သိုၵ်းမၢၼ်ႈတႃႈၶီႈလဵၵ်းပိုၼ်ၽၢဝ်ႇ ၽႂ်ဢွၵ်ႇၼွၵ်ႈႁိူၼ်း ၵၢင်ၶိုၼ်း တေၺွပ်းႁၢပ်ႇၶျေႃး

ၼႂ်းဝူင်ႈၼႆႉ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇ ႁၢမ်ႈၵူၼ်းမိူင်းတႃႈၶီႈလဵၵ်း ဢွၵ်ႇၼွၵ်ႈႁိူၼ်းယေးၵၢင်ၶမ်ႈၵၢင်ၶိုၼ်း ပေႃးဢွၵ်ႇတေတီႉၺွပ်းၵႂႃႇ ႁၢပ်ႇၶျေႃးဝႃႈၼႆဝႆႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၶၢဝ်းၶိဝ်းၼႆႉ ၶဝ်ႁၢမ်ႈ ဢမ်ႇႁႂ်ႈၵူၼ်းမိူင်းဢွၵ်ႇတၢင်းၼွၵ်ႈ ၵၢင်ၶမ်ႈၵၢင်ၶိုၼ်းၼႆဢေႃႈ ။ ပေႃးႁၼ်ၽႂ်ဢွၵ်ႇၵေႃႈ ဢမ်ႇဝႃႈၸၢႆးဝႃႈယိင်း တေၺွပ်းဢဝ်ၵႂႃႇႁၢပ်ႇၶျေႃး ၊ တေသူင်ႇၼႃႈသိုၵ်းၵမ်းလဵဝ် ” – ဝႃႈၼႆ။

မိူဝ်ႈလဵဝ် ၼႂ်းတႃႈၶီႈလဵၵ်းၼႆႉ ၵူၼ်းၼုမ်ႇတၢင်ႇတီႈသီႇလႅၼ်မႃးယူႇ ႁဵတ်းၵၢၼ်ႁႃၵိၼ်လဵင်ႉတွင်ႉၼမ် ၊ ၵၢင်ၶမ်ႈၵၢင်ၶိုၼ်း ၵူၼ်းၼုမ်ႇၸိူဝ်းဢွၵ်ႇတၢင်းၼွၵ်ႈ ၵိၼ်ၵျေႃႇၵၼ်ၵေႃႈမီးၼမ်လႄႈ လွင်ႈၼႆႉ သိုၵ်းမၢၼ်ႈၸၢင်ႈဢဝ်တိုဝ်ႉတၢင်းလီသေ တီႉၺွပ်း ၼႆယဝ်ႉ။

ၵူၼ်းၼုမ်ႇၼႂ်းပိုၼ်ႉတိႈတႃႈၶီႈလဵၵ်းလၢတ်ႈတီႈၽူႈတွႆႇႁွၵ်ႈဝႃႈ – “ ပေႃးတူၺ်းတႃႈၶီႈလဵၵ်းၼႆႉ ၵူၼ်းၼုမ်ႇသမ်ႉ ဢမ်ႇၸၢင်ႈဝႃႈလူင် ၵၢင်ၶမ်ႈၵၢင်ၶိုၼ်းၶဝ်ဢွၵ်ႇလႄႇယူႇတႃႇသေႇ ။ ၵူၺ်းၼႃႇမိူဝ်ႈလဵဝ်တႄႉၵေႃႈ တေဢမ်ႇလႅပ်ႈႁတ်းဢွၵ်ႇၵၼ်ၼမ်ယဝ်ႉ။ ၵူဝ်သိုၵ်းမၢၼ်ႈပႂ်ႉၺွပ်းၸွမ်းတၢင်း ” – ဝႃႈၼႆ။

ၶၢဝ်းယၢမ်းဢၼ်သိုၵ်းမၢၼ်ႈယိုတ်းမိူင်း ႁၢမ်ႈၵူၼ်းတႃႈၶီႈလဵၵ်းဢွၵ်ႇၼွၵ်ႈႁိူၼ်းယေးၼႆႉ တႄႇဢဝ် 9 မူင်းၵၢင်ၶမ်ႈ ထိုင် 5 မူင်းၵၢင်ၼႂ်။ လိူဝ်ၼၼ်ႉ ၶၢဝ်းၶိဝ်းၼႆႉ ႁူင်းႁႅမ်းၸိူဝ်းပိုတ်ႇၵၢၼ်ဢွၼ်ႊလၢႆႊၸိူဝ်းၼၼ်ႉၵေႃႈ ၺႃးသင်ႇပိၵ်ႉဢိုတ်းဝႆႉ ၼႆယဝ်ႉ။

