မိူဝ်ႈၼႆႉ ဝၼ်းတီႈ 20/11/2023 ယၢမ်းၵၢင်ဝၼ်း 10 မူင်းၶိုင်ႈၼၼ်ႉ ၾႆးမႆႈႁွင်ႈထႅဝ်ႁၢၼ်ႉၶၢႆၵုၼ်ႇယွႆႈတႅဝ်းၼိုင်ႈ ၼႃႈၵၢတ်ႇၸႄႈဝဵင်းမိူင်းတူၼ်ၼၼ်ႉ လူႉယႂ်ႇသုမ်းၼမ် ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ငိၼ်းဝႃႈတႄႉ မႆႈႁၢၼ်ႉၼိူဝ်ႉၵႆႇၼၼ်ႉဢွၼ်တၢင်း။ တင်ႈၾႆးၵႅတ်ႉသ်ဝႆႉသေ လၢမ်းမႆႈၼႆဢေႃႈ။ ယဝ်ႉၵေႃႈ လုၵ်ႉတီႈႁၢၼ်ႉၼိူဝ်ႉၵႆႇၼၼ်ႉသေ လၢမ်းမႆႈပႃး ႁၢၼ်ႉမႄးရူတ်ႉၶိူင်ႈထႅင်ႈဢေႃႈ ။ ႁွင်ႈထႅဝ်းတႅဝ်းၼႆႉ တေမီးမွၵ်ႈ 5 ႁွင်ႈ မႆႈမူတ်း။သမ်ႉမီးပႃး ႁၢၼ်ႉၶၢႆၼမ်ႉမၼ်းၶိူင်ႈၸၢၵ်ႈၸိူဝ်းၼႆႉထႅင်ႈလႄႈ ၶႅၼ်းမႆႈဝႆး ” – ဝႃႈၼႆ။

တီႈႁွင်ႈထႅဝ်တႅဝ်းၼႆႉ မီးႁၢၼ်ႉၶၢႆၵုၼ်ႇလၢႆသႅၼ်း မိူၼ်ၼင်ႇ သိူဝ်ႈၶူဝ်း ၊ ၶွင်လဵၼ်ႈလုၵ်ႈဢွၼ်ႇ ၊ ၼိူဝ်ႉပႃ ၊ ႁၢၼ်ႉမႄး ရူတ်ႉၶိူင်ႈလႄႈ ႁၢၼ်ႉၶၢႆၼမ်ႉမၼ်းၸၢၵ်ႈ ၸဵမ်ၸိူဝ်းၼႆႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ႁၢၼ်ႉတီႈႁွင်ႈထႅဝ် ၸိူဝ်းၼႆႉ မီးဢၼ်မႆႈၾႆးငၢႆႈလၢႆလၢႆၼႃႇ ။ ယွၼ်ႉၼၼ်လႄႈ ပေႃးဝႃႈၾႆးမႆႈယဝ်ႉၼႆၵေႃႈ ၶႄယၢပ်ႇဢေႃႈ ။ ၸုမ်းၶႄၾႆးမိူင်းတူၼ်ၵေႃႈ တေႃႉတႄႉမီးရူတ်ႉၶႄၾႆးလမ်းလဵဝ်ၵူၺ်း။ၽိူဝ်ႇမႃးထိုင် ၾႆးပေႃးမႆႈႁႅင်းၼႃႇယဝ်ႉ ၊ ၶႄဢမ်ႇပေႉလႆႈ။  လွင်ႈလူႉသုမ်းတႄႉ  ဢမ်ႇႁူႉတႅတ်ႈတေႃး ” – ဝႃႈၼႆ။

ႁွင်ႈထႅဝ်ၶၢႆၶူဝ်းတႅဝ်းၼႆႉ  မီးတင်းၵူၼ်းၼႂ်းပိုၼ်ႉတီႈလႄႈ ၵူၼ်းတၢင်ႇတီႈသီႇလႅၼ်မႃးၶၢတ်ႈသေ ပိုတ်ႇႁၢၼ်ႉၶၢႆၶူဝ်း ။ ယွၼ်ႉၾႆးမႆႈသေ ၶိူင်ႈၶူဝ်းၸႂ်ႉသွႆႈၼႂ်းၼႃႈႁိူၼ်းလူႉသုမ်းၼမ် မိူၼ်ၼင်ႇ တူႈယဵၼ် ၊ ၶိူင်ႈၾႆးၾႃႉ လၢႆသႅၼ်း လိူဝ်ၼၼ်ႉ ရူတ်ႉၶိူင်ႈၵေႃႈ မႆႈပႃးၵႂႃႇ 2 လမ်း ၼႆယဝ်ႉ။

မိူဝ်ႈသၢမ်ပီ ပူၼ်ႉမႃးၼၼ်ႉၵေႃႈ ၾႆးမႆႉႁွင်ႈထႅဝ်ႁၢၼ်ႉၶၢႆသိူဝ်ႈၶူဝ်း ဢၼ်မီးၾၢႆႇၼိူဝ်ၼႃႈတၢင်းႁွင်ႇ ႁွင်ႈထႅဝ်ႈဢၼ်ၾႆးမႆႈမိူဝ်ႈၼႆႉၼၼ်ႉ ယဝ်ႉပွၵ်ႈၼိုင်ႈ ၼၼ်ႉၵေႃႈ ၾႆးမႆႈၶူဝ်းၶွင်ၼႂ်းႁၢၼ်ႉ တၢင်းမူတ်းဢမ်ႇတၼ်းလႆႈသင်။