မိူဝ်ႈၼႆႉ ဝၼ်းတီႈ 9/11/2023 ယၢမ်းၵၢင်ၼႂ် 7 မူင်း မၢၵ်ႇလူင်တူၵ်းတႅၵ်ႇသႂ်ႇ ႁိူၼ်းယေးၵူၼ်းမိူင်း ဢၼ်မီးၼႂ်းဝၢၼ်ႈ ၵွင်းၵၢင် ဢိူင်ႇမိူင်းတဵမ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ  ၵူၼ်းဝၢၼ်ႈတၢႆ 3 ၵေႃ့ပႃးလုၵ်ႈ ဢွၼ်ႇယိင်း 12 ၶူပ်ႇ ၵေႃ့ၼိုင်ႈ။

ၵူၼ်းပိုၼ့်တီႈၵေႃ့ၼိုင်ႈ လၢတ်ႈတီႈတွႆႇႁွၵ်ႈဝႃႈ – “ မၢၵ်ႇလူင်ၼႆႉ တူၵ်းမႃး ၼႂ်းဝၢင်းၵျွင်းႁူၺ်ႇၼိုင်ႈႁေ တိူဝ်ႉၺႃးၵျွင်းၵွႆ ။ ဢၼ်တူၵ်းၼႂ်းဝၢၼ်ႈတႄႉ လၢႆႁူၺ်ႇ ဢေႃႈ ။  တိူဝ်ႉၺႃးၵူၼ်းပႃးႁေ တၢႆထင်တီႈ 2 ၵေႃႉ  ။ ထႅင်ႈၵေႃႉၼိုင်ႈ ၶႃႈပုတ်းၵႂႃႇ၊ လိူတ်ႈဢွၵ်ႇၼမ် တၢႆပွတ်းတၢင်း ၽွင်း ၸုမ်းၸွႆႈတူင်ႇၵူၼ်း ဢဝ်ၵႂႃႇႁူင်းယႃ ” – ဝႃႈၼႆ။

ယွၼ်ႉမၢၵ်ႇတူၵ်းသႂ်ႇလႄႈ ၼၢႆးမူၼ်း ဢႃယု 60 ပၢႆ ၊ ၼၢင်းသႅင်သႂ် ဢႃယု 12 ၶူပ်ႇ လူႉတၢႆထင်တီႈ ၊ ဢၼ်ၶႃပုတ်းၵႂႃႇသေတၢႆ ၽွင်းၵႂႃႇႁူင်းယႃၼၼ့်သမ့်ပဵၼ် ၼၢင်းယိင်းဢႃယု 40  ။  ထိုင်မိူဝ်ႈလဵဝ် သဵင်ၵွင်ႈသဵင်ႈမၢၵ်ႇပႆႇယဵၼ် မၢၵ်ႇဢၼ်တူၵ်းသႂ်ႇၼႂ်းဝၢၼ်ႈၼႆႉ ပဵၼ်ႁွႆးမိုဝ်းၽႂ် ပႆႇၸၢင်ႈယိုၼ်ယၼ် ၵူၼ်းမိူင်းတႄႉ ထၢင်ႇပဵၼ်မၢၵ်ႇသိုၵ်းမၢၼ်ႈ  ။

ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ လႅပ်ႈပဵၼ်သိုၵ်းမၢၼ်ႈၶဝ်ၼႆႉ တင်ႈၸႂ်ႈယိုဝ်းသႂ်ႇဝၢၼ်ႈ ။ ၶဝ်ထၢင်ႇဝႃႈ သိုၵ်းဢူၺ်းလီ မီးၼႂ်းဝၢၼ်ႈလႄႈ ၶဝ်ယိုဝ်း။ ၵူၼ်းမိူင်းသမ်ႉ ပေႃးၵၢင်ဝၼ်း   မိူဝ်းၸႂ်းႁိူၼ်း။ မိူဝ်းလဵင့်မူလဵင့်ၵႆႇ လဵင့်ဝူဝ်း။ ၵၢင်ၶမ်ႈမႃးသမ့်ၵႂႃႇၼွၼ်းတီႈၵျွင်းမုၼ်ၸဝ်ႈ၊   ဢၼ်ၺႃးမၢၵ်ႇမိူဝ်ႈၼႆႉၵေႃႈ မႅၼ်ႈမိူဝ်ႈၶဝ် မိူဝ်းႁုင်မိုဝ်ႉတႃႇၵိၼ်ယႅမ်ႉၵၢင်ၼႂ် တီႈႁိူၼ်း ” – ဝႃႈၼႆ။

ဝၼ်းတီႈ 27/10/2023 ၼၼ်ႉၵေႃႈ သိုၵ်းမၢၼ်ႈ ယိုတ်းမိူင်း တပ်ႉၶလယ 68 ယိုဝ်းၵွင်ႈလူင် သႅၼ်း (120 mm)  သႂ်ႇ ၼႂ်းဝၢၼ်ႈၵွင်းၵၢင် ဢိူင်ႇမိူင်းတဵမ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇႁိူၼ်းလုင်းတီး – ပႃႈလူႇ ထုၵ်ႇၾႆးမႆႈလူႉၵွႆ တင်းလင် ၼႆယဝ်ႉ။

မိူဝ်ႈပူၼ်ႉမႃး ဝၼ်းတီႈ 28/11/2023 ၼၼ်ႉၵေႃႈ မၢၵ်ႇလူင်တူၵ်းသႂ်ႇ ႁိူၼ်းယေးၼႂ်းဝၢၼ်ႈမိူင်းတဵမ် လူႉၵွႆ ဢမ်ႇယွမ်း 6 လင်။ၵူၼ်းမိူင်းလႆႈပၢႆႈသွၼ်ႈယူႇဝႆႉ တီႈၵျွင်းမိူင်းတဵမ် ႁူဝ်ၵူၼ်းဢမ်ႇယွမ်း 200 ။မိူဝ်ႈလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်လႄႈ ယႃႈယႃ ႁႂ်ႈမီးၸုမ်းမႃးၸွႆႈထႅမ်ဝႆးဝႆးၼႆယဝ်ႉ။

ယၢမ်းလဵဝ် တီႈဝဵင်းလႃႈသဵဝ်ႈၼႆႉ ၵူၼ်းမိူင်းဢွၼ်ၵၼ်ပၢႆႈၽေးသိုၵ်း တႄႇဢဝ် ဝၼ်းတီႈ 27/11/2023 မႃးၼႆႉ ၵူၼ်းပၢႆႈၽေး ၼပ်ႉႁူဝ်ႁဵင်။