ၵူၼ်းၼုမ်ႇ တႃႈၶီႈလဵၵ်းလၢတ်ႈတီႈၽူႈတွႆႇႁွၵ်ႈဝႃႈ- “ ငိၼ်းၵူၼ်းႁိမ်းႁွမ်းလၢတ်ႈတႄႉ ၶႄႇၸိူဝ်းမႃးႁဵတ်းၵၢၼ်ဢွၼ်ႊလၢႆႊၸိူဝ်းၼႆႉၵေႃႈ လႆႈၶၢႆႉပၢႆႈ ၵၼ်ၼႆဢေႃႈ။ ၾၢႆႇသိုၵ်းမၢၼ်ႈၵေႃႈ လႆႈၵိၼ်ၼမ်ႉမျၢတ်ႈၼမ်ႉတွၼ်းၸွမ်းလႄႈ ၶဝ်တေဢမ်ႇၺွပ်းတေႉ ။ ၶဝ်တေႁဵတ်းၼႄဝႃႈ တီႉၺွပ်းၼႆသေ ၸႂ်ႉၶၢႆႉဝႆႉလူင်ႈၼႃႈ ၊ ၸႂ်ႉၵႂႃႇယူႇဝႆႉ တၢင်ႇတီႈ ။ ဢမ်ႇၼၼ်ၵေႃႈ ၺွပ်းတီႈၼိုင်ႈ ၶိုၼ်းၵႂႃႇပွႆႇပၼ်ၶိုၼ်းတီႈၼိုင်ႈ ႁဵတ်းၼၼ်ဢေႃႈ ” – ဝႃႈၼႆ။

ယွၼ်ႉၵၢၼ်ၽႅၼ်သိုၵ်းလၢႆပႃႈလၢႆၾၢႆႇသေ မိူဝ်ႈလဵဝ် ဢဵၼ်ႁႅင်းလႄႈ ၶိူင်ႈၵွင်ႈၵၢင်ႇလၢၵ်ႈၼၢၵ်ႈသိုၵ်းမၢၼ်ႈယိုတ်းမိူင်း ယွမ်းလူင်းၼမ် မိူဝ်ႈလဵဝ် သိုၵ်းမၢၼ်ႈႁႃလၢႆးတၢင်း တွၼ်ႈတႃႇတေလႆႈၵူၼ်းသိုၵ်းမႂ်ႇလႄႈသင် ငိုၼ်းတွင်းတႃႇၸႂ်ႉၸၢႆႇၼႂ်းၵၢၼ်သိုၵ်းလႄႈသင် ၸိူဝ်းၼႆႉသေ ႁႃႁဵတ်းၵူႈလွၵ်းၵူႈလၢႆး။

လိူဝ်ၼၼ်ႉ ၼႂ်းလိူၼ်ၼႆႉၵူၺ်းၼင်ႇၵဝ်ႇ သိုၵ်းမၢၼ်ႈယိုတ်းမိူင်း  ၵဵပ်းယွၼ်းငိုၼ်း ၸဝ်ႈပၢႆႈမၢၵ်ႈမီး တီႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ သႂ်ႇႁူဝ်ၶေႃႈဝႃႈ တႃႇၵမ်ႉၵႅမ်ၼႂ်းၵၢၼ်သိုၵ်း ၼႆၵေႃႈမီးမႃး။

မၢႆမီႈပိူင်သိုၵ်းၽွင်းငမ်းဢၼ်ပဵၼ် မႃႇသျႄႇလေႃးၼၼ်ႉတႄႉ လႆႈႁၼ်ၶေႃႈပိုၼ်ၽဝ်ႇၼေႇပျီႇတေႃႇဢွၵ်ႇမႃးတႃႇ ၼႂ်းၸိုင်ႈတႆးပွတ်းႁွင်ႇ တႂ်ႈတိူင်းသိုၵ်း ယမၶ  တီႈဢၼ်မီးပၢင်တိုၵ်းသိုၵ်းသိူဝ်ၼၼ်ႉၵူၺ်း။ ဢမ်ႇပႃးတိူင်းသိုၵ်းတၢင်ႇဢၼ်။