မၢၵ်ႇလူင်တူၵ်းသႂ်ႇ ထဝ်ႈယိင်းၵေႃႉၼိုင်ႈ တီႈဝဵင်းၵူတ်ႉၶၢႆ လူႉတၢႆထင်တီႈ မိူဝ်ႈၽွင်းတိုၵ်ႉဢဝ်ၶဝ်ႈ ဝႃႈၼႆ။
ႁူဝ်လိူၼ်ၼူဝ်ႊဝႅမ်ႊပိူဝ်ႊ 2023 ၼႆႉ မၢၵ်ႇလူင် တူၵ်းသႂ်ႇ မႄႈထဝ်ႈဢိင်ႇ (ၼၢႆးဢိင်ႇ) တီႈလွႆၸူင်ႇငူးလိူမ် (ရင်ကွဲတောင်) ၼႂ်းၸႄႈဝဵင်းၵူတ်ႇၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ မိူဝ်ႈၽွင်းမၼ်းၼၢင်း တိုၵ်ႉဢဝ်ၶဝ်ႈႁႆႈယူႇၼၼ်ႉ။
ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ -“ပူၼ်ႉမႃး 10 ဝၼ်းပၢႆၼႆႉ မၢၵ်ႇၸုမ်းလႂ် ယိုဝ်းမႃးတူၵ်းသႂ်ႇတႄႉ ဢမ်ႇႁူႉ တိူဝ်ႉၺႃးၼၢႆးဢိင်ႇ မိူဝ်ႈၽွင်းၵႂႃႇဢဝ်ၶဝ်ႈႁႆႈ တီႈလွႆၸူင်ႇငူးလိူမ်ၼၼ်ႉသေ လႆႈလူႉတၢႆထင်တီႈၶႃႈဢေႃႈ။ မၼ်းၼၢင်း ပဵၼ် ၵူၼ်းဝၢၼ်ႈႁူဝ်ၶူဝ် ၼႂ်းဢိူင်ႇၼမ်ႉၽၵ်းၵႃၼႆႉၶႃႈ”- ဝႃႈၼႆ။
ယွၼ်ႉပၢင်တိုၵ်း သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ 3 ၸုမ်း တီႈဝဵင်းၵူတ်ႉၶၢႆၼႆႉသေ ၼႂ်းႁူဝ်လိူၼ်ၼႆႉ ၸၢၵ်ႇမၢၵ်ႇ တိူဝ်ႉသႂ်ႇၵူၼ်းမိူင်း လႆႈမၢတ်ႇၸဵပ်းလူႉတၢႆ ဢမ်ႇယွမ်း 5 ၵေႃႉ ၵူၼ်းပိုၼ်ႉတီႈလၢတ်ႈ။
ၸွမ်းၼင်ႇ ၽႅၼ်ၵၢၼ် 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ ယိုတ်းမိူင်းမႃး ႁၢဝ်ႈႁႅင်း ၼႂ်းမိူင်းတႆးပွတ်းႁွင်ႇၼႆႉသေ ႁဵတ်းႁႂ်ႈၵူၼ်းၼႂ်းဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ဢွၼ်ၵၼ်ပၢႆႈမူၵ်းသွၼ်ႈ ၼႂ်းလုၵ်း ပဵမ်ႇ(လုၵ်းလိၼ်) မႃး မွၵ်ႈ 20 ဝၼ်းယဝ်ႉ။
