ဝၼ်းတီႈ 3/11/2023 ယၢမ်းၵၢင်ၼႂ်ၸဝ်ႉ ၸုမ်းဢူၺ်းလီပွတ်းႁွင်ႇလႄႈ သိုၵ်းမၢၼ်ႈ သိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်းၼႂ်းၸႄႈဝဵင်းၼမ်ႉၶမ်း မူႇၸေႊ ။ သိုၵ်းမၢၼ်ႈတတ်း သၢႆၾူၼ်း သၢႆဢိၼ်ႊထိူဝ်ႊၼႅတ်ႊ ၵူၼ်းမိူင်းဢမ်ႇၸၢင်ႈတိတ်း တေႃႇႁႃၵၼ်။
တီႈဝဵင်းၼမ်ႉၶမ်းၼႆႉ ဝၢႆးလင်သိုၵ်းဢူၺ်းလီယိုတ်းလႆႈ ပၢင်သဝ်းသိုၵ်းမၢၼ်ႈ ပလိၵ်ႈမၢၼ်ႈ တီႈႁူဝ်ၶူဝ်ၽႅၼ်ၼမ်ႉမၢဝ်းယဝ်ႉၼၼ်ႉ သိုၵ်းမၢၼ်ႈဢဝ်ၶိူင်ႈမိၼ် မႃးပၼ်ႇလဵပ်ႈ ၼိူဝ်ဝဵင်း ၼမ်ႉၶမ်းသေ ပိုတ်းယိုဝ်းမၢၵ်ႇလူင်လူင်း။ ၵူၼ်းမိူင်းၼမ်ႉၶမ်းဢမ်ႇၸၢင်ႈဢွၵ်ႇႁိူၼ်းယေး။
လိူဝ်ၼၼ်ႉဢမ်ႇၵႃး ထိုင်မႃးယၢမ်းၵၢင်ဝၼ်းတဵင်ႈ ၶိုၼ်းတတ်းသၼ်ယႃး လႅင်းၾူၼ်း လႅင်းဢိၼ်ႊထိူဝ်ႊၼႅတ်ႊထႅင်ႈလႄႈ ဢမ်ႇၸၢင်ႈၵပ်းသိုပ်ႇတိတ်းတေႃႇႁႃၵၼ်။
“တီႈဝဵင်းၼမ်ႉၶမ်းၼႆႉ ၵွၼ်ႇၼႃႈၼႆႉ ၸႂ်ႉလႆႈသၼ်ယႃးၾူၼ်း Mytel ဢၼ်လဵဝ်ၵူၺ်း၊ တေႃႇထိုင်ယၢမ်းဝၢႆးဝၼ်း Mytel ၵေႃႈဢမ်ႇလႆႈ ဢိၼ်ႊထိူဝ်ႊၼႅတ်ႊၵေႃႈဢမ်ႇလႆႈသေဢၼ်။ ၶၢဝ်းယၢမ်းႁူဝ်ၶမ်ႈ 4 မူင်းၶိုင်ႈၼႆႉ သဵင်ၵွင်ၶိုၼ်းတႅၵ်ႇၶိုၼ်း၊ ၸင်ႇႁႃတိတ်းတေႃႇၾူၼ်းလႆႈၶိုၼ်းဢိတ်းဢွတ်း။ လႆႈငိၼ်းဝႃႈသဵင်ၵွင်ႈတႅၵ်ႇၼႂ်းဝဵင်းၼႆလူးၵွၼ်ႇ။ ႁဵတ်းႁႂ်ႈၵူၼ်းတၢင်ႇတီႈတၢင်ႇဝဵင်းပဵၼ်ဢၼ်မႆႈၸႂ် ပီႈၼွင်ႉ မူႇၸေႊ ၼမ်ႉၶမ်းတႄႉတႄႉ”။ – ၵူၼ်းၼမ်ႉၶမ်း ႁွတ်ႈလႃႈသဵဝ်ႈၵေႃႉၼိုင်ႈ လၢတ်ႈၼင်ႇၼႆ။
မိူဝ်ႈဝႃး ဝၼ်းတီႈ 2/11/2023 ယၢမ်းႁူဝ်ၶမ်ႈ 6 မူင်းသမ်ႉ သိုၵ်းမၢၼ်ႈတတ်းသၼ်ယႃးၾူၼ်းတီႈဝဵင်းမူႇၸေႊ၊ ၼွၵ်ႈၼိူဝ် Mytel ၼၼ်ႉ ဢၼ်ပဵၼ် MPT ၊ Telenor ၊ Ooredoo ၸိူဝ်းၼႆႉတႄႉဢမ်ႇၵပ်းသိုပ်ႇလႆႈသေဢၼ်ယဝ်ႉ ၵူၼ်းမိူင်းမူႇၸေႊလၢတ်ႈၼင်ႇၼႆ။
