သိုၵ်းဢူၺ်းလီပွတ်းႁွင်ႇ ပိုတ်ႇၼႃႈသိုၵ်း ပၢင်တိုၵ်း 1027 တေႃႇၸုမ်းသိုၵ်းမၢၼ်ႈယိုတ်းမိူင်းၼႆႉ သိုၵ်းၵႅတ်ႇၶႄၵူၼ်းမိူင်း 14 ၸုမ်း ၵမ်ႉထႅမ်ပၼ်ႁႅင်း ၸုမ်းဢူၺ်းလီပွတ်းႁွင်ႇ ၶၢဝ်ႇပီႇပီႇသီႇ ႁၢႆးငၢၼ်းဝၼ်းတီႈ 1 ၼူဝ်ႊဝႅမ်ႊပိူဝ်ႊ ၼင်ႇၼႆ ။
ၸုမ်းသိုၵ်းၵႅတ်ႇၶႄၵူၼ်းမိူင်း ၸိူဝ်းၵမ်ႉထႅမ် သိုၵ်းဢူၺ်းလီပွတ်းႁွင်ႇ ၼၼ်ႉတႄႉ ပဵၼ်ၸုမ်းသိုၵ်းဢၼ်မီးၼႂ်းတိူင်းၸေႈၵႅင်း၊ မၵူၺ်း၊ ၼမ်ႉၵဵဝ်ႇ၊တႃႈၵုင်ႈ ၊ မိူင်းၶျၢင်း၊ မိူင်းရၶႅင်ႇ ဢိၵ်ႇပႃးသိုၵ်းCNF ၸိူဝ်းၼႆႉ။
ၼွၵ်ႈလိူဝ်ၼႆႉသမ်ႉဢၼ်ပဵၼ် ၸုမ်းသိုၵ်း မူဝ်းၵျဵဝ်းပျွၵ်ႉၵျႃး၊ သိုၵ်းလုၵ်ႈႁဵၼ်းမိူင်းရၶႅင်ႇ၊ သိုၵ်းၵူၼ်းၼုမ်ႇ ၼမ်ႉၵဵဝ်ၸိူဝ်းၼႆႉၵေႃႈ မီးၵၢင်ၸႂ်ၶႂ်ႈႁူမ်ႈႁွမ်းၶဝ်ႈပႃးၼႂ်းပၢင်တိုၵ်း ဝႃႈၼႆလူးၵွၼ်ႇ။
ပၢင်တိုၵ်းဢၼ်ပဵၼ်ၼႂ်းၸိုင်ႈတႆးပွတ်းႁွင်ႇယၢမ်းလဵဝ်ၼႆႉ ၸုမ်းဢူၺ်းလီပိုၼ်ၽၢဝ်ႇဝႃႈ ယိုတ်းလႆႈတပ်ႉ ပၢင်သဝ်းသိုၵ်းမၢၼ်ႈ 90 ပၢႆယဝ်ႉဝႃႈၼႆသေတႃႉ ၊ ပၢင်တိုၵ်းၼႆႉတုမ်ႉတိူဝ်ႉၵူၼ်းမိူင်းၵမ်းသိုဝ်ႈ ၵူၼ်းမိူင်းမၢတ်ႇၸဵပ်းလူႉတၢႆၸွမ်း၊ ႁိူၼ်းယေးလူႉၵွႆၸွမ်း၊ ဢၼ်လႆႈပၢႆႈၽေးၵေႃႈမီးၼပ်ႉႁူဝ်မိုၼ်ႇလႄႈ ၵူၼ်းမိူင်းတႆး ၸိူဝ်းယူႇၼွၵ်ႈမိူင်း ၼႂ်းမိူင်းတႄႉ ဢမ်ႇႁၼ်လီၸွမ်း။
