ၸုမ်းဢူၺ်းလီပွတ်းႁွင်ႇ ၸႂ်ႉတရူၼ်ႊပွႆႇမၢၵ်ႇလေႃႇတိုၵ်း တပ်ႉသိုၵ်းမၢၼ်ႈႁၢဝ်ႈႁႅင်းသေ မီးလွင်ႈမၢတ်ႇၸဵပ်းလူႉတၢႆ ။
တပ်ႉသိုၵ်းမၢၼ်ႈဢၼ်ၺႃး တရူၼ်ႊမိၼ်ၶဝ်ႈမႃးပွႆႇမၢၵ်ႇပိုတ်းယိုဝ်း မိူဝ်ႈဝၼ်းတီႈ 11/11/2023 ၼၼ်ႉပဵၼ် တပ်ႉၵွင်ႈလူင် ဢမတ – 346 ၊ ၶလယ – 41 လႄႈ ၶမယ 507 ၸိူဝ်းၼႆႉ ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းၵဝ်ႈၵၢင်ႉၶဝ် ၸႂ်ႉတရူၼ်ႊသေယိုဝ်းမၢၼ်ႈၼႆႉ ပဵၼ်ယၢမ်းၶမ်ႈဢေႃႈ။မႃးယိုဝ်းတီႈ တပ်ႉၶမယ-507 ဢၼ်မီးၼႂ်ဝၢၼ်ႈဢၢႆႇၼိူဝ်ၼၼ်ႉ။ ငိၼ်းဝႃႈတႄႉ ၵူၼ်းယိင်းၼႂ်းတပ်ႉၶဝ် တၢႆ 2 ၵေႃႉၼႆဢေႃႈ။ ပႆႇႁူႉတႅတ်ႈတေႃးၼင်ႇၵဝ်ႇ။ ၵူၼ်းဢၼ်မၢတ်ႇၸဵပ်းတႄႉ ယူတ်းယႃတူဝ်ဝႆႉတီႈ ႁူင်းယႃသိုၵ်းလႃႈသဵဝ်ႈ။ ၼႂ်းဝူင်ႈဝၢင်ႈၼႆႉ ၸုမ်းဢူၺ်းလီၶဝ် ၸႂ်ႉတရူၼ်းသေ ပိုတ်းယိုဝ်း မႃးၶိူဝ်းယႂ်း ” – ဝႃႈၼႆ။
မိူၼ်ၼၼ်ၼင်ႇၵဝ်ႇ ပူၼ်ႉမႃးဝၼ်းတီႈ 11/11/2023 ယၢမ်းၵၢင်ၼႂ်ၸဝ်ႉ ႁူင်းပလိၵ်ႈမၢႆ 2 ၼႂ်းၸႄႈဝဵင်းလႃႈသဵဝ်ႈၼၼ်ႉၵေႃႈ ၺႃးသိုၵ်းၵဝ်ႈၵၢင်ႉ MNDAA ၸႂ်ႉတရူၼ်ႊ ပွႆႇမၢၵ်ႇသႂ်ႇလႄႈ ႁူဝ်ႉဝၢင်းပျီႇတူႉၸိတ်ႉ ဢၼ်မီးႁိမ်းၼၼ်ႉ လူႉၵွႆႈသေဢမ်ႇၵႃး ႁိူၼ်းၵူၼ်းမိူင်းၵမ်ႈၽွင်ႈ လူႉၵွႆႈၸွမ်း လႆႈႁူႉၼင်ႇၼႆ။
သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဝႆႉဝႃႈ – “ ဝၼ်းတီႈ 11/11/2023 ယၢမ်းႁူဝ်ၼႂ် 2 မူင်းၼႆႉၵေႃႈ လႆႈလေႃႇတိုၵ်းပႃး တပ်ႉတိူင်းလႃႈသဵဝ်ႈလႄႈ တပ်ႉ ၶလရ – 41 ၵွင်းပိဝ်ႇႁႃႇၸဵမ်ၸိူဝ်းၼႆႉထႅင်ႈ ” – ဝႃႈၼႆဝႆႉ။
မိူဝ်ႈလဵဝ် တီႈလႃႈသဵဝ်ႈၼႆႉ သိုၵ်းမၢၼ်ႈယူႇတီႈတပ်ႉတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (အရှေ့မြောက်တိုင်း စစ်ဌာနချုပ်) သေ လၢမ်းလိမ်းယိုဝ်းၵွင်ႈလူင်ၵႂႃႇၵူႈႁူးၵူႈတၢင်းလႄႈ ၵူၼ်းမိူင်းၵမ်ႈၽွင်ႈ တိူဝ်ႉမၢတ်ႇၸဵပ်း ဢွင်ႈတီႈႁိူၼ်းယေးၵူၼ်းမိူင်းၵေႃႈ လူႉၵွႆၼမ်ၼႆ ၵူၼ်းပိုၼ်ႉတီႈလၢတ်ႈၼႄၼင်ႇၼႆ ။
ယွၼ်ႉပၢင်တိုၵ်းလၢႆပႃႈလၢႆၾၢႆႇသေ ဢဵၼ်ႁႅင်းသိုၵ်းမၢၼ်ႈယူပ်ႈယွမ်းလူင်း။ မိူၼ်ၼင်ႇတၢင်းၸိုင်ႈတႆးပွတ်းႁွင်ႇၼႆႉၵေႃႈ လုၵ်ႈၸုမ်းသိုၵ်းမၢၼ်ႈလူႉတၢႆၼမ်လႄႈ မိူဝ်ႈလဵဝ် ပေႃးလႆႈ ႁွင်ႉဢဝ် ဢဵၼ်ႁႅင်းသိုၵ်းတၢင်း ဝဵင်းပၢင်ႁူႈ (ပၢင်ႇဢူႇလူင်) ၶိုၼ်ႈမႃးတၢင်း ၵျွၵ်ႉမႄး ၊ သီႇပေႃႉ ၊ လႃႈသဵဝ်ႈ ၸိူဝ်းၼႆႉ ဢမ်ႇယွမ်း 40 လမ်း။
ၼင်ႇႁိုဝ် ထႅဝ်ၵႃးသိုၵ်းမၢၼ်ႈ ဢၼ်လုၵ်ႉမႃး ပၢင်ႁူႈၸိူဝ်းၼႆႉ တေဢမ်ႇၽႅဝ်တီႈၽႅဝ်တၢင်းၼၼ်ႉၵေႃႈ ယူႇတီႈ သိုၵ်း TNLA ပိၵ်ႉဢိုတ်းသဵၼ်ႈတႃႈသၢႆတၢင်းၵမ်ႈၽွင်ႈသေ မၢင်တီႈ ယႃႉလႅဝ်ၵူၼ်ႇပင်းပႅတ်ႈၶူဝ်တႆႇၸိူဝ်းၼႆႉၵေႃႈမီး။ မိူၼ်ၼင်ႇ ၶူဝ်ၼမ်ႉသိမ်ႇ ဢၼ်ၵၢႆၸူးသီႇပေႃႉၼၼ်ႉၵေႃႈ TNLA ယႃႉၵွႆပႅတ်ႈ ။
