ၸုမ်းဢူၺ်းလီ လေႃႇတိုၵ်း တပ်ႉသိုၵ်းမၢၼ်ႈ ၸၵၶ တီႈဝဵင်းသႅၼ်ဝီ – လၢဝ်ႇၵၢႆး ႁၢဝ်ႈႁႅင်း

ၶၢဝ်းတၢင်း 14 ဝၼ်းမႃးၼႆႉ ၸုမ်းဢူၺ်းလီ ပွတ်းႁွင်ႇ 3 ၸုမ်း ႁႅၼ်းသိုၵ်း လေႃႇတိုၵ်း တပ်ႉသိုၵ်းမၢၼ်ႈ ၸၵၶ 16 တီႈဝဵင်းသႅၼ်ဝီ မႃးႁၢဝ်ႈႁႅင်း ၵူႈဝၼ်း ႁဵတ်းႁႂ်ႈတုမ်ႉတိူဝ်ႉ ၵူၼ်းမိူင်းမၢတ်ႇၸဵပ်းလူႉတၢႆၼမ်။

တႄႇဢဝ် ဝၼ်းတီႈ 27/10/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၸုမ်းဢူၺ်းလီ ပွတ်းႁွင်ႇ 3 ၸုမ်း မိူၼ်ၼင်ႇ သိုၵ်း ၵဝ်ႈၵၢင်ႉ MNDAA ၊ သိုၵ်းတဢၢင်း TNLA လႄႈ သိုၵ်းရၶႅင်ႇ AA ႁူမ်ႈၵၼ် ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ ၸၵၶ 16 တီႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ မႃးႁၢဝ်ႈႁႅင်း ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆမၢတ်ႇၸဵပ်း ဢမ်ႇယွမ်း 40 ယဝ်ႉ။

ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈတင်း ၸုမ်းဢူၺ်းလီ 3 ၸုမ်း ပိုတ်းယိုဝ်းၵၼ် ႁၢဝ်ႈႁႅင်း သိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇ ၵူႈဝၼ်းၶႃႈယဝ်ႉ။ ၵူၼ်းမိူင်းဢၼ်တၢႆၵေႃႈတၢႆ ဢၼ်တၢႆသေႁေႃႇဝႆႉၵေႃႈမီး ဢၼ်တၢႆသေ ဢမ်ႇၸၢင်ႈဢဝ်ပႅတ်ႈၵေႃႈမီး ဢၼ်တၢႆၶမ်ၸွမ်းႁိူၼ်းၸွမ်းယေး ၸိူဝ်းၼၼ်ႉၵေႃႈမီး ၽႂ်ၵေႃႈ ပႆႇႁတ်းၵႂႃႇၵဵပ်းဢဝ်တူဝ်တၢႆၶႃႈ ”- ဝႃႈၼႆ။

သိုပ်ႇလၢတ်ႈဝႃႈ – “တီႈဝၢၼ်ႈႁူဝ်တႃႈ ၸပ်းၶူဝ်လဵၵ်း တီႈတၢင်းၶဝ်ႈဢွၵ်ႇဝဵင်းသႅၼ်ဝီ ၸိူင်ႉၼၼ်ႉဢိူဝ်ႈ ၵွပ်ႈသိုၵ်းၵႂႃႇယူႇဝႆႉၼႂ်း ဝၢၼ်ႈသေ ယိုဝ်းၵၼ် တေႃႇထိုင်ယၢမ်းလဵဝ်ၼႆႉ ပၢင်တိုၵ်းၶဝ် ပႆႇယဵၼ်”- ဝႃႈၼႆ။

ၼင်ႇႁိုဝ် တပ်ႉသိုၵ်းမၢၼ်ႈ ၸၵၶ 16 သႅၼ်ဝီ ပေႃးတေတူၵ်းသုမ်းၼၼ်ႉ ယူႇတီႈ ၸုမ်းဢူၺ်းလီ ပွတ်းႁွင်ႇ 3 ၸုမ်း ၶတ်းၸႂ် လူမ်ႇယိုဝ်းမႃးႁၢဝ်ႈႁႅင်း ၵူႈဝၼ်း ႁၢၼ်ႉတေႃႇထိုင် ယၢမ်းလဵဝ်ပႆႇယိုတ်းလႆႈ။ ၵွပ်ႈၼႆလႄႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ မၢတ်ႇၸဵပ်းမႃးတင်းၼမ် ၼႆယဝ်ႉ။

“ၶဝ်လေႃႇတိုၵ်းၵၼ်ၼႆႉတႄႉ ၵႆဝဵင်းဢိတ်းၼိုင်ႈသေတႃႉ ၵူၺ်းၵႃႈ မၼ်းၸမ်ဝဵင်းၸၢၼ်းဢိူဝ်ႈ ပၢင်တိုၵ်း ဢၼ်ၶဝ်ယိုဝ်းၵၼ် ၼႆႉ ပဵၼ်ၼႂ်းဝၢၼ်ႈၼၼ်ႉၼႃႇ ၵွပ်ႈၼႆလႄႈ ၸၢၵ်ႇမၢၵ်ႇတိူဝ်ႉသႂ်ႇၵူၼ်းမိူင်းလူႉတၢႆ ၶမ်ၼႂ်းႁိူၼ်းယေး ၸိူင်ႉၼႆမႃးၼၼ်ႉယဝ်ႉ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။

