ႁိူၼ်းၵူၼ်းဝၢၼ်ႈ တီႈၼႂ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ထုၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ၾႆးမႆႈၵႂႃႇ 30 လင်ပၢႆလႄႈ ဝတ်ႉမုၼ်ၸဝ်ႈ လင်ၼိုင်ႈ။

တႄႇဢဝ် ဝၼ်းတီႈ 27/10/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၸုမ်းဢူၺ်းလီ ပွတ်းႁွင်ႇ မိူၼ်ၼင်ႇ – သိုၵ်းတ ဢၢင်း TNLA ၊ သိုၵ်းၵဝ်ႈၵၢင်ႉ MNDAA ဢိၵ်ႇပႃး ၸုမ်း PDF ႁူမ်ႈၵၼ် လူမ်ႇယိုဝ်း တပ်ႉသိုၵ်းမၢၼ်ႈ ၶမယ 366 ဢၼ် ပၵ်းဝႆႉတီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ တင်း ၼမ် တိူဝ်ႉၺႃးႁိူၼ်း ၵူၼ်းဝၢၼ်ႈၵၢတ်ႇ ထုၵ်ႇၾႆးမႆႈ 30 လင်ပၢႆ။

ၵူၼ်းပိုၼ်ႉတီႈ ၼႂ်းဢိူင်ႇမိူင်းၵႅတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းတၢင်း ၶဝ်ပဵၼ်ပၢင်တိုၵ်းၵၼ်မႃး 8 ဝၼ်းၼႆႉ မၢၵ်ႇလူင် သိုၵ်းမၢၼ်ႈတင်း ၶိူင်ႈမိၼ်ၶဝ် ပွႆႇမၢၵ်ႇသႂ်ႇႁိူၼ်း ၵူၼ်းဝၢၼ်ႈၵၢတ်ႇ ထုၵ်ႇၾႆးမႆႈၵႂႃႇ 30 လင်ပၢႆ။ လိူဝ်ထႅင်ႈ တႃႇ 30 ပၢႆတႄႉ တိူဝ်ႉၺႃးၸၢၵ်ႇမၢၵ်ႇဝႆႉ။ ၵူၼ်းဝၢၼ်ႈၵၢတ်ႇတႄႉ ဢွၼ်ၵၼ်ပၢႆႈမူတ်းယဝ်ႉ။ ယဝ်ႉၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇသႂ်ႇတီႈ ၵျွင်းလူင်မိူင်းၵႅတ်ႈ လူႉၵွႆထႅင်ႈတင်းလင်”- ဝႃႈၼႆ။

လိူဝ်ၼၼ်ႉ ၸၢၵ်ႇမၢၵ်ႇသိုၵ်းမၢၼ်ႈ တိူဝ်ႉသႂ်ႇထႅင်ႈႁိူၼ်းယေး ၵူၼ်းဝၢၼ်ႈလူင် လူႉၵွႆထႅင်ႈ 3 လင်လႄႈ တိူဝ်ႉၺႃးၵူၼ်းဝၢၼ်ႈ လႆႈမၢတ်ႇၸဵပ်းၸွမ်း ၵေႃႉၼိုင်ႈ။

“တီႈဝၢၼ်ႈလူင်ၼႆႉ တိူဝ်ႉၺႃးၸၢၵ်ႇသိုၵ်းမၢၼ်ႈ လူႉၵွႆ 3 လင် ႁိူၼ်းယေးၼၼ်ႉတႄႉ တိူဝ်ႉၺႃးလဵၵ်းၽိူၵ်ႇ ၽႃႇႁိူၼ်း ၸိူဝ်းၼႆႉ ၵူၺ်း။ ယဝ်ႉၵေႃႈ ၸၢၵ်ႇမၢၵ်ႇၶဝ် တိူဝ်ႉသႂ်ႇ လုင်းလူႇ ဢႃယု 65 ပီ တီႈၼႃႈဢူၵ်းလႄႈ ၶႃလူင် မၼ်းၸၢႆး။ ယၢမ်းလဵဝ် ယူႇတီႈ ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈ လႆႈယူတ်းယႃဝႆႉပၼ်။ တီႈတပ်ႉသိုၵ်းမၢၼ်ႈ မိူင်းၵႅတ်ႈၼႆႉ ယူႇတီႈ ၸုမ်းဢူၺ်းလီၶဝ် ပႆႇသိမ်း လႆႈ။ ၵွပ်ႈၼႆလႄႈ ၶဝ်ယိုဝ်းၵၼ်မႃးႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ်ၼႆႉ”- ၵူၼ်းပိုၼ်ႉတီႈ ၼႂ်းဢိူင်ႇမိူင်ႈၵႅတ်ႇ သိုပ်ႇ လၢတ်ႈၼႄၼင်ႇၼႆ။

ယွၼ်ႉပၢင်တိုၵ်းၼႆႉသေ ၵူၼ်းၼႂ်းဢိူင်ႇမိူင်းၵႅတ်ႈ ဢွၼ်ၵၼ်ပၢႆႈၽေးသိုၵ်း ၵႂႃႇသွၼ်ႈယူႇဝႆႉ ၼႂ်းသူၼ်ယၢင်လႄႈ တီႈ ဢိူင်ႇမိူင်းယေႃ ၸိူဝ်းၼၼ်ႉဝႆႉ။ ၼႂ်းဢိူင်ႇမိူင်းၵႅတ်ႇၼႆႉ တင်းမူတ်းမီး 12 ဝၢၼ်ႈ ၼႂ်းၼၼ်ႉ တႃႇ 7 မူႇဝၢၼ်ႈတႄႉ လႆႈပၢႆႈၽေးသိုၵ်းဝႆႉ ဝႃႈ ၼႆ။

မိူဝ်ႈၼႆႉ ဝၼ်းတီႈ 4/11/2023 ယၢမ်းၵၢင်ဝၼ်း ၸုမ်းဢူၺ်းလီပွတ်ႇ သိုၵ်းတဢၢင်း၊ သိုၵ်းၵဝ်ႈၵၢင်ႉလႄႈ ၸုမ်း PDF ႁူမ်ႈ ၵၼ် လေႃႇတိုၵ်း တီႈတပ်ႉသိုၵ်းမၢၼ်ႈ ဢိူင်ႇမိူင်းၵႅတ်ႈၼႆႉထႅင်ႈ ႁၢဝ်ႈႁႅင်း။ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် 3 လမ်း လုၵ်ႉတၢင်း လႃႈသဵဝ်ႈမႃးပွႆႇမၢၵ်ႇသႂ်ႇထႅင်ႈ တင်းၼမ် ၵူၼ်းပိုၼ်ႉတီႈ ၼႂ်းဢိူင်ႇမိူင်းၵႅတ်ႈလၢတ်ႈ။