ၼႂ်းဝူင်ႈၼႆ့ ၶၼ်ၶူဝ်းၵုၼ်ႇ တီႈၸႄႈဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ ပုင်ႈၶိုၼ်ႈႁႅင်း ၊ လိူဝ်ၼၼ့် သိုၵ်းမၢၼ်ႈ တတ်းၶၢတ်ႇဝႆ့ သၼ်ယႃးလႅင်းၾူၼ်းလႄႈ ယၢပ်ႇၽိုတ်ႇပႃးတႃႇ တိတ်းတေႃႇၵပ်းသိုပ်ႇၸူးၵၼ် ။
တႄႇဝၼ်းတီႈ 27 လိူၼ်ထူၼ်ႈသိပ်းပူၼ့်မႃးၼႆ့ ၸုမ်းဢူၺ်းလီပွတ်းႁွင်ႇ တင်း သိုၵ်းမၢၼ်ႈယိုတ်းမိူင်း ပဵၼ်ပၢင်တိုၵ်းၵၼ်မႃး ၼႂ်းၸိုင်ႈတႆးပွတ်းႁွင်ႇ လၢႆလၢႆၸႄႈဝဵင်း၊ သၢႆသဵၼ်ႈတၢင်းၶၢတ်ႇသေ ၶၼ်ၶူဝ်းၵုၼ်ႇပုင်ႇၶိုၼ်ႈမႃးလၢႆလၢႆပုၼ်ႈ၊ လိူဝ်ၼၼ့် တႄႇဝၼ်းတီႈ 2 ၼႆႉမႃး သိုၵ်းမၢၼ်ႈတတ်းၶၢတ်ႇလႅင်းၾူၼ်း ၼႂ်းၸႄႈဝဵင်းလၢဝ်ႇၵၢႆး တေႃႇထိုင်ယၢမ်းလဵဝ် ၵပ်းသိုပ်ႇတိတ်းတေႃႇၵၼ်ပႆႇလႆႈ။
တီႈၸႄႈဝဵင်းလၢဝ်ႇၵၢႆးၼႆ့ ၵူႈပွၵ်ႈ ၶၼ်ၶဝ်ႈသၢၼ် ၼိုင်ႈထူင်လႂ် 1 သႅၼ် – ယၢမ်းလဵဝ် လႆႈပၼ် မွၵ်ႈ 4 သႅၼ်၊ ၶၼ်ၶႆႇၵႆႇ ၊ ၶဝ်ႈသွႆး ၸိူဝ်းၼႆ့ ပုင်ႈၶိုၼ်ႈမႃးႁႅင်း ၊ လၢၼ့်ၶၢႆၵုၼ်ႇၵမ်ႈၼမ် ပိၵ့်ဢိုတ်းဝႆ့ ၊ ၽွင်းပိုတ်ႇလၢၼ့် ၵူၼ်းမိူင်းႁိမ်ၵၼ်ၵႂႃႇသိုဝ့် ၊ မီးငိုၼ်းယူႇၵေႃႈ ၶႂ်ႈလႆႈၼမ်ဢမ်ႇလႆႈ ၊ သိုဝ်ႉလႆႈၸွမ်းၼင်ႇတီႈလၢၼ့် ၶၢႆပၼ်ၵူၺ်းၼႆ ၵူၼ်းမိူင်းလၢဝ်ႇၵၢႆးၵေႃ့ၼိုင်ႈ လၢတ်ႈ။ ၵွပ်ႈၼႆ ၶူဝ်းၵုၼ်ႇတၢင်းဝဵင်းလၢဝ်ႇၵၢႆးၼႆႉ လႆႈဢဝ်တၢင်းမိူင်းၶႄႇမႃးၶၢႆ၊ ဢိင်ၼိူဝ်ၶၼ်ငိုၼ်းသေ ၵႃႈၶၼ်ၵုၼ်ႇ ၵေႃႈ ပိူင်ႈၵၼ် ဝႃႈၼႆ။
ၸွမ်းၼင်ႇသိုဝ်ႇထႆး Thai ပိုၼ်ၽၢဝ်ႇၵႂႃႇဝႃႈ တီႈဝဵင်းလၢဝ်ႇၵၢႆးၼႆ့ ႁႅင်းၵၢၼ်ၼွၵ်ႈမိူင်း မိူၼ်ၼင်ႇ ႁႅင်းၵၢၼ်ၵူၼ်းမိူင်းထႆး 160 ပၢႆလႄႈ ႁႅင်းၵၢၼ် မိူင်းၼီႊပေႃႊလ် ၊ လၢဝ်း ၊ ဢီႊတီႊရူဝ်ႊပီႊယိူဝ်ႊ ႁူမ်ႈသဵၼ်ႈ မွၵ်ႈ 500 ၶမ်ဝႆ့ၼႂ်းဝဵင်း ဝႃႈၼႆ။
