ပၢင်တိုၵ်း 1027 သိုၵ်းဢူၺ်းလီ 3 ၸုမ်းလႄႈသိုၵ်းမၢၼ်ႈပိုတ်းယိုဝ်းၵၼ်တီႈ လၢဝ်ႇၵၢႆးႁၢဝ်ႈႁႅင်း မိူဝ်ႈဝၼ်းတီႈ 3 ၵျၼ်ႊၼိဝ်ႊရီႊ မၢၵ်ႇလူင်ပူၼ်ႉၶဝ်ႈၵႂႃႇတူၵ်းၼႂ်းမိူင်းၶႄႇ ႁဵတ်းႁႂ်ႈၵူၼ်းမိူင်းၶႄႇ မၢတ်ႇၸဵပ်း 5 ၵေႃႉ။ ဝၼ်းတီႈ 4 လူင်ပွင်ၸိုင်ႈၶႄႇ ဢွၵ်ႇမႃးမွၵ်ႇလၢတ်ႈသႄႉသွမ်း ၸုမ်းသိုၵ်း ဢၼ်ၵဵဝ်ႇၶွင်ႈသေ ပၼ်ၾၢင်ႉႁၢဝ်ႈႁႅင်းဝႃႈ ပၢင်တိုၵ်းၼႂ်းၸိုင်ႈတႆးပွတ်းႁွင်ႇ ထုၵ်ႇလႆႈၵိုတ်း ၵမ်းလဵဝ်ယဝ်ႉဝႃႈၼႆ။
ပိူင်ပဵၼ်ဢၼ်ၼႆႉ ပဵၼ်ဢၼ်လွၵ်ႇငိုတ်ႈလွင်ႈႁူမ်ႇလူမ်ႈၶူဝ်းၶွင်ႁိူၼ်းယေးလႄႈ သၢႆၸႂ်ၵူၼ်းမိူင်း လႅၼ်လိၼ် ၶႄႇ ၊ ၼင်ႇႁိုဝ်တေဢမ်ႇပဵၼ်ထႅင်ႈၼၼ်ႉ တၵ်းလႆႈဢဝ်လိူင်ႈ ၸုမ်းၵဵဝ်ႇၶွင်ႈ ႁႂ်ႈထိုင်တီႈ။ တၵ်းလႆႈၵိုတ်းပၢင်တိုၵ်းပႅတ်ႈဝႆးဝႆးၵမ်းလဵဝ် – ၼႆ ၽူႈၶၢၼ်ပၢၵ်ႇ ႁွင်ႈၵၢၼ်ၾၢႆႇ ၼွၵ်ႈမိူင်း မိူင်းၶႄႇ မိတ်ႉသတိူဝ်ႇ ဝင်ပိင်းပိင်း မွၵ်ႈလၢတ်ႈသႄႉသွမ်း ၵႂႃႇၼင်ႇၼႆ။
မၢၵ်ႇလူင်ၼႆႉ လုၵ်ႉတၢင်းဝဵင်းလၢဝ်ႇၵၢႆးၶၢမ်ႈလႅၼ်လိၼ်ၵႂႃႇ တူၵ်းသႂ်ႇတီႈ ထႅဝ်သုမ်ႉၶၢႆၶူဝ်း ႁိမ်းၵၢတ်ႇၼႂ်းဝဵင်းၼၢင်သၢင် မိူင်းၶႄႇ။ ပဵၼ်ၼမ်ႉမိုဝ်းၸုမ်းလႂ်ၼႆတေႃႇထိုင်ဝၼ်းမိူဝ်ႈၼႆႉ ပႆႇဢွၵ်ႇမႃးမွၵ်ႇလၢတ်ႈယွမ်းႁပ်ႉ။
ၾင်ႇတၢင်းမိူင်းၶႄႇတႄႉလၢတ်ႈဝႃႈ မၢၵ်ႇလူင်ၼႆႉလုၵ်ႉတၢင်းလွႆပႂၢႆႉ 2202 ပိုၼ်ႉတီႈဢၼ်လမ်ႇလွင်ႈ တႃႇၵုမ်းဝဵင်းလၢဝ်ႇၵၢႆးမႃးလႄႈ ပဵၼ်ၽႂ်ယိုဝ်းမႃးဢၼ်ဝႃႈၼၼ်ႉလႅပ်ႈလၢမ်းႁူႉလႆႈယူႇ – လွၵ်ႇလႅၼ်ၽၢမ်းတႃတိုၼ်းဢမ်ႇလႆႈ – ၶၢဝ်ႇပီႇပီႇသီႇႁၢႆးငၢၼ်းဝႆႉၼင်ႇၼႆ။
ပၢင်တိုၵ်းတီႈလႅၼ်လိၼ်လႄႈၼႂ်းၸိုင်ႈတႆးပွတ်းႁွင်ႇၼႆႉ ၾၢႆႇတၢင်းမိူင်းၶႄႇ ၶႂ်ႈႁႂ်ႈၸဵဝ်းၵိုတ်း ယိုတ်း ၼႃႇယဝ်ႉ။ ၶၢမ်ႇယူႇၵၢင်သေ ႁွင်ႉၽူႈတၢင်တူဝ်တင်းသွင်ၾၢႆႇမႃးဢုပ်ႇၵၼ် တီႈဝဵင်းၶုၼ်ႊမိင် မိူင်းၶႄႇ 2 ပွၵ်ႈယဝ်ႉ။ ႁွင်ႉဝႆႉႁႂ်ႈၵႂႃႇႁူပ်ႉၵၼ်ထႅင်ႈၼႂ်းဝၼ်းတီႈ 7 ထိုင် 9 လိူၼ်ၵျၼ်ႊၼိဝ်ႊရီႊၼႆႉ။
