မၢၵ်ႇလူင်တူၵ်းသႂ်ႇၼႂ်းဝၢင်းႁိူၼ်းၵူၼ်းမိူင်း ဝၢၼ်ႈၵုင်းသႃႇၸႄႈဝဵင်းလႃႈသဵဝ်ႈ ၵူၼ်းႁိူၼ်းတႄႉဢမ်ႇတိူဝ်ႉ ႁိူၼ်းယေးတႄႉလူႉၵွႆလင်ၼိုင်ႈ။
ဝၼ်းတီႈ 6/11/2023 ယၢမ်းၶမ်ႈ 8 မူင်း သဵင်ၵွင်ႈတႅၵ်ႇ ၼႂ်းၵႄႈ ဝၢၼ်ႈၵုင်းသႃႇ လႄႈ ဝၢၼ်ႈပၢင်ႇၸူင်၊ ၵူၼ်းဝၢၼ်ႈ ဢွၼ်ၵၼ်ပၢႆႈသွၼ်ႈၼႂ်းလုၵ်းပဵမ်ႇ၊ မၢၵ်ႇလူင်လုၵ်ႈၼိုင်ႈ တူၵ်းသႂ်ႇႁိူၼ်းၵူၼ်းဝၢၼ်ႈၵုင်းသႃႇ လင်ၶႃးႁိူၼ်းပွင်ႇပဵဝ် ႁိူၼ်းယေးၵေႃႈလူႉၵွႆ။
ၵူၼ်းဝၢၼ်ႈၵုင်းသႃႇ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈဝႃး ငိၼ်းသဵင်ၵွင်ႈတႅၵ်ႇလႄႈ ၵူၼ်းဝၢၼ်ႈပၢႆႈလူင်း လုၵ်းဢွၼ်တၢင်း ။ ၵွပ်ႈၼၼ်လႄႈ ဢမ်ႇမီးလွင်ႈတိူဝ်ႉမၢတ်ႇ။ လင်ႁိူၼ်းတႄႉပွင်ႇပဵဝ်၊ သိုင်ႇၾႆးလႄႈသုမ်ႉၵေႃႈၵွႆ၊ တၢင်းဝၢၼ်ႈ ပၢင်ၸူင်ၵေႃႈ တူၵ်းႁူၺ်ႇၼိုင်ႈ ၼၼ်ႉတႄႉ ဢမ်ႇတိူဝ်ႉၺႃးသင် ” – ဝႃႈၼႆ။
မၢၵ်ႇလူင်ဢၼ်တူၵ်းသႂ်ႇႁိူၼ်းၵူၼ်းဝၢၼ်ႈၵုင်းသႃႇၼႆႉ ၵူၼ်းပိုၼ်ႉတီႈ လၢမ်းၶၢတ်ႈဝႃႈ ပဵၼ်မၢၵ်ႇလူင်ဢၼ် သိုၵ်းမၢၼ်ႈပိုတ်းယိုဝ်းၼႆယဝ်ႉ။
ပၢင်ႇၸူင်၊ ၵုင်းသႃႇ ၼႆႉ မီးၸဵင်ႇႁွင်ႇဝၼ်းဢွၵ်ႇဝဵင်းလႃႈသဵဝ်ႈ။
တႄႇဢဝ် ဝၼ်းတီႈ 27/10/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၸုမ်းဢူၺ်းလီ ပွတ်းႁွင်ႇ မိူၼ်ၼင်ႇ – သိုၵ်းတ ဢၢင်း TNLA ၊ သိုၵ်းၵဝ်ႈၵၢင်ႉ MNDAA ဢိၵ်ႇပႃး ၸုမ်း PDF ႁူမ်ႈၵၼ် လူမ်ႇယိုဝ်း တပ်ႉသိုၵ်းမၢၼ်ႈ ၶမယ 366 ဢၼ် ပၵ်းဝႆႉတီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ တင်း ၼမ် တိူဝ်ႉၺႃးႁိူၼ်း ၵူၼ်းဝၢၼ်ႈၵၢတ်ႇ ထုၵ်ႇၾႆးမႆႈ 30 လင်ပၢႆ။
ဝၼ်းတီႈ 6/11/2023 ယၢမ်းၵၢင်ၼႂ်ၸဝ်ႉၵေႃႈ မၢၵ်ႇလူင် 2 လုၵ်ႈ တူၵ်းသႂ်ႇ တီႈသိုင်ႇဝႆႉၵႃး ၼၢႆးယႃႊၵွႆႇ မၢၼ်ႈဝဵင်းလူင် ထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸေႊ ၸႄႈမိူင်းၶၢင် တႅၵ်ႇတိူဝ်ႉသႂ်ႇ သိုင်ႇလႄႈတင်းၵႃး ထုၵ်ႇၾႆးမႆႈ ၵႂႃႇ တင်းမူတ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