မိူဝ်ႈၼႆႉ ဝၼ်းတီႈ 8/11/2023 ယၢမ်းၵၢင်ၶမ်ႈမွၵ်ႈ 6 မူင်း သဵင်ၵွင်ႈတႅၵ်ႇ တီႈတပ်ႉသိုၵ်းမၢၼ်ႈ ၸၶၢၼ်းတိတ်ႉၵူင်း ဢၼ်မီးဝႆႉ တၢင်းၾၢႆႇၸၢၼ်းဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇၼႆႉ ဢမ်ႇယွမ်း 10 လုၵ်ႈယဝ်ႉ။  

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၸုမ်းလႂ်တင်းၸုမ်းလႂ် ယိုဝ်းၵၼ်တႄႉ ဢမ်ႇႁူႉၶႃႈ သဵင်ၵွင်ႈ လူင်တႅၵ်ႇ တီႈတပ်ႉၸၶၢၼ်းတိတ်ႉၵူင်းၼၼ်ႉ ဢမ်ႇယွမ်း 10 လုၵ်ႈယဝ်ႉ။ မိူဝ်ႈၼႆႉ သဵင်ၵွင်ႈယဵၼ်တင်းဝၼ်း ၶႃႈ တိုၵ်ႉမႃးတႅၵ်ႇ ယၢမ်းၵၢင်ၶမ်ႈ 6 မူင်းၼႆႉၵူၺ်းဢေႃႈ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းႁူဝ်လိူၼ်ၼႆႉသေ ႁဵတ်းႁႂ်ႈ ၵူၼ်း ဝဵင်းၼမ်ႉၶမ်း ဢွၼ်ၵၼ်ပၢႆႈၽေးသိုၵ်း ဢမ်ႇယွမ်း 10,000 ယဝ်ႉ။

“ၼႂ်းဝၼ်းသွင်ဝၼ်းမႃးၼႆႉ ၵူၼ်းၼမ်ႉၶမ်းႁဝ်း ဢွၼ်ၵၼ်ပၢႆႈၽေးသိုၵ်း ရူတ်ႉၵႃး ပေႃးတၢၼ်ႇၵႂႃႇပွႆးပီမႂ်ႇတႆးၶႃႈယဝ်ႉ။ ၼမ် တႄႉၼမ်ဝႃႈၼၼ်ႉယဝ်ႉ။ ၼႂ်းဝဵင်းၼမ်ႉၶမ်းၼႆႉ ပေႃးဝႃႈ 10 ႁိူၼ်းၼႆ တႃႇ 7-8 ႁိူၼ်းၼႆႉ ပၢႆႈမူတ်းယဝ်ႉ။ ပၢႆႈတင်းႁိူၼ်းတင်း ယေး ႁဵတ်းၼႆၶႃႈဢေႃႈ။ ၵူၼ်းပႂ်ႉႁိူၼ်း ပေႃးဢမ်ႇမီးၶႃႈယဝ်ႉ”- ၵူၼ်းပိုၼ်ႉတီႈ ဝဵင်းၼမ်ႉၶမ်းလၢတ်ႈ။

ပၢင်တိုၵ်း တီႈဝဵင်းၼမ်ႉၶမ်း ၶၢဝ်းတၢင်း 6 ဝၼ်းမႃးၼႆႉ ၸၢၵ်ႇမၢၵ်ႇတိူဝ်ႉသႂ်ႇႁိူၼ်းယေး ၵူၼ်းဝၢၼ်ႈ လူႉၵွႆ ဢမ်ႇယွမ်း 100 လင် လိူဝ်ၼၼ်ႉ တီႈဝတ်ႉၵၢင်ဝဵင်း(ၵျွင်းတေႃႇ) ၵေႃႈ လူႉၵွႆၼမ်။ ယဝ်ႉၵေႃႈ တုမ်ႉတိူဝ်ႉၵူၼ်းမိူင်းမၢတ်ႇၸဵပ်းလူႉတၢႆ ဢမ်ႇယွမ်း 10 သေဢမ်ႇၵႃး ႁဵတ်းႁႂ်ႈၵူၼ်းဝဵင်းၼမ်ႉၶမ်း ပၢႆႈၽေးသိုၵ်း ၵႂႃႇသွၼ်ႈတၢင်းၾၢႆႇႁွင်ႇၼမ်ႉမၢဝ်း၊ ထုင်ႉလွႆႁူဝ်သိူဝ်လႄႈ မူႇၸေႊ ၸိူဝ်းၼၼ်ႉဝႆႉထႅင်ႈ တင်းၼမ်။