မိူဝ်ႈၼႆႉ ဝၼ်းတီႈ 17/11/2023 ယၢမ်းၵၢင်ၼႂ် သိုၵ်းတဢၢင်း TNLA ပိၵ်ႉဢိုတ်းသဵၼ်ႈတၢင်းၼမ်ႉၶမ်း – မူႇၸေႊ တီႈမၢၼ်ႈ ၶမ်း – ၼွင်ၸၢင်ႉ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇထႅင်ႈ ႁဵတ်းႁႂ်ႈၵူၼ်းမိူင်းၵႂႃႇမႃး ထူပ်းတၢင်းယၢပ်ႇၽိုတ်ႇႁႅင်း။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းလွႆ ပိၵ်ႉဢိုတ်းၶႃႈဢေႃႈ ႁဵတ်းသင်လႄႈပိၵ်ႉတႄႉ ဢမ်ႇႁူႉ။ ၶဝ်ဢဝ်ႁူဝ်ႉၼၢမ်လဵၵ်းႁႄႉတၢင်းဝႆႉၶႃႈဢေႃႈ။ ႁဝ်းၶႃႈ ႁေႃးၵႃးၵႂႃႇ ၽႅဝ်တီႈႁူဝ်ႉၶဝ်ႁႄႉၼၼ်ႉသေ လႆႈဝၢႆႇႁူဝ်ၵႃးပွၵ်ႈမႃးၶိုၼ်း မူတ်း”- ဝႃႈၼႆ။

လိူဝ်ၼၼ်ႉ မိူၼ်ၼင်ႇ တီႈဝၢၼ်ႈၼမ်ႉမွၼ်း ၼႂ်းဢိူင်ႇၸေႊလၢၼ်ႉ ၸႄႈဝဵင်းမူႇၸေႊၼႆႉၵေႃႈ သိုၵ်း TNLA ပိၵ်ႉဢိုတ်းသဵၼ်ႈ တၢင်းမိူၼ်ၵၼ် ၵူၼ်းၸိူဝ်းတေၵႂႃႇၶၢႆၵၢတ်ႇ လႆႈဝၢႆႇပွၵ်ႈၶိုၼ်းမူတ်း ၵူၼ်းပိုၼ်ႉတီႈ ၼႂ်းဢိူင်ႇၸေႊလၢၼ်ႉလၢတ်ႈတီႈၽူႈတွႆႇႁွၵ်ႈ။  

“ၼႂ်ၼႆႉ 6 မူင်း ၵူၼ်းၸိူဝ်းတေၵႂႃႇၶၢႆၵၢတ်ႇ လႆႈၵႂႃႇၶပ်ႉၵိုတ်းၶမ်ဝႆႉ ယွၼ်ႉသိုၵ်းလွႆၶဝ် ဢမ်ႇပၼ်ၵႂႃႇမႃးလႄႈ လႆႈၶိုၼ်းဝၢႆႇပွၵ်ႈမႃး မူတ်းၶႃႈဢေႃႈ”- ဝႃႈၼႆ။

တႄႇဢဝ် မိူဝ်ႈဝႃး ဝၼ်းတီႈ 16 ယၢမ်းႁူဝ်ၶမ်ႈ 6 မူင်းၼၼ်ႉမႃး တေႃႇထိုင်မိူဝ်ႈၼႆႉ ၾူၼ်တူၵ်းဢမ်ႇထၢတ်ႇ ၼႂ်းၸႄႈဝဵင်းၼမ်ႉ ၶမ်း – မူႇၸေႊ ႁဵတ်းႁႂ်ႈၵူၼ်းမိူင်း ဢွၼ်ၵၼ်ထူပ်းတၢင်းယၢပ်ႇၽိုတ်ႇႁႅင်း မိူၼ်ၼင်ႇ – ၼမ်ႉထူမ်ႈလုၵ်းပဵမ်ႇ(လုၵ်းလိၼ်) ၸိူဝ်းၼႆႉသေ ဢမ်ႇၸၢင်ႈပၢႆႈမူၵ်းသွၼ်ႈၼႂ်းမၼ်း။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၾူၼ်တူၵ်းဢမ်ႇထၢတ်ႇ သဵင်မၢၵ်ႇလူင်သမ်ႉမေႃးပၼ်းႁႅင်း တေပၢႆႈ ၵႂႃႇ ၼႂ်းလုၵ်းလိၼ်ၵေႃႈ ၼမ်ႉၾူၼ်ၶဝ်ႈမူတ်း ယၢပ်ႇၸႂ်ၵူၼ်းမိူင်းတႄႉၶႃႈ”- ဝႃႈၼႆ။

မိူဝ်ႈၼႆႉ သိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ 3 ၸုမ်း ပဵၼ်ပၢင်တိုၵ်းၵၼ်ထႅင်ႈ ႁိမ်းဝၢၼ်ႈတူင်ႉၶၢၼ်ႊ ဝဵင်းမူႇ ၸေႊ ႁၢဝ်ႈႁႅင်း။ လိူဝ်ၼၼ်ႉ တီႈတပ်ႉၸၶၢၼ်းတိတ်ႉ ၾၢႆႇၸၢၼ်းဝဵင်းၼမ်ႉၶမ်း ယၢၼ်ဝဵင်းမွၵ်ႈ 1 လၵ်းၼၼ်ႉၵေႃႈ ပဵၼ်ပၢင် တိုၵ်းၵၼ်ထႅင်ႈ ႁၢဝ်ႈႁႅင်း။