ၵူၼ်းပၢႆႈၽေးသိုၵ်း ဢၼ်လုၵ့်တၢင်ႇတီႈတၢင်ႇဝဵင်းမႃးမီးဝႆႉတီႈဝဵင်းတၢင်ႉယၢၼ်း ႁူဝ်ၵူၼ်းႁဵင်ပၢႆ မိူဝ်ႈလဵဝ်ယၢပ်ႇၽိုတ်ႇလွင်ႈၵိၼ်ယႅမ်ႉ ။
တႄႇဢဝ် ၸုမ်းဢူၺ်းလီပွတ်းႁွင်ႇ 3 ၸုမ်း လေႃႇတိုၵ်းသိုၵ်းမၢၼ်ႈမႃး ဢမ်ႇထၢတ်ႇဢမ်ႇဝၢႆးၼႆႉ ၵူၼ်းမိူင်းလၢႆၸႄႊဝဵင်း လၢႆပၢႆႈသွၼ်ႈယူႇတီႈလွတ်ႈၽေး ။ မိူၼ်ၼင်ႇ ၵူၼ်းမိူင်း ၸိူဝ်းယူႇၼႂ်းၸႄႈဝဵင်းလၢဝ်ႇၵၢႆး လႄႈ ဝဵင်းၼမ်ႉၽႃႈ(ၶျိၼ်းသူၺ်ႇႁေႃႇ) ၸိူဝ်းၼႆႉၵေႃႈ ပၢႆႈမႃးယူႇဝႆႉတီႈ ဝတ်ႉဝႃးၽႃသိူဝ်ႇၼႂ်းၸႄႈဝဵင်းတၢင်ႉယၢၼ်း ႁူဝ်ၼပ်ႉၵူၼ်း ဢမ်ႇယွမ်းႁဵင်။ ယွၼ်ႉၵိုင်ႉၵင်ႉလႆႈပၢႆႈမႃးလႄႈ မိူဝ်ႇလဵဝ်လူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉလႄႈၶိူင်ႈၶူဝ်းၸႂ်ႉသွႆ။
ၵူၼ်းၼႂ်းပိုၼ်ႉတီႈၵေႃႈၼိုင်ႈလၢတ်ႈတီႈၽူႈတွႆႁွၵ်ႈဝႃႈ – “ ပိူင်လူင်မၼ်းတႄႉၵေႃႈ ၽႃႈႁူမ်ႇၶူဝ်းၼွၼ်း ၊ ယႃႈယႃ လႄႈ ၶဝ်ႈၼမ်ႉတၢင်းၵိၼ်ၸိူဝ်းၼႆႉ။မိူဝ်ႈလဵဝ် တၢင်းၵိၼ်ဢမ်ႇပဵင်းပေႃး။လႆႈၵိၼ်ၵေႃႇၽီႇလႄႈ ၶဝ်ႈမုၼ်းၵူၺ်း။ၵတ်ႉၵႃႈ မီးပီႈၼွင်ႉတၢင်ႉယၢၼ်း ႁူမ်ႈၵၼ်မႃးၸႅၵ်ႇၶဝ်ႈၽၵ်းပၼ်။ၵူၺ်းၼႃႇ ၵူၼ်းပၢႆႈၽေးၼမ်ႁႅင်းလႄႈ ဢမ်ႇၵုမ်ႇထူၼ်ႈလီ ” – ဝႃႈၼႆ။
မိူဝ်ႈလဵဝ်ၵူၼ်းပၢႆႈၽေးၸိူဝ်းၼႆႉ ဢွၼ်ၵၼ်ထင်ယူႇသဝ်းဝႆႉ တီႈဝတ်ႇဢွင်ႇမၵလႃႇလႄႈသင် ၊ တီႈပၢင်ပိတ်ႉမၢၵ်ႇၼင် လႄႈသင် လိူဝ်ၼၼ်ႉ တီႈႁူင်းႁေႃၵေႃႈလိၵ်ႈလၢႆး ဝႃႉ ၸိူဝ်းၼႆႉၵေႃႈ ယူႇသဝ်းဝႆႉ။ၼႂ်းၼၼ်ႉ လုၵ်ႈဢွၼ်ႇလႄႈ မႄႈမၢၼ်းၸိူဝ်းၼႆႉၵေႃႈ မီးဝႆႉလၢႆၵေႃႉ ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ။
