ၵူၼ်းမိူင်းဝဵင်းသႅၼ်ဝီ ၶမ်ဝႆႉတီႈမိူင်းပႃး ဢမ်ႇယွမ်းပၢၵ်ႇ

 ၸုမ်းဢူၺ်းလီ 3 ၸုမ်း ပိုတ်ႇၼႃႈသိုၵ်း 1027 လေႃႇတိုၵ်းသိုၵ်းမၢၼ်ႈမႃး ၶၢဝ်းတၢင်း 14 ဝၼ်းၼႆ့ ၵူၼ်းမိူင်းၼႂ်းၸိုင်ႈ တႆးပွတ်းႁွင်ႇလႆႈပၢႆႈၽေးသိုၵ်းဝႆ့ 3 မိုၼ်ႇပၢႆ ၊ ၵူၼ်းမိူင်းၼႂ်းၸႄႈဝဵင်းသႅၼ်ဝီ ဢၼ်ပၢႆႈဢွၵ်ႇဝၢၼ်ႈမႃး ၶမ်ဝႆ့တီႈ ဝတ့် ၵျွင်းမုၼ်ၸဝ်ႈမိူင်းပႃး  ဢမ်ႇၸၢင်သိုပ်ႇၵႂႃႇတၢင်းလႂ်ထႅင်ႈမီးႁမ်းၸမ်ပၢၵ်ႇ ၸုမ်းၸွႆႈထႅမ်တူင်ႇဝူင်းၵူၼ်း လႆႈၵႂႃႇ ၸွႆႈ ဢဝ်ဢွၵ်ႇမႃး  ဝႃႈၼႆ။

 ၵူၼ်းဝၢၼ်ႈဢၼ်ပၢႆႈၽေးသိုၵ်းမႃးၶမ်ဝႆ့တီႈဝတ့်ၵျွင်းမိူင်းပႃး ၸမ်ပၢၵ်ႇၵေႃ့ၼႆ့ မိူဝ်ႈ ဝၼ်းတီႈ 9/11/2023 ႁွတ်ႈ ထိုင်တီႈဝဵင်းလႃႈသဵဝ်ႈယဝ့်-  ၾၢႆႇၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈ ၽူႈတွႆႇႁွၵ်ႈဝႃႈ- “ မိူဝ်ႈၼႆႉႁဝ်းမိူဝ်းဢဝ်ပီႈၼွင်ႉသႅၼ်ဝီၶဝ်မႃး။ သႅၼ်ဝီတႄႉ ႁဝ်းဢမ်ႇၸၢင်ႈမိူဝ်း။ ဢၼ်ႁဝ်း မိူဝ်းဢဝ်ၼႆႉ ႁဝ်းလႆႈမိူဝ်းဢဝ်တီႈမိူင်းပႃး ။ ပီႈၼွင်ႉၼႂ်းသႅၼ်ဝီၶဝ်ၼႆႉ ၵူၼ်းမၢတ်ႇၸဵပ်းၵေႃႈ ႁဝ်းလႆႈပႃးမႃး ၼၼ်ႉၼႃႇ။ ၶဝ်ဢွၼ်ပႆတၢင်းထိူၼ်ႇသေၵေႃႈလူင်းမႃး ဢွၼ်မႃးတၢင်းလတ်းသေ မႃးၽႅဝ်တီႈၵျွင်း ၸဝ်ႈသြႃႇႁဝ်း တီႈမိူင်းပႃးၼၼ်ႉၼႃႇၼေႃႈ ” – ဝႃႈၼႆ။

ၵူၺ်းၵႃႈ ၶၢဝ်းတၢင်းၼႂ်းၵႄႈဝဵင်းလႃႈသဵဝ်ႈထိုင် ဝတ်ႉၵျွင်းမိူင်းပႃးၵေႃႈ ထူပ်းလွင်ႈယၢပ်ႇ ယွၼ်ႉမီးၸုမ်းယိပ်း ၵွင်ႈၵၢင်ႇ ၶဝ် ပႂ်ႉၵူတ်ႇထတ်းႁၢဝ်ႈႁႅင်း။ တႃႇတေလႆႈပူၼ်ႉၵိၵ်ႉလၢၼ်ႇၸိူဝ်းၼၼ်ႉၵေႃႈ ၾၢႆႇၸွႆႈထႅမ်  လႆႈလၢတ်ႈတေႉတေႉ ဝႃႈဝႃႈ။

ၶၢဝ်းတၢင်းၼႂ်းၵႄႈဝဵင်းလႃႈသဵဝ်ႈ တေႃႇထိုင် ဝတ်ႉမိူင်းပႃးၼႆႉၵေႃႈ ဢမ်ႇၸႂ်ႈလွင်ႈငၢႆႈ ယွၼ်ႉၸုမ်းယိပ်းၵွင်ႈၵၢင်ႇ တူင်ႉၼိုင်ယူႇသဝ်းဝႆႉဝႃႈၼႆ။

ၾၢႆႇၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸွမ်းတၢင်း ဢၼ်ႁဝ်းလုၵ်ႉလႃႈသဵဝ်ႈသေမိူဝ်းသႅၼ်ဝီၼႆႉ မိူဝ်းႁူပ်ႉသႂ်ႇ သိုၵ်းၵဝ်ႈၵၢင်ႉၶဝ် လႄႈ PDFၶဝ် ၸိူဝ်းၼႆႉဢေႃႈ ။လၢတ်ႈၵႂၢမ်းဢမ်ႇပွင်ႇၵၼ် ၶဝ် လၢတ်ႈၵႂၢမ်းၶႄႇလၢႆလၢႆ။တူၺ်းၶဝ် ဢမ်ႇၶႂ်ႈပၼ်ႁဝ်းၵႂႃႇႁပ်ႉၵူၼ်းပၢႆႈၽေး ” – ဝႃႈၼႆ။

ၸွမ်းၼင်ႇသဵၼ်ႈမၢႆ ဢၼ်ၵဵပ်းဝႆႉ ၵူၼ်းပၢႆႈၽေးသိုၵ်း ဢၼ်လုၵ်ႉဝဵင်းသႅၼ်ဝီ ပၢႆႈၶဝ်ႈမိူင်းပႃးသေ ႁွတ်ႈထိုင်ဝဵင်းလႃႈသဵဝ်ႈၼႆႉ မီး 300 ပၢႆ။ ၵမ်ႈၼမ် ပဵၼ်ၵူၼ်းဝၢၼ်ႈႁူဝ်တႃႈ၊ ၵျွင်းသႅင်လႄႈ လၢႆဝၢၼ်ႈ ၼႂ်းဝဵင်းသႅၼ်ဝီ။ ပေႃးမႃးတူၺ်း ၵမ်ႈၼမ် ပႃးၵူၼ်းမၢတ်ႇၸဵပ်း လႄႈ မႄႈမၢၼ်း ၊ ၵူၼ်းထဝ်ႈလႄႈ လုၵ်ႈဢွၼ်ႇၸိူဝ်းၼႆႉ။