ၽွင်းၵူၼ်းပၢႆႈၽေးသိုၵ်း လုၵ်ႉတီႈမႆႈ ပၢႆႈၸူးတီႈၵတ်း တၢင်းဝဵင်းလႃႈသဵဝ်ႈၼၼ်ႉ ထုၵ်ႇၸုမ်းယိပ်းၵွင်ႈၵၢင်ႇ ပႂ်ႉၸွမ်းသဵၼ်ႈတၢင်းသေ ၵဵပ်းငိုၼ်းတီႈၵႃးၵူၼ်းပၢႆႈၽေး 1 လမ်းလႂ် 350,000 ပျႃး။

ၸွမ်းၼင်ႇ ၽႅၼ်ၵၢၼ်သိုၵ်း 1027 ၼႆႉသေ ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ 3 ၸုမ်း ပဵၼ်ပၢင်တိုၵ်းၵၼ်မႃး ၼႂ်းၸိုင်ႈတႆးပွတ်းႁွင်ႇ ႁၢဝ်ႈႁႅင်းသေ တုမ်ႉတိူဝ်ႉၵူၼ်းပိုၼ်ႉတီႈ ဢွၼ်ၵၼ်ပၢႆႈၽေးသိုၵ်း ၼမ် ၼႂ်းၼၼ်ႉ ၵူၼ်းဝဵင်းသႅၼ်ဝီ ဢွၼ်ၵၼ်ပၢႆႈၸူးဝဵင်းလႃႈသဵဝ်ႈ ၸွမ်းသဵၼ်ႈတၢင်းလတ်း (တၢင်းထိူၼ်ႇ) ၼၼ်ႉ ထုၵ်ႇၸုမ်းယိပ်းၵွင်ႈၵၢင်ႇ ပႂ်ႉၵဵပ်းငိုၼ်းၵႃး 1 လမ်း လႆႈပၼ် 350,000 ပျႃး သင်ဢမ်ႇသႂ်ႇငိုၼ်းပၼ်ၸိုင် ဢမ်ႇပၼ်ၶၢမ်ႈမႄႈၼမ်ႉတူႈ ၼႆယဝ်ႉ။

ၵူၼ်းပၢႆႈၽေးသိုၵ်း ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ၽွင်းၶၢဝ်းပၢင်တိုၵ်းၼႆႉ ၵူၼ်းပၢႆႈၽေးသိုၵ်း တီႈဝဵင်းသႅၼ်ဝီ ဢွၼ်ၵၼ် ၶၢႆႉပၢႆႈၸူးထႅင်ႈ တၢင်းဝဵင်းလႃႈသဵဝ်ႈၼၼ်ႉ ၶႂ်ႈဝႃႈမီးၵူႈဝၼ်းယဝ်ႉ။ ယွၼ်ႉဝႃႈ ဢွၼ်ၵၼ်ပၢႆႈၵႂႃႇၸွမ်းတၢင်းထိူၼ်ႇ တၢင်းၾၢႆႇဢွၵ်ႇဝဵင်းသႅၼ်ဝီလႄႈ တၢင်းသၢႆၼၼ်ႉ မီးဝႆႉၸုမ်းယိပ်းၵွင်ႈ ပဵၼ်ၽူႈၶဝ်ႈၸုမ်းပျီႇတူႉၸိတ်ႉၵဝ်ႇ ၵေႃႉၼိုင်ႈ မၼ်းပႂ်ႉ ၵဵပ်းငိုၼ်းၵႃး 1 လမ်း လႆႈပၼ် 350,000 ပျႃး သင်ဢမ်ႇပၼ်ၸိုင် မၼ်းတိုၼ်းဢမ်ႇပၼ်ပိူၼ်ႈၶၢမ်ႈၼမ်ႉတူႈၶႃႈ”- ဝႃႈၼႆ။

ၶၢဝ်းတၢင်း 10 ဝၼ်းပၢႆမႃးၼႆႉ တီႈဝဵင်းသႅၼ်ဝီၼႆႉ မီးပၢင်တိုၵ်းထပ်းၵၼ်မႃးၵူႈဝၼ်းလႄႈ ၵူၼ်းပၢႆႈၽေးသိုၵ်း ဢွၼ် ၵၼ်မႆႈၸႂ် ယွၼ်ႉဢမ်ႇမီးလွင်ႈႁူမ်ႇလူမ်ႈသေ ၸင်ႇၼႅတ်ႈၶၢႆႉပၢႆႈႁႃဢွင်ႈတီႈမႂ်ႇထႅင်ႈ ၼႆယဝ်ႉ။

“မိူဝ်ႈဝၼ်းတီႈ 11/11/2023 ၼႆႉ သိုၵ်းမၢၼ်ႈ ဢဝ်ၶိူင်ႈမိၼ်မႅင်းမီႈ လမ်းၼိုင်ႈ မႃးပွႆႇမၢၵ်ႇသႂ်ႇ ႁိမ်းဝၢၼ်ႈမိူင်းယၢင်း၊ ဝၢၼ်ႈ တႅင်ႇယႅၵ်ႈ၊ ဝၢၼ်ႈၵွင်းႁေႃလႄႈ ၸွမ်းႁိမ်းၶူဝ်ၼမ်ႉတူႈ တၢင်းၶဝ်ႈဢွၵ်ႇဝဵင်းသႅၼ်ဝီ ၸိူဝ်းၼႆႉထႅင်ႈ”- ၵူၼ်းပိုၼ်ႉတီႈ ဝဵင်းသႅၼ် ဝီ လၢတ်ႈတီႈၽူႈတွႆႇႁွၵ်ႈၼင်ႇၼႆ။

ယၢမ်းလဵဝ် တီႈဝဵင်းသႅၼ်ဝီၼႆႉ ထုၵ်ႇပိၵ်ႉဢိုတ်းဝႆႉ ၵူႈႁူးၵူႈတၢင်းသေ တုမ်ႉတိူဝ်ႉၵူၼ်းပၢႆႈၽေးသိုၵ်း ၼပ်ႉႁူဝ်ႁဵင် ဢွၼ်ၵၼ်ၶမ် ၼႂ်းၵႄႈပၢင်တိုၵ်းၼႆသေ ဢမ်ႇမီးၸုမ်းတူင်ႇဝူင်းၵူၼ်း ၶဝ်ႈၸွႆႈထႅမ်လႆႈ ယဝ်ႉၵေႃႈ ဢမ်ႇမီးၸုမ်းလႂ်ႁတ်းၶဝ်ႈၸွႆႈထႅမ်လႄႈ ၵွပ်ႈၼႆ ယူႇတီႈ ၵူၼ်းပၢႆႈၽေးသိုၵ်းၼင်ႇၵၼ်သေ ၶိုၼ်းလႆႈၸွႆႈထႅမ် တူၺ်းထိုင်လုမ်းလႃးၵၼ်ၵႂႃႇၶိုၼ်းၵူၺ်း ၵူၼ်းပၢႆႈၽေး လၢတ်ႈ။

ယွၼ်ႉပၢင်တိုၵ်း သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ 3 ၸုမ်းၼႆႉသေ တုမ်ႉတိူဝ်ႉ ၵူၼ်းမိူင်းသႅၼ်ဝီ ပၢႆႈၽေးသိုၵ်း ဢမ်ႇ ယွမ်း 10,000 တႄႇဢဝ် ႁူဝ်လိူၼ်ၼႆႉမႃး ၵူၼ်းမိူင်းသႅၼ်ဝီ ဢွၼ်ၵၼ်ပၢႆႈႁွတ်ႈထိုင် ဝဵင်းလႃႈသဵဝ်ႈ ဢမ်ႇယွမ်း 2,000 ယဝ်ႉ ၽူႈၸွႆႈထႅမ် ၵူၼ်းပၢႆႈၽေးသိုၵ်းလၢတ်ႈ။

ပၢင်တိုၵ်း ၼႂ်းၸိုင်ႈတႆးပွတ်းႁွင်ႇ ၶၢဝ်းတၢင်း 18 ဝၼ်းမႃးၼႆႉ ယူႇတီႈ သိုၵ်းၵဝ်ႈၵၢင်ႉ MNDAA ယိုတ်းလႆႈ ဝဵင်းလၢဝ်ႇၵၢႆး ယဝ်ႉ။ မိူဝ်ႈဝႃး ဝၼ်းတီႈ 12 သမ်ႉ ယိုတ်းလႆႈထႅင်ႈ ၸႄႈဝဵင်းၵုၼ်လူင်။ သိုၵ်းတဢၢင်း TNLA သမ်ႉ ၵမ်ႈၼမ် ၵုမ်းလႆႈၼႂ်းဝဵင်း ၼမ်ႉၶမ်း မိူၼ်ၼင်ႇ ၸိူဝ်းဢွင်ႈတီႈ လုမ်းလူင်ပွင်ၸိုင်ႈ၊ ႁူင်းပလိၵ်ႈမၢၼ်ႈလႄႈ ၼႂ်းၵၢင်ဝဵင်း၊ ၸွမ်းၵၢတ်ႇလူင် ၸိူဝ်းၼႆႉ။