် ပႆႇသိမ်းလႆႈ”- ဝႃႈၼႆ။

ပၢင်တိုၵ်း တီႈဢိူင်ႇမိူင်းၵႅတ်ႈၼႆႉ တႄႇမႃး မိူဝ်ႈဝၼ်းတီႈ 27/10/2023 ယၢမ်းၵၢင်ၼႂ် 6 မူင်းၶိုင်ႈၼၼ်ႉမႃး ႁၢၼ်ႉတေႃႇထိုင် ယၢမ်းလဵဝ် သဵင်ၵွင်ႈယင်းပႆႇယဵၼ် မိူဝ်ႈဝၼ်းတီႈ 4/11/2023 ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း 3 လမ်း မႃးပွႆႇမၢၵ်ႇသႂ်ႇ ႁၢဝ်ႈႁႅင်းထႅင်ႈ။

ယွၼ်ႉပၢင်တိုၵ်းၼႆႉသေ ႁဵတ်းႁႂ်ႈၵူၼ်းဝၢၼ်ႈၵၢတ်ႇ လင်ႁိူၼ်း 70 ပၢႆလႄႈ ဝၢၼ်ႈလူင် လင်ႁိူၼ်း 70 ပၢႆ ဢွၼ်ၵၼ်ပၢႆႈၽေး သိုၵ်းၵႂႃႇသွၼ်ႈဝႆႉ တၢင်းထုင်ႉမိူင်းယေႃဝႆႉ ႁၢၼ်ႉတေႃႇထိုင် ယၢမ်းလဵဝ် ပႆႇၸၢင်ႈပွၵ်ႈၶိုၼ်း ၼႆယဝ်ႉ။

“ၸူဝ်ႈၵူၼ်းဝၢၼ်ႈ ပၢႆႈၽေးသိုၵ်း သိုၵ်းလွႆၶဝ် ယႃႉသေႃးၽၵ်းတူႁိူၼ်းသေ ၶဝ်ႈသွၵ်ႈတဝ်ၼႂ်းႁိူၼ်းၵူၼ်းဝၢၼ်ႈ တင်းၼမ်။ ယဝ်ႉၵေႃႈ ၶဝ်ႈသွၵ်ႈတဝ် ၼႂ်းႁၢၼ်ႉၶၢႆၶူဝ်းၵုၼ်ႇ တီႈဝၢၼ်ႈၵၢတ်ႇ 6 သႅင်ႇလႄႈ ဝၢၼ်ႈလူင် 2 သႅင်ႇ။ ၶူဝ်းၼႂ်းသႅင်ႇ မိူၼ်ၼင်ႇ ၼမ်ႉမၼ်းၸၢၵ်ႈ၊ ၾူၼ်း၊ ၶိူင်ႈၸႂ်ႉတိုဝ်း ၸိူဝ်းၼႆႉ ဢဝ်ၵႂႃႇၶၢႆ တၢင်ႇတီႈသေ ဢဝ်ငိုၼ်းမႃးႁဵတ်းတိုၼ်းလၢင်းၼႂ်းသိုၵ်းၶဝ်။ ရူတ်ႉ ၶိူင်ႈၵူၼ်းမိူင်းၸိူဝ်းၼႆႉၵေႃႈ ၶဝ်ဢဝ်ၶီႇ ၼမ်ႉမၼ်းမူတ်းတီႈလႂ်ၵေႃႈ ၶဝ်ပွႆႇပႅတ်ႈတီႈၼၼ်ႈ ၸိုင်ႉၼၼ်ၵေႃႈ မီးတင်းၼမ်။ လွင်ႈၸႂ်ယႂ်ႇၶဝ် တႃႇၵႅတ်ႇၶႄပၼ်ၵူၼ်းမိူင်းတႄႉ ဢမ်ႇမီးယဝ်ႉၶႃႈ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ၼႆ။

ၸွမ်းၼင်ႇ ၽႅၼ်ၵၢၼ် 1027 ပၢင်တိုၵ်း ၸုမ်းဢူၺ်းလီ ပွတ်းႁွင်ႇ 3 ၸုမ်းၼႆႉသေ တုမ်ႉတိူဝ်ႉ ၵူၼ်းမိူင်းတီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈၼႆႉ မၢတ်ႇၸဵပ်း 1 ၵေႃႉ၊ တၢႆ 1 ၵေႃႉလႄႈ ႁၢႆတူဝ်ဝႆႉ 1 ၵေႃႉ။

