ဝၼ်းတီႈ 5/11/2023 မိူဝ်ႈၼႆႉတင်ႈတႄႇၵၢင်ၼႂ် 6 မူင်းတေႃႇထိုင် ယၢမ်းလဵဝ်ၶၢဝ်းတႅမ်ႈၶၢဝ်ႇ ၵၢင်ဝၼ်းတဵင်ႈၼႆႉ သိုၵ်းလွႆ TNLA ဝႅတ်ႉဝႆႉႁူင်းပလိၵ်ႈလႄႈလုမ်းၾၢႆႇၽွင်းငမ်းၵူႈလွင်ႈလွင်ႈ ဝဵင်းၼမ်ႉၶမ်း ။
သဵင်ၵွင်ႈတႄႉဢမ်ႇပႆႇတႅၵ်ႇ၊ ၵူၼ်းမိူင်းဝဵင်းၼမ်ႉၶမ်း လႆႈယူႇၼႂ်းငဝ်းလၢႆးဢၼ်လႆႈမႆႈၸႂ်။ ၵမ်ႈၽွင်ႈလၢမ်းၶၢတ်ႈဝႃႈ ငဝ်းလၢႆးဢၼ်ယဵၼ်ဝႆႉယူႇၸိူင်ႉၼႆၼႆႉ သွင်ၾၢႆႇတိုၵ်ႉဢုပ်ႇဢူဝ်းငူပ်ႉငိ တႃႇတပ်ႉပလိၵ်ႈတေဝၢင်းၶိူင်ႈတင်းမူတ်း ၼႆယူႇ။
လိူဝ်ၼၼ်ႉၵူၼ်းမိူင်း ၸိူဝ်းဢွၵ်ႇႁိူၼ်းႁႃသိုဝ်ႉတၢင်းၵိၼ်ယမ်ႉၸိူဝ်းၼၼ်ႉလႄႈသင် ၸိူဝ်းၵႂႃႇႁဵတ်းၵၢၼ်တၢင်ႇၸိူဝ်ႉတၢင်ႇလွင်ႈၸိူဝ်းၼၼ်ႉလႄႈသင် ၺႃးသိုၵ်းတဢၢင်းလိုပ်ႈပွၵ်ႈႁိူၼ်းၶိုၼ်း ဢမ်ႇပၼ်ဢွၵ်ႇႁိူၼ်းယေးလႄႈၼႂ်းၵၢင်ဝဵင်းၼမ်ႉၶမ်း ယဵၼ်သီႇသီႇဝႆႉ။
တေလၢတ်ႈတေႃႇၵၼ်တင်းလၢႆႊ တၢင်းၾူၼ်းၵေႃႈ သိုၵ်းမၢၼ်ႈတတ်းသၼ်ယႃးၾူၼ်း ဢိၼ်ႇတႃႇၼႅတ်ႉဝႆႉ လႆႈၸႂ်ႉ လႅင်းၾူၼ်းၶႄႇဝႆႉဢၼ်လဵဝ် ၵိၼ်းၸႂ်တႄႉတႄႉ ၵူၼ်းၼမ်ႉၶမ်းလၢတ်ႈၼင်ႇၼႆ။
ၾၢႆႇၼိုင်ႈၵေႃႈ ၵူၼ်းၼမ်ႉၶမ်းလၢတ်ႈဝႃႈယၢမ်းလဵဝ် သိုၵ်း TNLA ႁႅၼ်းသိုၵ်းတႃႇတေဝႅတ်ႉလွမ်ႉတႃႇလူမ်ႇယိုဝ်းတပ်ႉသိုၵ်းမၢၼ်ႈ သၶၢၼ်းတိတ်ႉ (စခန်းသစ်ကုန်း) ဢၼ်ယၼ်ႇပၵ်းတီႈဝဵင်းၼမ်ႉၶမ်း ဝႆႉယူႇဝႃႈၼႆ။