သိုၵ်းမၢၼ်ႈ ယိုဝ်းမၢၵ်ႇလူင် သႂ်ႇဝၢၼ်ႈၵူၼ်းမိူင်း တီႈဝဵင်းမူႇၸေႊ

သိုၵ်းမၢၼ်ႈ ယိုတ်းမိူင်း ယိုဝ်းမၢၵ်ႇလူင် သႂ်ႇၼႂ်းမူႇဝၢၼ်ႈ တီႈဝဵင်းမူႇၸေႊ တႅၵ်ႇတိူဝ်ႉသႂ်ႇ ႁၢၼ်ႉၶၢႆၶူဝ်းၵုၼ်ႇလႄႈ ႁိူၼ်း ၵူၼ်းမိူင်း။

ဝၼ်းတီႈ 11/11/2023 ယၢမ်းၵၢင်ၼႂ် 10:20 မူင်း သိုၵ်းမၢၼ်ႈ ဢၼ်ပၵ်းဝႆႉတီႈလူင်ၶၢင် (တပ်ႉၵဝ်ႇၶွမ်ႇမၼိတ်ႉ) ၼၼ်ႉ ယိုဝ်း မၢၵ်ႇလူင် သႂ်ႇၼႂ်းဝၢၼ်ႈတူင်ႈၶၢၼ်တႂ်ႈ 5 လုၵ်ႈ တႅၵ်ႇတိူဝ်ႉသႂ်ႇႁၢၼ်ႉၶၢႆၶူဝ်းၵုၼ်ႇလႄႈ ႁိူၼ်းယေး ၵူၼ်းဝၢၼ်ႈ လူႉၵွႆၸွမ်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ ယိုဝ်းမၢၵ်ႇလူင်ၶဝ်ႈဝၢၼ်ႈတူင်ႈၶၢၼ်တႂ်ႈ 5 လုၵ်ႈ။ တႅၵ်ႇတိူဝ်ႉသႂ်ႇ လၢၼ်ႉၸၢႆးဢွင်ႇၼႅင်ႇလႄႈ ႁိူၼ်းၵူၼ်းမိူင်း ထႅင်ႈလင်ၼိုင်ႈ။ လွင်ႈလူႉသုမ်းၼၼ်ႉတႄႉ ၶႃႈႁဝ်း ပႆႇႁူႉတႅတ်ႈ တေႃးၶႃႈ။ ထိုင်မႃး ယၢမ်းၵၢင်ၼႂ် 10 မူင်းၶိုင်ႈ သိုၵ်းလွႆသမ်ႉ ယူႇတီႈဝၢၼ်ႈၵွင်းမႆႉႁူင်း ၾၢႆႇဢွၵ်ႇဝၢၼ်ႈၼမ်ႉပၢၼ်း ယိုဝ်းမၢၵ်ႇ သႅၼ်း 60 mm 2 လုၵ်ႈ ၵႂႃႇတူၵ်းတၢင်းဢေးသျႃးဝေႃး တၢင်းၶဝ်ႈဝဵင်းမူႇၸေႊၼၼ်ႉၶႃႈ။ မိူဝ်ႈဝႃး ဝၼ်းတီႈ 12 ယၢမ်းၵၢင် ၼႂ် သိုၵ်းမၢၼ်ႈ ၸႂ်ႉၵူၼ်းဝၢၼ်ႈတူင်ႈၶၢၼ်တႂ်ႈၶၢႆႉပၢႆႈသေ ယၢမ်းလဵဝ် ၵူၼ်းဝၢၼ်ႈတႄႉ ၶၢႆႉ ဢွၵ်ႇပၢႆႈဝႆႉမူတ်းယဝ်ႉ”- ဝႃႈၼႆ။