ၽူႈၵမ်ႉၸွႆႈၵူၼ်းပၢႆႈၽေးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းပၢႆႈၽေးၸိူဝ်းၼႆႉ မိူဝ်ႈၶဝ်ဢွၵ်ႇႁိူၼ်းမႃး ထိုင်ပွတ်းတၢင်းၼၼ်ႉ မၢင်ၵေႃႉၵေႃႈၺႃးၵူတ်ႇထတ်းထဵတ်ႈထၢမ်ႁႅင်း။ မၢင်ၸိူဝ်းၵေႃႈ ၺႃးယိုတ်းဝႂ်ၵပ်းတူဝ် မၢတ့်ပုင်ႇတိၼ်ႇၸိူဝ်းၼႆႉ ။ ယဝ်ႉၵေႃႈ ၾူၼ်းလႄႈ ငိုၼ်းၸိူဝ်းၼႆႉၵေႃႈ ၺႃးသိုၵ်းၶဝ်သိမ်းဢဝ်ၸွမ်းလႄႈ ထိုင်မိူဝ်ႈလဵဝ် ယၢပ်ႇၸႂ်ဝႆ့ ” – ဝႃႈၼႆ ။
ယွၼ်ႉလႆႈၵိုင်ႉၵင်ႉဢွၵ်ႇပၢႆႈယၢၼ်ႈႁိူၼ်းယေးလႄႈ မႄႈမၢၼ်းလႄႈ မႄႈလုၵ်ႈဢွၼ်ႇလဵၵ်ႉၸိူဝ်းၼႆႉ တုမ်ႉတိူဝ်ႉပၢႆးတူဝ်ပၢႆးၸႂ် ။
ၽူႈၸွႆႈၵူၼ်းပၢႆႈၽေးသိုၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပေႃးတူၺ်း မႄႈလုၵ်ႈဢွၼ်ႇၸိူဝ်းၼႆႉၼႆ မိူၼ်ၶဝ်ၵူဝ်ၵူၼ်းဝႆႉ။တူၵ်းၸႂ်ငၢႆႈ။ လႅပ်ႈတိူဝ့်ပၢႆးၸႂ် ။ ထိုင်မိူဝ်ႈလဵဝ်ၵေႃႈ ပႆႇမီးမူႇလႂ်ၸုမ်းလႂ် မႃးၸွႆႈထႅမ်သင်ပၼ် ” – ဝႃႈၼႆ။
ဢိင်ၼိူဝ်သိုၵ်းဢူၺ်းလီ 3 ၸုမ်းပိုတ်းယိုဝ်းတပ်ႉသိုၵ်းမၢၼ်ႈၼႂ်းၸႄႈဝဵင်း မူႇၸေႊ ၊ၼမ်ႉၶမ်း၊ ၶျိၼ်းသူၺ်ႇႁေႃႇ (ဝဵင်းၼမ်ႉၽႃႈ)၊ ဝဵင်းလၢဝ်ႇၵၢႆး၊ ၵိဝ်ႇၵူတ်ႉ၊ ပၢင်ႇသၢႆး၊ ၵူတ်ႉၶၢႆ၊ သႅၼ်ဝီ၊ လႃႈသဵဝ်ႈ၊ ၼမ်ႉပွင်ႈ၊ ၵျွၵ်ႉမႄး ၊ၼွင်ၶဵဝ် ၸိူဝ်းၼႆႉသေ ၸၢတ်ႈၸိုင်ႈလုမ်ႈၾႃႉ UNOCHA ပိုၼ်ၽၢဝ်ႇဝႃႈ ၼႂ်းဝူင်ႈလဵဝ်ၵူၼ်း ၵူၼ်းမိူင်းတႆးပွတ်းႁွင်ႇ ပၢႆႈၽေးသိုၵ်းမီးထိုင် 4 မိုၼ်ႇၵေႃႉယဝ်ႉ၊ ၵူၼ်းတၢႆယွၼ်ႉပၢင်တိုၵ်း ပႃးတင်းလုၵ်ႈဢွၼ်ႇလဵၵ်ႉ မီးထိုင် 13 ၵေႃႉ၊ ၵူၼ်းဢၼ်မၢတ်ႇၸဵပ်းၸၢၵ်ႇမၢၵ်ႇသေ လႆႈယူတ်းယႃတူဝ်ဝႆႉမီးတင်းၼမ် ဝႃႈၼႆ။
