Wednesday, June 19, 2024

ၵူၼ်းမိူင်းၵဵင်းတုင် ႁူမ်ႈၵၼ်တီႉၺွပ်း ၵူၼ်းလၵ်ႉရူတ်ႉၶိူင်ႈ  

Must read

မိူဝ်ႈဝၼ်းတီႈ 13/11/2023 ယၢမ်းၵၢင်ဝၼ်း 12 မူင်းၼၼ်ႉ ၵူၼ်းမိူင်းၵဵင်းတုင် တီႉၺွပ်းလႆႈၵူၼ်းလၵ်ႉရူတ်ႉၶိူင်ႈ 2 ၵေႃႉ ၼႂ်းၵၢတ်ႇလူင်ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ ပဵၼ်ၶၢဝ်းပိူၼ်ႈ သိမ်းလၢၼ်ႉသိမ်းသႅင်ႇသေ ပွၵ်ႈႁိူၼ်းႁင်းၽႂ်မၼ်း။ၵူၺ်းၼႃႇ မီးၵူၼ်းၸၢႆးသွင်ၵေႃႉ မႃးလၵ်ႉႁေႃႈရူတ်ႉၶိူင်ႈပိူၼ်ႈဢွၵ်ႇပၢႆႈ။ ၵူၼ်းၼႂ်းၵၢတ်ႇတၼ်းႁၼ်သေ ၸွႆႈၵၼ်လမ်းႁေႉသေၺွပ်းလႆႈ 2 ၵေႃႉ။ ဢႃယုၶႃ တေမီးမွၵ်ႈ 16-17 ၼႆႉၵွႆး ၊ မွပ်ႈပၼ်ပလိၵ်ႈၶဝ် ၵူတ်ႇထတ်းဝႆႉယဝ်ႉ။ ၸုမ်းၶဝ် လႅပ်ႈတေမီးထႅင်ႈယူႇ  ” – ဝႃႈၼႆ။

- Subscription -

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆႉ ၽူႈလၵ်ႉၸၵ်ႉၶုတ်ႈလိူင်ႇၼမ်  ၵူၼ်းမိူင်းၵဵင်းတုင် ၵႆႉၺႃးၸူၼ်ႁိမ်ဢဝ် ၶိူင်ႈၶူဝ်းၵိုၵ်းတူဝ် ၽွင်းဢွၵ်ႇႁိူၼ်းဢွၵ်ႇယေး။

ၵူၼ်းၼႂ်းပိုၼ်ႉတီႈၵေႃႉၼိုင်ႈသိုပ်ႇလၢတ်ႈထႅင်ႈဝႃႈ – “ ၵဵင်းတုင်ၼႆႉ လႆႈၵူဝ်ယူႇတႃႇသေယဝ်ႉ။ မိူဝ်ႈဝူင်ႈ ပူၼ်ႉမႃးၼႆႉၵူၺ်း တၢင်းဝၢၼ်ႈၼွႆႉၼေႃးပုၼ်ႉၵေႃႈ ၼၢင်းယိင်းၵေႃႉၼိုင်ႈ ၺႃးၵူၼ်းဢဝ်မိတ်ႈငႃသေ ၸူၼ်ၵႂႃႇ ငိုၼ်းၶမ်း  လႄႈ ရူတ်ႉၶိူင်ႈမၼ်း ။ယွၼ်ႉၼၼ်လႄႈ မိူဝ်ႈလဵဝ် ပေႃးပႃးငိုၼ်းၼမ်တႄႉ ဢမ်ႇၶႂ်ႈႁတ်းဢွၵ်ႇႁိူၼ်းယေးၵၼ်ယဝ်ႉ။ပေႃးဢွၵ်ႇၵေႃႈ ဢမ်ႇႁတ်းၵႂႃႇမႃးၵေႃႉလဵဝ် ” – ဝႃႈၼႆ။

ၼႂ်းၵဵင်းတုင်ၼႆႉ ၵႆႉမီးလွင်ႈၸူၼ်ႁိမ်ၵၼ် ၊ ၶႃႈၵၼ် ၊ ရူတ်ႉၵႃးၽႃႇၵၼ် ၸိူဝ်းၼႆႉသေတႃႉ ယူႇတီႈ ပလိၵ်ႈမၢၼ်ႈၶဝ် ဢမ်ႇဢဝ်သႂ်ႇၸႂ်သႂ်ႇၶေႃးသေ ႁဵတ်းသၢင်ႈၵႄႈလိတ်ႈသင်ပၼ် ။ ၵူၼ်းမိူင်းတီၺွပ်းလႆႈ ၵူၼ်းပူၼ်ႉပႅၼ်သေ ၵႂႃႇမွပ်ႈပၼ်ပလိၵ်ႈမၢၼ်ႈၶဝ်သေတႃႉ ၶိုၼ်းပွႆႇမႃးၶိုၼ်းၵမ်ႈၼမ် ၼႆ ၵူၼ်းပိုၼ်ႉတီႈသိုပ်ႇလၢတ်ႈၼႄၼင်ႇၼႆ။

လိူၼ်ပူၼ်ႉမႃးၼႆႉၵေႃႈ ၸႄႈဝဵင်းတႃႈၶီႈလဵၵ်းလႅၼ်လိၼ်တႆး-ထႆး မီးၸုမ်းဢမ်ႇႁူႉၾၢႆႇ ၶဝ်ႈသွၵ်ႈၸွမ်းႁၢၼ်ႉၸွမ်းသႅင်ႇလႄႈ ႁိူၼ်းယေး ၵူၼ်းမိူင်း ဢဝ်ၶူဝ်းၶွင်ၵႂႃႇတင်းၼမ်ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း