ဝၼ်းတီႈ 11 ယၢမ်းဝၢႆးဝၼ်း 3 မူင်းၶိုင်ႈ ၼႆႉၵူၺ်း သိုၵ်းမၢၼ်ႈ တီႈတပ်ႉလူင်ၶၢင်ၼၼ်ႉ ၶိုၼ်းယိုဝ်း မၢၵ်ႇလူင်ၵႂႃႇတၢင်းဝၢၼ်ႈ တူင်ႈၶၢၼ်တႂ်ႈထႅင်ႈ 5 လုၵ်ႈသေ သိုၵ်း TNLA သမ်ႉ ထွႆၵႂႃႇတၢင်းၾၢႆႇလင် ပမ်ႉၼမ်ႉမၼ်း ဝၢၼ်ႈတူင်ႈၶၢၼ်တႂ်ႈဝႆႉ – ၽူႈတူင်ႉ ၼိုင်ၵၢၼ်သိုၵ်း တၢင်းပွတ်းထုင်ႉမၢဝ်းလၢတ်ႈ။

တႄႇဢဝ်ဝၼ်းတီႈ 7/11/2023 ၼႆႉမႃး ႁၢၼ်ႉတေႃႇထိုင်ယၢမ်းလဵဝ် ၵူၼ်းဝဵင်းၼမ်ႉၶမ်း ဢွၼ်ၵၼ်ပၢႆႈၽေးသိုၵ်းႁွတ်ႈထိုင်ဝႆႉ ဝဵင်းမူႇၸေႊ ၼပ်ႉႁူဝ်ပၢၵ်ႇ ၵမ်ႈၼမ် ပၢႆႈသွၼ်ႈယူႇဝႆႉ ၸွမ်းဝတ်ႉမုၼ်ၸဝ်ႈ၊ ၵျွင်းၶရိတ်ႉယၢၼ်ႇလႄႈ ႁိူၼ်းယေး ပီႈၼွင်ႉၽႂ်မၼ်း။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉဝႃႈ ၵူၼ်းပၢႆႈၽေးသိုၵ်းႁဝ်းၶႃႈ ၵႆႉမီး လွင်ႈၶဝ်ႈဢွၵ်ႇယူႇတႃႇသေႇလႄႈ ၶေႃႈမုလ်းတႅတ်ႈတေႃးတႄႉ ပႆႇႁူႉလီလီ။ မၢင်ၵေႃႉ ၸိူဝ်းမီးလုၵ်ႈလၢင်းၵႂႃႇႁဵတ်းၵၢၼ်ဝႆႉ ၼႂ်းမိူင်းၶႄႇၼၼ်ႉ ၶဝ်ဢွၼ်ၵၼ်ႁဵတ်းပပ်ႉၶၢမ်ႈလႅၼ်လိၼ်သေ ၵႂႃႇႁႃလုၵ်ႈလၢင်းၽႂ်မၼ်း ၸိူဝ်းၼၼ်ႉ ၵေႃႈ မီးၼမ်ဢေႃႈ။ ၸိူဝ်းယူႇဝႆႉ ၸွမ်းႁိူၼ်းယေး ပီႈၼွင်ႉၽႂ်မၼ်း တီႈဝဵင်းမူႇၸေႊၼႆႉၵေႃႈ မီးၼမ်ဢေႃႈ”- ဝႃႈၼႆ။

ယၢမ်းလဵဝ် ၵူၼ်းဝဵင်းၼမ်ႉၶမ်း ဢၼ်ပၢႆႈမႃးသွၼ်ႈဝႆႉတီႈဝဵင်းမူႇၸေႊၼႆႉ မိူၼ်ၼင်ႇ – တီႈဝတ်ႉၵၢင်ဝဵင်း ပွၵ်ႉၸၢၼ်း ႁူဝ်ၵူၼ်း 100 ပၢႆ ၊ ပွၵ်ႉၶရိတ်ႉယၢၼ်ႇ 100 ပၢႆ ၊ ပွၵ်ႉၵွင်းၼွင် 100 ပၢႆလႄႈ ဝတ်ႉၵမ်ႇမထၢၼ်း ၸေႇတဝုၼ်ႇ ၸိူဝ်းၼႆႉထႅင်ႈ။