ၸိုင်ႈတႆးပွတ်းႁွင်ႇလၢႆၸႄႈဝဵင်း သဵင်ၵွင်ႈတႅၵ်ႇပႆႇယဵၼ် ၸုမ်းဢူၺ်းလီပွတ်းႁွင်ႇသၢမ်ပီၼွင်ႉတင်း ၸုမ်းသိုၵ်းမၢၼ်ႈ တိုၵ်ႉသိုပ်ႇပိုတ်းယိုဝ်းၵၼ်၊ ယိုဝ်းၵွင်ႈလူင်၊ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇဝၢၼ်ႈသူၼ်ႁိူၼ်းၵူၼ်းလႄႈ ၵူၼ်းမိူင်းယႆ မႆႈၸႂ်ၵူဝ်ပၢင်တိုၵ်းလၢမ်းထိုင် ဢွၼ်ၵၼ်ၶုတ်းလုၵ်းထႅၼ်ႈ/လုၵ်းပဵမ်ႇဝႆႉႁင်းၽႂ်မၼ်း တႃႇပၢႆႈသွၼ်ႈ။
ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ပၢင်တိုၵ်းတေမႃးထိုင်တၢင်းၼႆႉႁႃႉ ဢမ်ႇထိုင်ႁႃႉ ဢမ်ႇၸၢင်ႈဝႃႈၶႃႈၼႃႇၼေႃႈ ။ ပေႃႈမႄႈၵူၼ်းမိူင်းမၢင်ႁိူၼ်းတႄႉ မႆႈၸႂ်ၵူဝ်ပၢင်တိုၵ်းလၢမ်းထိုင်လႄႈ ဢွၼ်ၵၼ်ၶုတ်းလုၵ်းထႅၼ်ႈ/လုၵ်းပဵမ်ႇဝႆႉ ႁင်းၽႂ်မၼ်းၶႃႈဢေႃႈ ” – ဝႃႈၼႆ။
မိူဝ်ႈလဵဝ် ၸုမ်းသိုၵ်းတဢၢင်း TNLA တူင်ႉၼိုင်ယူႇသဝ်းၸွမ်း တၢင်းဢွၵ်ႇဝဵင်းမိူင်းယႆဝႆႉလႄႈ လွင်ႈၼႆႉၵေႃႈ ၸၢင်ႈႁဵတ်းႁႂ်ႈပဵၼ်ပၢင်တိုၵ်းလႆႈၼႆယဝ်ႉ။
ဢိင်ၼိူဝ်လွင်ႈၼႆႉ ၵူၼ်းမိူင်းယႆၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ် ငိၼ်းဝႃႈ တၢင်းဢွၵ်ႇဝဵင်းၼၼ်ႉ သိုၵ်းလွႆၶဝ် မႃးယူႇတူင်ႉၼိုင်ၸွမ်း လွႆတိုင်းၶမ်း ၊ လွႆလုၵ်းၽၵ်းႁႃႈၸိူဝ်းၼႆႉဝႆႉ ။ ၵူၼ်းဝၢၼ်ႈၸိူဝ်းယူႇႁိမ်းတပ်ႉမၢၼ်ႈ ၸိူဝ်းၼၼ်ႉ ဢွၼ်ၵၼ်ၵူဝ်ၶဝ်ပိုတ်းယိုဝ်းၵၼ်ဢေႃႈ။ မိူၼ်ၼင်ႇႁိမ်း ပွၵ်ႉ 3 ၸိူဝ်းၼၼ်ႉၼႆ တပ်ႉမၢၼ်ႈမီးပဵၼ် 2 တီႈၼႃႇၼေႃ လႆႈမႆႈၸႂ်ဢေႃႈ။ ၵူဝ်သိုၵ်းလွႆၶဝ် မႃးယိုဝ်းသိုၵ်းမၢၼ်ႈလႄႈ မၢင်ႁိူၼ်းၵေႃႈ ဢဝ်ၶဝ်ႈၼမ်ႉတၢင်းၵိၼ် သႂ်ႇဝႆႉ ၼႂ်းလုၵ်းထႅၼ်ႈၼၼ်ႉၽွင်ႈယဝ်ႉ ၼႆဢေႃႈ ” – ဝႃႈၼႆ။
ၵူၼ်းမိူင်းယႆ ၸိူဝ်းယူႇသဝ်းႁိမ်း သဵၼ်ႈတႃႈသၢႆတၢင်းၵႂႃႇမႃး လႃႈသဵဝ်ႈ သီႇပေႃႉ ၸိူဝ်းၼၼ်ႉၵေႃႈ ႁၼ်သိုၵ်းမၢၼ်ႈၵႂႃႇမႃးဝႆႉလႄႈ ယိုင်ႈၶႅၼ်းႁဵတ်းႁႂ်ႈၵူၼ်းမိူင်းမႆႈၸႂ်ထႅင်ႈ။
ၵူၼ်းၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းယူႇႁိမ်း သဵၼ်ႈတၢင်းလူင် ဢၼ်တႆႇၸူး လႃႈသဵဝ်ႈ သီႇပေႃႉၼၼ်ႉ လႆႈႁၼ် သိုၵ်းမၢၼ်ႈမုင်ႈၼႃႈၸူး မိူင်းယႆဝႆႉၼႆဢေႃႈ။ မၢင်ၵေႃႉၵေႃႈ ႁၼ်သိုၵ်းမၢၼ်ႈ လဵပ်ႈဝဵင်းဝႆႉ ၼႆၵေႃႈဝႃႈ ၵူၼ်းမိူင်းၶႅၼ်းတူၵ်းၸႂ်ၼၼ်ႉယဝ်ႉ ” – ဝႃႈၼႆ။
တႄႇဢဝ်ဝၼ်းတီႈ 27/10/2023 ၼၼ်ႉမႃး ပၢင်တိုၵ်းၼႂ်းၵႄႈသိုၵ်းမၢၼ်ႈလႄႈ သိုၵ်းဢူၺ်းလီ MNDAA- TNLA- AA- PDF – BPLA – PLA ၽွမ်ႉႁူမ်ႈၵၼ်ဝႆႉၼႆႉ သိုပ်ႇပဵၼ် ၼႂ်းၸိုင်ႈတႆးပွတ်းႁွင်ႇ လႅၼ်လိၼ်တႆး-ၶႄႇ လူင်းမႃးထိုင် ဝဵင်းၼမ်ႉပွင်ႈ ၵျွၵ်ႉမႄး ၼွင်ၶဵဝ်ၸိူဝ်းၼႆႉ တေႃႇထိုင်ဝၼ်းမိူဝ်ႈၼႆႉ။ တပ်ႉပၢင်သဝ်း သိုၵ်းမၢၼ်ႈၺႃးယိုတ်းၼႆႉပဵၼ်တပ်ႉပၢင်သဝ်း တီႈၼႂ်းၼႃႈလိၼ်ၵဝ်ႈၵၢင်ႉ၊ ၼမ်ႉၶမ်း၊ သႅၼ်ဝီ၊ လႃႈသဵဝ်ႈ၊ ၼွင်ၶဵဝ် ၸိူဝ်းၼႆႉ။
