မိူဝ်ႈၼႆႉ ဝၼ်းတီႈ 31/10/2023 ယၢမ်းၵၢင်ၼႂ် ၼမ်ႉမႄႈၶၢဝ် လူၼ်ႉၾင်ႇ လုပ်ႇထူမ်ႈ ၼႂ်းၵၢင်ဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇၶူင်း လႅၼ်လိၼ်တႆး – ထႆး ႁၢဝ်ႈႁႅင်း လုပ်ႇထူမ်ႈပႃးႁိူၼ်းယေး ၵူၼ်းပိုၼ်ႉတီႈထႅင်ႈတင်းၼမ်။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၼမ်ႉမႄႈၶၢဝ် ၶႃႈဢေႃႈ လႆလူၼ်ႉၾင်ႇၼွင်းထူမ်ႈ ၸွမ်း တၢင်းလူင် ၼႂ်းၵၢင်ဝဵင်းတႃႈၶီႈလဵၵ်းၼႆႉ ႁၢဝ်ႈႁႅင်း။ ယဝ်ႉၵေႃႈ ထူမ်ႈပႃးၼႂ်းႁိူၼ်းယေး ၵူၼ်းဝၢၼ်ႈ ၸိူဝ်းယူႇတီႈၶူင်းယၢၼ်း ၸွမ်းၶၢင်ႈတၢင်းလူင် ၸိူဝ်းၼႆႉထႅင်ႈတင်းၼမ်။ ႁဵတ်းႁႂ်ႈရူတ်ႉၵႃး ၸိူဝ်းၼႆႉ ၵႂႃႇမႃးယၢပ်ႇၽိုတ်ႇလိူဝ်ႁႅင်းတႄႉၶႃႈ”- ဝႃႈၼႆ။

မိူဝ်ႈၶမ်ႈဝႃး ဝၼ်းတီႈ 30/10/2023 ၼႆႉ ယွၼ်ႉၾူၼ်တူၵ်းႁၢဝ်ႈႁႅင်းသေ ႁဵတ်းႁႂ်ႈၼမ်ႉႁူၺ်ႈၼမ်ႉလွႆ လႆထူမ်ႈၼႂ်းၼမ်ႉမႄႈၶၢဝ် လူၼ်ႉၾင်ႇ ၼွင်းထူမ်ႈ ၸွမ်းသဵၼ်ႈတၢင်းလူင် ၼႂ်းၵၢင်ဝဵင်းလႄႈ ၸွမ်းၵိဝ်ႇ ၸိူဝ်းၼႆႉ ႁၢဝ်ႈႁႅင်း။

ပီ 2023 ၼႆႉ ၼႂ်းၸႄႈဝဵင်းတႃႈၶီႈလဵၵ်း၊ ၵဵင်းတုင်လႄႈ မိူင်းသၢတ်ႇ ၸိူဝ်းၼႆႉ ၼမ်ႉၵႆႉလုပ်ႇထူမ်ႈႁၢဝ်းႁႅင်းလိူဝ်သေ ၵူႈပီပူၼ်ႉ မႃး။

ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ ယွၼ်ႉမီးလွင်ႈၶုတ်းၶမ်း ယႃႉထိူၼ်ႇၶိူဝ်းပႃႇမႆႉၼမ်လိူဝ်ၵူႈပီလႄႈ ပေႃး ၾူၼ်တူၵ်းႁၢဝ်ႈႁႅင်းၵေႃႈ ၼမ်ႉႁူၺ်ႈၼမ်ႉလွႆ ၵိုင်ႉၵၢင်ႉလုပ်ႇထူမ်ႈ မႃးၵမ်းလဵဝ် ႁဵတ်းႁႂ်ႈၵူၼ်းပိုၼ်ႉတီႈ ဝဵင်းတႃႈၶီႈလဵၵ်း ဢွၼ် ၵၼ် ထူပ်းတၢင်းယၢပ်ႇၽိုတ်ႇမႃး ၼႆယဝ်ႉ။

ပူၼ်ႉမႃး မိူဝ်ႈဝၼ်းတီႈ 12/10/2023 တႄႇဢဝ် ယၢမ်းၵၢင်ၼႂ် 9 မူင်း ၼမ်ႉတူႈၼွင်းထူမ်ႈ ႁိူၼ်းယေး ၵူၼ်းဝၢၼ်ႈပၢင်ႇလႄႈ ဝၢၼ်ႈၵုင်းမူင်ႈ တင်းမူတ်း 24 လင်။ ယဝ်ႉၵေႃႈ ဝၢၼ်ႈပဵင်းလူင်လႄႈ ဝၢၼ်ႈၵုၼ်ၵျွင်း ႁိူၼ်းယေးၵူၼ်းဝၢၼ်ႈ 3 လင် ထုၵ်ႇ ၼမ်ႉလုပ်ႇၵႂႃႇ လိူဝ်ၼၼ်ႉ တၢင်းမိူင်းယဵၼ်ၵေႃႈ ထုၵ်ႇၼမ်ႉလုပ်ႇထူမ်ႈ သူၼ်ႁႆႈၼႃး ၵူၼ်းမိူင်း ဢမ်ႇယွမ်း 500 ဢေႊၶိူဝ်ႊ ၼႆ ယဝ်ႉ။

ၼွၵ်ႈလိူဝ်ၼၼ်ႉ တၢင်းဝဵင်းသီႇပေႃႉ ၸိူဝ်းၼၼ်ႉၵေႃႈ ထုၵ်ႇၼမ်ႉတူႈလုပ်ႇထူမ်ႈ ၸွမ်းၼႂ်းမူႇဝၢၼ်ႈလႄႈ သူၼ်ႁႆႈၼႃး ဢၼ် ယူႇၸွမ်းႁိမ်း ၾင်ႇၼမ်ႉတူႈ ၸိူဝ်းၼၼ်ႉထႅင်ႈ တင်းၼမ်။ ပၼ်ႁႃ ၽေးသၽႃႇဝ ၵႆႉပဵၼ်မႃးၶိူဝ်းယႂ်း ၼႂ်းမိူင်းတႆး ၸိူင်ႉၼႆၼႆႉ ယွၼ်ႉဝႃႈ ဢွၼ်ၵၼ်တႅပ်းမႆႉ ယႃႉထိူၼ်ႇၶိူဝ်းၼမ် ၼၼ်ႉယဝ်ႉ။