မိူဝ်ႈၼႆႉ ဝၼ်းတီႈ 7/11/2023 ယၢမ်းၵၢင်ၼႂ် သိုၵ်း TNLA တင်း SSPP လုၵ်ႈၸုမ်း ၸုမ်းဢူၺ်းလီပွတ်းႁွင်ႇၼင်ႇၵၼ် ပိုတ်းယိုဝ်းၵၼ် ၼႂ်းဢိူင်ႇၸေႊလၢၼ်ႉ ၸႄႈဝဵင်း မူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ႁၢဝ်ႈႁႅင်း တင်းသွင်ၾၢႆႇ မီးလွင်ႈလူႉတၢႆမၢတ်ႇၸဵပ်း ၼင်ႇၵၼ်။
ၽူႈမီးၸၼ်ႉ ၼႂ်း SSPP ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ပိုတ်းယိုဝ်းၵၼ်တႄႉၶႃႈဢေႃႈ သိုၵ်း SSPP ႁဝ်းၶႃႈ တင်း TNLA ယိုဝ်းၵၼ် ႁၢဝ်ႈႁႅင်း။ ယွၼ်ႉတင်းသွင်ၾၢႆႇတူင်ႉၼိုင်ၵၢၼ်သိုၵ်းၼင်ႇၵၼ်သေ တုမ်ႉၺႃးၵၼ်လႄႈ လႆႈပဵၼ်ပၢင်တိုၵ်းၵႂႃႇ။ လွင်ႈတၢႆမၢတ်ႇ ၵေႃႈမီးတင်းသွင်ၾၢႆႇ ။ ပဵၼ်ၼႂ်းၸႄႈဝဵင်းမၢႆ 14 ”- ဝႃႈ ၼႆ။
ဢိင်ၼိူဝ် လွင်ႈသိုၵ်း SSPP တင်း TNLA ပိုတ်းယိုဝ်းၵၼ် ၼႂ်းဢိူင်ႇၸေႊလၢၼ်ႉၼႆႉသေ ယၢမ်းလဵဝ် ယူႇတီႈ ငဝ်ႈငုၼ်း တင်းသွင်ၾၢႆႇ တိုၵ်ႉႁူပ်ႉဢုပ်ႇဢူဝ်းငူပ်ႉငီႉၵၼ်ဝႆႉ ၽူႈမီးၸၼ်ႉ SSPP လၢတ်ႈ ။
“ႁဝ်းၶႃႈ တင်းငဝ်ႈငုၼ်း တိုၵ်ႉဢုပ်ႇဢူဝ်းငူပ်ႉငီႉၵၼ်ဝႆႉယူႇ ။ ၵူၺ်းၵႃႈ ပႆႇလႆႈႁူႉၶေႃႈမုလ်း ႁူဝ်ယွႆႈ”- ဝႃႈၼႆ။
သိုၵ်း TNLA တင်း SSPP ၼႆႉ ပဵၼ်လုၵ်ႈၸုမ်းဢူၺ်းလီ ပွတ်းႁွင်ႇ 7 ၸုမ်းဢၼ်သိုၵ်းဝႃႉ UWSA ဢွၼ်ႁူဝ်ဝႆႉ ။ ၼႂ်း ၼၼ်ႉပဵၼ်- တပ်ႉသိုၵ်းဝႃႉ UWSA ၊ မိူင်းလႃး NDAA ၊ ၵဝ်ႈၵၢင်ႉ MNDAA ၊ သိုၵ်းၶၢင် KIA ၊ သိုၵ်းဝၢၼ်ႈႁႆး SSPP ၊ သိုၵ်းတဢၢင်း TNLA လႄႈ သိုၵ်းရၶႅင်ႇ AA သိုၵ်း ။
တႄႇဢဝ် ဝၼ်းတီႈ 27/10/2023 မႃးသမ်ႉဢၼ်ပဵၼ် ၸုမ်းဢူၺ်းလီ ပွတ်းႁွင်ႇ 3 ၸုမ်းပီႈၼွင်ႉ မိူၼ်ၼင်ႇ သိုၵ်းတ ဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA သမ်ႉ ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ။ ယၢမ်းလဵဝ်ၸိူဝ်းၶဝ်ယိုတ်းဝႆႉ ဝဵင်းၼမ်ႉၽႃႈ(ၶျိၼ်းသူၺ်ႇႁေႃႇ) ၊ ၵိဝ်ႇၵူၼ်ႉ၊ လၢဝ်ႇၵၢႆး လႄႈဝဵင်းသႅၼ်ဝီ သေ ဢၼ်တိုၵ်းယိုဝ်းႁၢဝ်ႈႁႅင်းသမ်ႉပဵၼ်ၼႂ်းၸႄႈဝဵင်းမူႇၸေႊ လႄႈၸေႊလၢၼ်ႉ။ ထိုင်တီႈလႆႈယိုဝ်းၵၼ်မႅၼ်ႈတင်း SSPP ပႃး။
