ၶၢဝ်းတၢင်း 2 ဝၼ်းမႃးၼႆႉ ၵူၼ်းၼမ်ႉၶမ်း – လႃႈသဵဝ်ႈ ထုၵ်ႇယိုဝ်းတၢႆ 5 ၵေႃႉယဝ်ႉ ၽူႈတူင်ႉၼိုင် ၵၢၼ်သိုၵ်း တၢင်းပွတ်းႁွင်ႇလၢတ်ႈ။
ဝၼ်းတီႈ 19/11/2023 ယၢမ်းၵၢင်ၶမ်ႈမွၵ်ႈ 7 မူင်း ၼုမ်ႇၸၢႆး 2 ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ် လမ်းၼိုင်ႈသေ ထုၵ်ႇသိုၵ်းမၢၼ်ႈ ယိုတ်းမိူင်း ယိုဝ်းတၢႆ တီႈတၢင်းၼႃႈႁွင်ႈယႃ (တုၵ်ႉၶမႅင်ႇသေးၶၢၼ်း) ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼုမ်ႇၸၢႆး 2 ၵေႃႉၼႆႉ လုၵ်ႉတၢင်းမဵဝ်ႉမသေး (မြို့မစျေး) ၼၼ်ႉသေ ၵႂႃႇတၢင်း ပူႇတႃႇလၼ်း (ပူတာလမ်း) တၢင်းပူၼ်ႉသမ်ႉ မီးသိုၵ်းမၢၼ်ႈ ႁႄႉတၢင်းဝႆႉ တီႈၾၢႆႇၼႃႈႁွင်ႈယႃ (တုၵ်ႉၶမႅင်ႇ) ၼၼ်ႉ ၶဝ်ႁွင်ႉၼုမ်ႇၸၢႆး 2 ၵေႃႉၼၼ်ႉ ဢမ်ႇၵိုတ်းလႄႈ ၶဝ်ယိုဝ်းတၢႆပႅတ်ႈၶႃႈဢေႃႈ”- ဝႃႈၼႆ။
မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 18/11/2023 ယၢမ်းၵၢင်ၼႂ် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ယိုဝ်းၵူၼ်းမိူင်း လူႉတၢႆ 3 ၵေႃႉ တီႈဝဵင်းၼမ်ႉၶမ်း။
ၽူႈတူင်ႉၼိုင် ၵၢၼ်သိုၵ်းပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းလွႆၶဝ် ဢွၵ်ႇၶေႃႈႁၢမ်ႈၸူး ၵူၼ်းမိူင်း ၸိူဝ်းယူႇ ၼႂ်းႁိူၼ်း ယႃႇဢွၵ်ႇၼွၵ်ႈႁိူၼ်း ၸိူဝ်းယူႇ ၼွၵ်ႈဝဵင်းၵေႃႈ ယႃႇၶဝ်ႈဝဵင်းၼႆသေ ဝၢႆးၶဝ်ဢွၵ်ႇၶေႃႈႁၢမ်ႈယဝ်ႉ မီးၵူၼ်း ၶီႇရူတ်ႉၶိူင်ႈၶဝ်ႈဝဵင်း ၼမ်ႉၶမ်းမႃး ထုၵ်ႇသိုၵ်းလွႆ ယိုဝ်းတၢႆ 3 ၵေႃႉ ၼၼ်ႉတႄႉ ပဵၼ်ၸၢဝ်းၶိူဝ်းသင်တႄႉ ပႆႇႁူႉၶႃႈ။ ၶၢဝ်းတၢင်း ပၢင်တိုၵ်းမႃးၼႆႉ ၾၢႆႇသိုၵ်းလွႆၶဝ်ၵေႃႈ မီးလွင်ႈမၢတ်ႇၸဵပ်းလူႉတၢႆၼမ်မိူၼ်ၵၼ်”- ဝႃႈၼႆ။
မိူဝ်ႈဝႃး ဝၼ်းတီႈ 19/11/2023 ယၢမ်းႁူဝ်ၶမ်ႈ 6 မူင်းပၢႆ မၢၵ်ႇလူင်တူၵ်းသႂ်ႇ ၵူၼ်းဝၢၼ်ႈ ပွၵ်ႉ 4 ဝဵင်းပၢင်ႇသၢႆး လူႉတၢႆ ၵေႃႉၼိုင်ႈ ပဵၼ်ဢွၼ်ႇၸၢႆး ဢႃယု 20 ပၢႆ။ ယဝ်ႉၵေႃႈ ႁိူၼ်းၵူၼ်းဝၢၼ်ႈ လူႉၵွႆၸွမ်းထႅင်ႈ မွၵ်ႈ 3 လင်။
