ၵူၼ်းမူႇၸေႊ ပၢႆႈၽေးသိုၵ်း ၵႂႃႇမူၵ်းသွၼ်ႈဝႆႉၼႂ်းလုၵ်းလိၼ်(လုၵ်းပဵမ်ႇ) ထုၵ်ႇလုၵ်းလိၼ်လၼ်ႇတဵင်သႂ်ႇ သွင်မႄႈလုၵ်ႈ လူႉတၢႆထင်တီႈ။

ပူၼ်ႉမႃး မိူဝ်ႈဝၼ်းတီႈ 1/11/2023 ယၢမ်းႁူဝ်ၶမ်ႈ သွင်မႄႈလုၵ်ႈ ၸၢဝ်းၶၢင် ပၢႆႈၽေးသိုၵ်းသေ ၵႂႃႇမူၵ်းသွၼ်ႈဝႆႉၼႂ်းလုၵ်းလိၼ် ဢၼ်မီးဝႆႉၼႂ်းသူၼ်ၶဝ် တီႈဝၢၼ်ႈၼမ်ႉၶူမ် ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထုၵ်ႇလုၵ်းလၼ်ႇတဵင်သႂ်ႇ လူႉတၢႆၶမ်ၼႂ်းလုၵ်း တင်းသွင်။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ပဵၼ်သွင်မႄႈလုၵ်ႈ ငိၼ်းသဵင်မၢၵ်ႇသေၼႅတ်ႈပၢႆႈၵႂႃႇ မူၵ်းဝႆႉ တီႈၼႂ်းလုၵ်းလိၼ် ဢၼ်ၶဝ်ႁဵတ်းဝႆႉ တီႈၼႂ်းသူၼ်ၶဝ်ၼၼ်ႉ သမ်ႉဢဝ်လုၵ်းလၼ်ႇတဵင်သႂ်ႇၶႃမႄႈလုၵ်ႈ လူႉတၢႆၶမ်ၼႂ်း လုၵ်းၼၼ်ႉၶႃႈဢေႃႈ”- ဝႃႈၼႆ။

သွင်မႄႈလုၵ်ႈ ဢၼ်လႆႈလူႉတၢႆ ၶမ်ၼႂ်းလုၵ်းလိၼ်ၵႂႃႇၼၼ်ႉ ပဵၼ်ၸၢဝ်းၶၢင် ၵေႃႉပဵၼ်မႄႈ ၸိုဝ်ႈႁွင်ႉ တေႃႇၶေႃးဝုၼ် (ဒေါ်ခေါဝန်င်) ဢႃယု 45 ပီလႄႈ ၵေႃႉပဵၼ်လုၵ်ႈၸၢႆး ၸိုဝ်ႈႁွင်ႉ မွင်ႇတၢၼ်ႇပွၵ်ႉၶွင်ႇၸွၼ်း (မောင်တန်ဘောက်ခေါင်ဇောင်း) ဢႃ ယု 12 ၶူပ်ႇ။ မိူဝ်ႈၼႆႉ ဝၼ်းတီႈ 3 ၸင်ႇပူၼ်ႉၶၢပ်ႈတူဝ် သွင်မႄႈလုၵ်ႈၵႂႃႇ ၸွမ်းၼင်ႇၾိင်ႈႁိၵ်ႈႁွႆး ၼႂ်းပိုၼ်ႉတီႈမီးၼၼ်ႉ ဝႃႈၼႆ။

ၼႂ်းဝၼ်းတီႈ 1/11/2023 ယၢမ်းၵၢင်ၼႂ် 9 မူင်းပၢႆ ၼၼ်ႉၵေႃႈ မၢၵ်ႇလူင် သိုၵ်းမၢၼ်ႈ တူၵ်းသႂ်ႇၵူၼ်းမိူင်း ပွၵ်ႉ 8 ဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လူႉတၢႆထင်တီႈ 1 ၵေႃႉ ၼႆယဝ်ႉ။