“ၸူဝ်ႈၶဝ် ပဵၼ်ပၢင်တိုၵ်းၵၼ်မႃးၼႆႉ ၵူၼ်းၼႂ်းဢိူင်ႇႁဝ်းၶႃႈ ၺႃးၸၢၵ်ႇၸွမ်း 3 ၵေႃႉယဝ်ႉ။ လုင်းလူႇ ဢႃယု 65 ပီ တိူဝ်ႉၸၢၵ်ႇမၢၵ်ႇ တီႈၼႃႈဢူၵ်းလႄႈ ၶႃႈလူင် မၼ်းၸၢႆး။ ယဝ်ႉၵေႃႈ ၵူၼ်းဝၢၼ်ႈလူင် ၽူႈၸၢႆး ဢႃယု 58 ပီ ၼၼ်ႉၵေႃႈ ထုၵ်ႇ သိုၵ်းလွႆ ယိုဝ်းတၢႆ ၵေႃႉၼိုင်ႈလႄႈ လုင်းယွၼ်းမၢတ်ႈ ဢႃယုမွၵ်ႈ 58 ပီ ၼၼ်ႉၵေႃႈ ႁၢႆတူဝ်ဝႆႉ တေႃႇထိုင်ယၢမ်းလဵဝ် ပႆႇႁၼ်”- ၵူၼ်းပိုၼ်ႉတီႈ ဝဵင်းလႃႈသဵဝ်ႈလၢတ်ႈ။

ဢိူင်ႇမိူင်းၵႅတ်ႈၼႆႉ မီးဝႆႉၾၢႆႇဢွၵ်ႇထုင်ႉမိူင်းယေႃ ယၢၼ်မိူင်းယေႃ 16 လၵ်း ယဝ်ႉၵေႃႈ ယၢၼ်ဝဵင်းလႃႈသဵဝ်ႈ 30 လၵ်းပၢႆ။ မူႇ ဝၢၼ်ႈသမ်ႉ တင်းမူတ်းမီး 12 ဝၢၼ်ႈ မိူၼ်ၼင်ႇ ဝၢၼ်ႈႁူဝ်ၶၢႆး၊ ဝၢၼ်ႈပဵင်းသၢႆး၊ ဝၢၼ်ႈၼႃးပုင်ႇ၊ ဝၢၼ်ႈပဵင်းၶၢၼ်၊ ဝၢၼ်ႈႁူဝ် လႅင်း၊ ဝၢၼ်ႈၼမ်ႉလိၼ်းၶၢၼ်၊ ဝၢၼ်ႈၵၢတ်ႇ၊ ဝၢၼ်ႈလူင်၊ ဝၢၼ်ႈၵဝ်ႇ၊ ဝၢၼ်ႈၼႃးယေး၊ ဝၢၼ်ႈၼွင်ဢေႃႈလႄႈ ဝၢၼ်ႈၵုၼ်ၵႅင်း ၸိူဝ်းၼႆႉ။

ၸူဝ်ႈသိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ 3 ၸုမ်း ပဵၼ်ပၢင်တိုၵ်းၵၼ်မႃး တီႈဢိူင်ႇမိူင်းၵႅတ်ႈ ၶၢဝ်းတၢင်းၸမ်လိူၼ်ၼႆႉ ႁဵတ်းႁႂ်ႈၵူၼ်းဝၢၼ်ႈၵၢတ်ႇလႄႈ ဝၢၼ်ႈလူင် ဢွၼ်ၵၼ်ပၢႆႈၽေးသိုၵ်း ၵႂႃႇသွၼ်ႈဝႆႉတီႈ ထုင်ႉမိူင်းယေႃ။ ႁိူၼ်းယေး ၵူၼ်းဝၢၼ်ႈ ၵၢတ်ႇ 30 လင်ပၢႆ ထုၵ်ႇၾႆးမႆႈမူတ်း။ လိူဝ်ထႅင်ႈ တႃႇ 30 ပၢႆတႄႉ တိူဝ်ႉၺႃးၸၢၵ်ႇမၢၵ်ႇဝႆႉ။ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ႁိူၼ်း ၵူၼ်းဝၢၼ်ႈလူင် လူႉၵွႆထႅင်ႈ 3 လင်လႄႈ ၵျွင်းလူင် မိူင်းၵႅတ်ႈ ၸိူဝ်းၼႆႉထႅင်ႈ။