မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈ တီႈဢိူင်ႇမိူင်းၸီး ၸႄႈဝဵင်းၵူတ်ႉၶၢႆ လူႉၵွႆ မွၵ်ႈ 10 လင် ၸၢၵ်ႇမၢၵ်ႇတိူဝ်ႉၺႃး ၵူၼ်းပိုၼ်ႉတီႈ မၢတ်ႇၸဵပ်း 5 ၵေႃႉ။
ဝၼ်းတီႈ 5/11/2023 ယၢမ်းဝၢႆးဝၼ်း မၢၵ်ႇလူင် သိုၵ်းမၢၼ်ႈ ယိုတ်းမိူင်း ယိုဝ်းသႂ်ႇ ႁိူၼ်းယေး ၵူၼ်းဝၢၼ်ႈႁူဝ်ၶၢင်းလႄႈ ဝၢၼ်ႈပၢင်ယၢင်း ၼႂ်းဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ႁိူၼ်းယေး ၵူၼ်းဝၢၼ်ႈ 8 လင် ၼႂ်းၼၼ်ႉ တိူဝ်ႉၺႃး ၵူၼ်းဝၢၼ်ႈ မၢတ်ႇၸဵပ်းၸွမ်း 5 ၵေႃႉ ၼႆယဝ်ႉ။
ၵူၼ်းပိုၼ်ႉတီႈ ၼႂ်းဢိူင်ႇမိူင်းၸီး လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၼႆႉ လုၵ်ႉတၢင်းလႂ်ယိုဝ်းမႃးတႄႉ ဢမ်ႇႁူႉ မႃးတူၵ်းသႂ်ႇ ႁိူၼ်းၵူၼ်းဝၢၼ်ႈႁူဝ်ၶၢင်း 3 လင် တိူဝ်ႉသႂ်ႇႁိူၼ်း ၸၢႆးသၢင်ႇသူၺ်ႇပၢၼ်း၊ ၸၢႆးဢၢႆႈလႃႉ၊ ၼၢႆးၸၢမ်ႇ။ ယဝ်ႉၵေႃႈ မၢၵ်ႇၶဝ် တိူဝ်ႉ သႂ်ႇထႅင်ႈ ဝၢၼ်ႈပၢင်ယၢင်း (ၸၢဝ်းၶၢင်) တင်းမူတ်း 5 လင် ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ မၢတ်ႇၸဵပ်း 5 ၵေႃႉ ၼႂ်းၼၼ်ႉ ယိင်း 3 ၵေႃႉလႄႈ ၸၢႆး 2 ၵေႃႉ”- ဝႃႈၼႆ။
မိူဝ်ႈဝၼ်းတီႈ 6/11/2023 ယၢမ်းၵၢင်ဝၼ်း 11 မူင်းၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဢိူင်ႇၸေႈဢူ ၸႄႈ ဝဵင်းသႅၼ်ဝီ မၢၵ်ႇလူင်တူၵ်းသႂ်ႇၸွမ်းၼႂ်းတူင်ႈၼႃႈ တင်းၼမ်။ ယဝ်ႉၵေႃႈ သိုၵ်းမၢၼ်ႈ ယူႇတီႈတပ်ႉသႅၼ်ဝီ ယၢမ်းၵၢင်ၶိုၼ်း လၢမ်းလိမ်း ယိုဝ်းၵွင်ႈလူင် မႃးတူၵ်းသႂ်ႇတၢင်းႁိမ်းဝၢၼ်ႈၸေႈဢူထႅင်ႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ ၽူႈ ၸၢႆး 2 ၵေႃႉ မၢတ်ႇၸဵပ်းၸွမ်း။
လိူဝ်ၼၼ်ႉ မိူဝ်ႈဝၼ်းတီႈ 2/11/2023 သိုၵ်းမၢၼ်ႈတင်း သိုၵ်း TNLA, PDF ပဵၼ်ပၢင်တိုၵ်းၵၼ် တီႈဝၢၼ်ႈႁူဝ်ၶူဝ် ဢိူင်ႇႁူဝ်ၶူဝ် ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တိူဝ်ႉသႂ်ႇႁိူၼ်းၵူၼ်းဝၢၼ်ႈ 6 လင် လွင်ႈတုမ်ႉတိူဝ်ႉ ၵူၼ်းမိူင်း မၢတ်ႇၸဵပ်းလူႉတၢႆ ဢမ်ႇမီး။
ယဝ်ႉၵေႃႈ ပၢင်တိုၵ်း သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ 3 ၸုမ်း တီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ မိူဝ်ႈဝၼ်း တီႈ 5/11/2023 ၼႆႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇလမ်းၼိုင်ႈ ယဝ်ႉၵေႃႈ ၸႂ်ႉၶိူင်ႈမိၼ်မႅင်းမီႈ မႃးသူင်ႇၶိူင်ႈၵွင်ႈ ၵၢင်ႇလႄႈ ၶွင်ၵိၼ်ယႅမ်ႉထႅင်ႈ 3 လမ်း။
ပူၼ်ႉမႃး မိူဝ်ႈဝၼ်းတီႈ 4/11/2023 ၼၼ်ႉ ယူႇတီႈ တပ်ႉသိုၵ်းတဢၢင်း TNLA တင်း သိုၵ်းမၢၼ်ႈ ႁူပ်ႉဢုပ်ႇဢူဝ်းတူၵ်းလူင်း ၵၼ်သေ ၾၢႆႇသိုၵ်းမၢၼ်ႈ ယွၼ်းထွႆ ပၼ်တပ်ႉ 2 ဢွင်ႈတီႈ ပဵၼ်တီႈဝၢၼ်ႈလီႈ ၾၢႆႇၸၢၼ်းဝၢၼ်ႈပၢင်လူင် ၼႂ်းၵႄႈပၢင်လူင် လႄႈ တႃႈတေႈ ယဝ်ႉၵေႃႈ တပ်ႉႁိမ်းပႃႇႁဵဝ်ႈၶႄႇ ၾၢႆႇႁွင်ႇဝၢၼ်ႈၸၢမ် ၼႂ်းၸႄႈဝဵင်းၼမ်ႉတူႈ ၸိူဝ်းၼႆႉ ၽူႈတူင်ႉၼိုင် ၵၢၼ်သိုၵ်း ၼႂ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