ဝၼ်းတီႈ 29/10/2023 ယၢမ်းၵၢင်ၼႂ် သိုၵ်းမၢၼ်ႈ ၸႂ်ႉၶိူင်ႈမိၼ်ပိုတ်းယိုဝ်း ပွႆႇမၢၵ်ႇႁၢဝ်ႈႁႅင်းလႄႈ မၢၵ်ႇလူင်တူၵ်းသႂ်ႇ ၵျွင်းၽြႃးၵေႃႇရၶႃးဢၼ်မီးၼႂ်းဝၢၼ်ႈၵျွၵ်ႉၵျၢၼ်း ၼႂ်းၸႄႈဝဵင်းၼွင်ၶဵဝ် တိူဝ်ႉၺႃး ၵူၼ်းမၢတ်ႇၸဵပ်း 2 ၵေႃႉ လူႉတၢႆ 1 ၵေႃႉၼႆယဝ်ႉ ။
ၵူၼ်းၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ မၢၵ်ႇၼႆႉ မႃးတိူဝ်ႉသႂ်ႇ ၵျွင်းၵေႃႇရၶႃး ၼႂ်းဝၢၼ်ႈ ၼၼ်ႉဢေႃႈ။တီႈၵျွင်းၼႆႉသမ်ႉ မီးၸဝ်ႈၼင်ႈၵျွင်းပႃးၼိုင်ႈလႄႈ ပေႃႈမႄႈမၼ်းဢေႃႈၼၼ်ႉ။တေလႆႈဝႃႈ တိူဝ်ႉတၢင်း 3 ၵေႃႉ။ ၵေႃႉပဵၼ်ပေႃႈၼၼ်ႉ တိူဝ်ႉႁႅင်းသေ တၢႆပႅတ်ႈ။ၵေႃႉပဵၼ်မႄႈၵေႃႈ တိၼ်မိုဝ်းလႄႈ ၵွၵ်းႁူဝ်မၼ်းၸိူဝ်းၼႆႉ တိူဝ်ႉၸၢၵ်ႇမၢၵ်ႇမၢတ်ႇၸဵပ်းႁႅင်းဝႆႉဢေႃႈ ” – ဝႃႈၼႆ။
ၸုမ်းၸွႆႈတူင်ႇဝူင်းၵူၼ်း ၸွႆႈသူင်ႇတူဝ်ယူတ်းယႃပၼ်တီႈႁူင်းယႃလူင် ၸႄႈဝဵင်းပၢင်ႁူႈ(ပၢင်ဢူႈလူင်)။ထိုင်မိူဝ်ႈလဵဝ် တီႈၸႄႈဝဵင်းၼွင်ၶဵဝ်ၼႆႉ သဵင်ၵွင်ႈသိုၵ်းမၢၼ်ႈလႄႈၸုမ်းယိပ်းၵွင်ႈၵၢင်ႇယိုဝ်းၵၼ် ပႆႇတဵတ်ႇယဵၼ်လႄႈ ၵူၼ်းမိူင်းဢွၼ်ၵၼ်ၶၢႆႉပၢႆႈယၢၼ်ဢွၵ်ႇႁိူၼ်းယေး ဢမ်ႇယွမ်းႁဵင်။
ၵူၼ်းၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ ထိုင်မိူဝ်ႈၼႆႉ ၵၢင်ၼႂ်မွၵ်ႈ 3 မူင်းထိုင် 5 မူင်းၼႆႉ သဵင်ၵွင်ႈလူင် တိုၵ်ႉလင်ယူႇဢေႃႈ။ သဵင်မၼ်းမေႃးမႃးတၢင်း တပ်ႉ ၶမယ114 – 115 ပုၼ်ႉဢေႃႈ။ မၢင်ၵမ်းၵေႃႈ သဵင်မၼ်း မေႃးပၼ်းလူင်ၵႂႃႇၵူႈတီႈၶႃႈယဝ်ႉ ။ ၵူၼ်းဝၢၼ်ႈၶဝ်တႄႉ ဢမ်ႇပေႃးၵိုတ်းၽႂ်ယဝ်ႉၶႃႈ ပၢႆႈၵႂႃႇယူႇတီႈ လွတ်ႈၽေး ၵၼ်။ မၢင်ၸိူဝ်းၵေႃႈ ပၢႆႈၶဝ်ႈၼႂ်းဝဵင်းမၢင်ၸိူဝ်းၵေႃႈ ၶၢႆႉပၢႆႈယူႇၸွမ်းတၢင်ႇဝၢၼ်ႈ။ၵူၼ်းပၢႆႈၽေးၼႆႉ ဢမ်ႇယွမ်းႁဵင်ၶႃႈ ” – ဝႃႈၼႆ။
ဝၼ်းတီႈ 27/10/2023 ယၢမ်းၵၢင်ၶမ်ႈၼၼ်ႉၵေႃႈ သိုၵ်းမၢၼ်ႈ ယိုတ်းမိူင်း တပ်ႉၶလယ 68 ယိုဝ်းၵွင်ႈလူင် သႅၼ်း (120 mm) ယိုဝ်းသႂ်ႇ ၼႂ်းဝၢၼ်ႈၵွင်းၵၢင် ဢိူင်ႇမိူင်းတဵမ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇႁိူၼ်းလုင်းတီး – ပႃႈလူႇ ထုၵ်ႇၾႆးမႆႈလူႉၵွႆ တင်းလင် ၼႆယဝ်ႉ။
တႄႇဢဝ်ဝၼ်းတီႈ 27/10/2023 ၼၼ်ႉမႃး ၸုမ်းဢူၺ်းလီ ပွတ်းႁွင်ႇ 3 ၸုမ်း ႁူမ်ႈၵၼ် လူမ်ႇယိုဝ်း တပ်ႉ သိုၵ်းမၢၼ်ႈ ၼႂ်းမိူင်းတႆး ပွတ်းႁွင်ႇမႃး လၢႆၸႄႈဝဵင်း မိူၼ်ၼင်ႇ – လႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ ၼမ်ႉၶမ်း၊ မူႇၸေႊ၊ ၵုၼ်လူင်၊ ႁူဝ်ပၢင်ႇ၊ လၢဝ်ႇၵၢႆးလႄႈ ဝဵင်းၼမ်ႉၽႃႈ(ၶျိၼ်းသူၺ်ႇႁေႃႇ) ၸိူဝ်းၼႆႉ ႁၢၼ်ႉတေႃႇထိုင် ယၢမ်းလဵဝ် သဵင်ၵွင်ႈပႆႇယဵၼ်။ ယဝ်ႉ ၵေႃႈ ၾၢႆႇသိုၵ်းမၢၼ်ႈ သင်ႇပိၵ်ႉဢိုတ်းပႅတ်ႈ လႅင်းၾူၼ်းထႅင်ႈ ၊ မၢင်တီႈၵေႃႈ ပိၵ်ႉသဵၼ်ႈတႃႈသၢႆႈတၢင်းပႅတ်ႈၵေႃႈမီး ၼႆယဝ်ႉ။
