ၵေႃႈလိၵ်ႈလၢႆးၸႄႈဝဵင်းမိူင်းတူၼ် ပိုၼ်ၽၢဝ်ႇ ပီၼႆႉ တေဢမ်ႇၸတ်းပွႆးပီမႂ်ႇတႆးၵိုၼ်းၶိုၵ်ႉယဝ်ႉ။
မိူဝ်ႈဝၼ်းတီႈ 19/11/2023 ၼၼ်ႉ ၸုမ်းၵေႃလိၵ်ႈလၢႆးလႄႈ ပေႃႈမႄႈၵူၼ်းမိူင်း ၸႄႈဝဵင်းမိူင်းတူၼ် လႆႈၸတ်းပၢင်ၵုမ်ဢုပ်ႇဢူဝ်းၵၼ် တီႈဝၢၼ်ႈမႄႈၵႅၼ်း သေ တူၵ်းလူင်းၵၼ်ဝႃႈ တေဢမ်ႇၸတ်းပွႆးပီမႂ်ႇတႆးၵိုၼ်းၶိုၵ်ႉယဝ်ႉ ဝႃႈၼႆ။
ၽူႈၶဝ်ႈၸုမ်းၵေႃလိၵ်ႈလၢႆးမိူင်းတူၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ယၢမ်းလဵဝ် ငဝ်းလၢႆး ဝၢၼ်ႈမိူင်းၵေႃႈ ဢမ်ႇသုၵ်းဢမ်ႇလိပ်း၊ ယဝ်ႉၵေႃႈ တၢင်းၸိုင်ႈတႆးပွတ်းႁွင်ႇႁဝ်းၵေႃႈ ပၢင်တိုၵ်းသိုၵ်းသိူဝ် ပဵၼ်ယူႇဢမ်ႇထၢတ်ႇ။ ၵူၼ်းမိူင်းလႆႈတုၵ်ႉၶ ပဵၼ်ၼမ်ႉႁူၼမ်ႉတႃ ယွၼ်ႉၼၼ်လႄႈ တေဢမ်ႇပဵၼ်ၸတ်းယႂ်ႇယဝ်ႉၶႃႈ ” – ဝႃႈၼႆ။
ၵေႃၽႄၵေႃလိၵ်ႈလၢႆႈၸႄႈဝဵင်းမိူင်းတူၼ်ၼႆႉ လႆႈပၼ်ႇပုတ်ႈ ၸတ်းပွႆးႁပ်ႉၸဵင်မႃးလၢႆထုင်ႉလၢႆဢိူင်ႇ မိူၼ်ၼင်ႇ ဝဵင်းပုင်ႇပႃႇၶႅမ် ၊ ထုင်ႉၼႃးၵွင်းမူး ၊ ဢိူင်ႇမႄႈၵႅၼ်း လႄႈ ၼႂ်းဝဵင်းမိူင်းတူၼ်ၸဵမ်ၸိူဝ်းၼႆႉ ။ မိူဝ်ႈပီၵၢႆပူၼ်ႉမႃး ပီတႆး 2117 ၼီႈတႄႉ လႆႈၸတ်းပွႆးပီမႂ်ႇ တီႈထုင်ႉၼႃးၵွင်းမူးၵိုၼ်းၶွၼ်ႈ။ ပီၼႆႉတႄႉ ဢၢၼ်းၸတ်းတီႈ ဢိူင်ႇမႄႈၵႅၼ်း ၸႄႈဝဵင်းမိူင်းတူၼ်ဝႃႈၼႆသေတႃႉ တေပဵၼ်ၸတ်းတီႈၵႅပ်ႈမၼ်းၵူၺ်း ၼႆယဝ်ႉ။
ၽူႈၶဝ်ႈၸုမ်းၵေႃလိၵ်ႈလၢႆးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပီၼႆႉ ဢမ်ႇပဵၼ်ၸတ်းသေဢိတ်းၼႆတႄႉ ဢမ်ႇဝႃႈၼင်ႇၵဝ်ႇ တေၸတ်းလူႇၶဝ်ႈမႂ်ႇၼမ်ႉမႂ်ႇသေ တေယွၼ်းသူးပၼ်ၵူၼ်းပၢႆႈၽေးႁဝ်း ႁႂ်ႈလွတ်ႈပူၼ်ႉလွင်ႈလိူတ်ႇမႆႈ ၸိူဝ်းၼႆႉ။တေဢမ်ႇသႂ်ႇပႃး လွင်ႈၵျေႃႇလွင်ႈမူၼ်ႈ လွင်ႈၵႃႈလွင်ႈဝႅၼ်ၸိူဝ်းၼၼ်ႉ။ ယဝ်ႉၵေႃႈ တေၸတ်းပႃး ပၢင်ၶုၵ်းထူပ်း ၸဝ်ႈၶူးမေႃတႆးႁဝ်းၽွင်ႈ ဢိတ်းဢွတ်း ႁႂ်ႈၾိင်ႈယႃႇႁၢႆ ၼၼ်ႉဢေႃႈ ” – ဝႃႈၼႆ။
ပီမႂ်ႇတႆး ဢၼ်တေထူၼ်ႈထိုင် 2118 ၼီႈ ပီၼႆႉ ယွၼ်ႉငဝ်းလၢႆးဝၢၼ်ႈမိူင်း ဢမ်ႇၼိမ်သဝ်းလႄႈ လၢႆၸႄႈဝဵင်းတေ တေဢမ်ႇပဵၼ်ၸတ်းပွႆးယႂ်ႇလၢမ်းလူင် ။
မိူၼ်ၼင်ႇ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမိူင်းၼၢႆး လႄႈဝဵင်းမွၵ်ႇမႆႇ ၸိူဝ်းၼႆႉၵေႃႈ ဢွၵ်ႇလိၵ်ႈပိုၼ်ၽၢဝ်ႇဝႃႈတေဢမ်ႇႁဵတ်းပွႆးယႂ်ႇလၢမ်းလူင်ႁပ်ႉပီမႂ်ႇတႆး 2118 ၼီႈ ၊ တေႁဵတ်းလွင်ႈလူႇတၢၼ်းသူင်ႇမဵတ်ႉတႃႇ ယွၼ်းသူးပၼ်ပီႈၼွင်ႉၼႂ်းမိူင်းတႆးပွတ်းႁွင်ႇ ၵႂႃႇၵူၺ်းယဝ်ႉဝႃႈၼႆ။