မိူဝ်ႈၼႆႉ ဝၼ်းတီႈ 9 သိုၵ်းတင်းသွင်ၾၢႆႇ တိုၵ်ႉသိုပ်ႇယိုဝ်းၵၼ်ထႅင်ႈ တီႈၼႂ်းဢိူင်ႇၵွင်းႁေႃ ၾၢႆႇၸၢၼ်း မႄႈၼမ်ႉတူႈ ႁိမ်းတပ်ႉ သိုၵ်းမၢၼ်ႈ ၸၵၶ 16 သႅၼ်ဝီ။ ယွၼ်ႉပၢင်တိုၵ်းၼႆႉသေ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း ၼႂ်းဝၢၼ်ႈတႅၵ်ႇယႅၵ်ႈ၊ ၶူးဝဵင်း၊ ဢိူင်ႇ ၼမ်ႉၸလၢပ်ႈ ၸိူဝ်းၼႆႉ လူႉတၢႆ မွၵ်ႈ 20 ယဝ်ႉ လိူဝ်ၼၼ်ႉ မၢတ်ႇၸဵပ်း ဢမ်ႇယွမ်း 20 ယဝ်ႉ။  

ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်းသႅၼ်ဝီၼႆႉသမ်ႉ မိူၼ်ၼင်ႇ တီႈဝတ်ႉ/ၵျွင်းၶမ်း မီးမွၵ်ႈ 3,000 ၵေႃႉ၊ ၵျွင်းၼႃးသေႃႉ မွၵ်ႈ 350 ၵေႃႉ၊ ၵျွင်းမိူင်းလီ 200 ပၢႆ၊ ၵျွင်းသႅင် 350 ၵေႃႉ၊ ၵျွင်းမင်ႇၵလႃႇယူင်ႇ ၵၢင်ဝဵင်း 700 ပၢႆ၊ ၵျွင်းမုင်ႈသႃႇမွၵ်ႈ 700 ၵေႃႉ၊ ၵျွင်းဝေႇလုဝုၼ်ႇ ဝၢၼ်ႈၼွင် ဝဵင်းၼၢင်းမွၵ်ႈ 350 ၵေႃႉ၊ ၵျွင်းထမ်ႇမႃႇယူင်ႇ ဝၢၼ်ႈၼွင် 350 ပၢႆ၊ ၵျွင်းၵွင်းမူးထၢတ်ႈ မွၵ်ႈ 350 ၵေႃႉ၊ ၵျွင်းၵုၼ်ၶၢၼ် ၸၢင်ႉၸုၵ်းမွၵ်ႈ 700 ၵေႃႉ၊ ၵျွင်းၵုင်းၺွင်ႇ မိူင်းပႃးမွၵ်ႈ 150 ၵေႃႉ၊ ၵျွင်းမိူင်းပႃးမွၵ်ႈ 150 ၵေႃႉ၊ ၵျွင်းၵွင်းဢၢႆႇ မိူင်းပႃးမွၵ်ႈ 100 ၵေႃႉ၊ ၵျွင်းဝဵင်းလႅင်မွၵ်ႈ 100 ၵေႃႉ၊ ၵျွင်းၸေႊဢူမွၵ်ႈ 200 ၵေႃႉလႄႈ ၵျွင်းပဵင်းဢွႆႈ မွၵ်ႈ 1500 ၵေႃႉ ၼႆယဝ်ႉ။

ယဝ်ႉၵေႃႈ ၵူၼ်းမိူင်း ဢၼ်ၶမ်ဝႆႉ ၼႂ်းမူႇဝၢၼ်ႈၽႂ်မၼ်း ၸိူဝ်းၼၼ်ႉၵေႃႈ မီးထႅင်ႈၼပ်ႉႁူဝ်ႁဵင်။ တေႃႈလဵဝ် ၵူၼ်းပၢႆႈၽေးသိုၵ်း တီႈဝဵင်းသႅၼ်ဝီၼႆႉ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်၊ ယႃႈယႃ၊ ၶူဝ်းၶွင်ၸႂ်ႉတိုဝ်း ၾႆးၾႃႉ ၸိူဝ်းၼႆႉ။

ၼွၵ်ႈလိူဝ်ၼၼ်ႉ တပ်ႉသိုၵ်းၵဝ်ႈၵၢင်ႉ MNDAA ၵေႃႈ ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ ၸၵၶ တီႈဝဵင်းလၢဝ်ႇၵၢႆး ႁၢဝ်ႈ ႁႅင်း ႁၢၼ်ႉတေႃႇထိုင်ယၢမ်းလဵဝ် ပႆႇယိုတ်းလႆႈ။ ၼၼ်ႉၵေႃႈ ႁဵတ်းႁႂ်ႈၵူၼ်းမိူင်းၼပ်ႉႁူဝ်မိုၼ်ႇ ဢွၼ်ၵၼ်ပၢႆႈၽေးသိုၵ်း ၼႆယဝ်ႉ။