မၢၵ်ႇလူင်သိုၵ်းမၢၼ်ႈ တူၵ်းသႂ်ႇႁိူၼ်းယေး ၵူၼ်းဝၢၼ်ႈ လူႉၵွႆ 4 လင် တီႈဢိူင်ႇမိူင်းတဵမ် ၸႄႈဝဵင်းလႃႈသဵဝ်ႈ လွင်ႈတုမ်ႉတိူဝ်ႉ ၵူၼ်းမိူင်း မၢတ်ႇၸဵပ်းလူႉတၢႆ ဢမ်ႇမီး။

ဝၼ်းတီႈ 27/10/2023 ယၢမ်းၵၢင်ၶမ်ႈမွၵ်ႈ 7 မူင်း သိုၵ်းမၢၼ်ႈ ယိုတ်းမိူင်း တပ်ႉၶလယ 68 ယိုဝ်းၵွင်ႈလူင် သႅၼ်း (120 mm) ယိုဝ်းသႂ်ႇ ၼႂ်းဝၢၼ်ႈၵွင်းၵၢင် ဢိူင်ႇမိူင်းတဵမ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇႁိူၼ်းလုင်းတီး – ပႃႈလူႇ ထုၵ်ႇၾႆးမႆႈလူႉၵွႆ တင်းလင် ၼႆယဝ်ႉ။

ၵူၼ်းပိုၼ်ႉတီႈ ၼႂ်းဢိူင်ႇမိူင်းတဵမ် လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈ တပ်ႉ 68 ယိုဝ်းမႃး တူၵ်းသႂ်ႇၶႃႈ ဢေႃႈ တိူဝ်ႉသႂ်ႇႁိူၼ်းယေး ၾႆးမႆႈလူႉၵွႆတင်းလင်ၵူၺ်းဢမ်ႇၵႃး မႆႈပႃးရူတ်ႉၶိူင်ႈထႅင်ႈလမ်းၼိုင်ႈလႄႈ ဝူဝ်းတၢႆတူဝ်ၼိုင်ႈၶႃႈ။ မိူဝ်ႈၽွင်း မၢၵ်ႇမႃးတူၵ်းတႅၵ်ႇၼၼ်ႉ ၵူၼ်းႁိူၼ်း ဢမ်ႇမီး ဢွၼ်ၵၼ်ပၢႆႈၽေးၵႂႃႇသွၼ်ႈဝႆႉတီႈဝတ်ႉမိူင်းတဵမ် ၶႃႈဢေႃႈ။ ၵွပ်ႈၼႆလႄႈ ၵူၼ်းႁိူၼ်း ဢမ်ႇတၼ်းပဵၼ်သင်။ ၵႃႈၶၼ်လူႉသုမ်း ဢမ်ႇယွမ်း 200 သႅၼ်ပျႃး”- ဝႃႈၼႆ။

လိူဝ်ၼၼ်ႉ ယၢမ်းၵၢင်ၶိုၼ်းလိုၵ်း မၢၵ်ႇလူင် တူၵ်းသႂ်ႇထႅင်ႈ ႁိူၼ်းယေး လုင်းယၢဝ်း – ပႃႈမူၼ်း ၼႂ်းဝၢၼ်ႈၵွင်းၵၢင်ၼႆႉထႅင်ႈၼၼ်ႉၵေႃႈ တႅၵ်ႇတိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလူႉၵွႆၸွမ်းထႅင်ႈ တင်းလင် လူႉသုမ်း 20 သႅၼ်ပၢႆ။ လိူဝ်ၼၼ်ႉ မၢၵ်ႇလူင် တူၵ်းသႂ်ႇထႅင်ႈ ႁိူၼ်းလုင်းထုၼ်းဢွင်ႇ – ပႃႈယဵၼ်ႇ တင်း ႁိူၼ်းၼၢင်းၶမ်းလီ ၸိူဝ်းၼႆႉထႅင်ႈ။

“ယၢမ်းလဵဝ် ၵူၼ်းဝၢၼ်ႈၼႆႉ ဢွၼ်ၵၼ်ပၢႆႈဢွၵ်ႇဝၢၼ်ႈမူတ်းယဝ်ႉၶႃႈ မၢင်ၸိူဝ်းပၢႆႈၵႂႃႇယူႇတီႈဝတ်ႉ မၢင်ၸိူဝ်း ပၢႆႈၵႂႃႇယူႇၸွမ်း ၾင်ႇၼမ်ႉယၢဝ် မၢင်ၸိူဝ်းပၢႆႈၵႂႃႇယူႇၸွမ်းထဵင်ႁႆႈၼႃး ၸိူဝ်းၼၼ်ႉ။ တေႃႈလဵဝ် တိုၵ်ႉပၢႆႈယူႇဢေႃႈ ၵူၼ်းဝၢၼ်ႈႁဝ်းၶႃႈ ၼႂ်းဢိူင်ႇ မိူင်းတဵမ်ၼႆႉ။ သဵင်ၵွင်ႈၵေႃႈပႆႇယဵၼ် ဢၼ်ၶဝ်ယိုဝ်းၵၼ်ၼႆႉ ပဵၼ်သိုၵ်းမၢၼ်ႈတင်း ၸုမ်း ဢူၺ်း လီပွတ်းႁွင်ႇ ၶဝ် 3 ၸုမ်း ၼၼ်ႉၶႃႈယဝ်ႉ”- ၵူၼ်းပိုၼ်ႉတီႈ ဢိူင်ႇမိူင်းတဵမ် သိုပ်ႇလၢတ်ႈၼႄၼင်ႇၼႆ။

မိူဝ်ႈၼႆႉ ယၢမ်းၵၢင်ၼႂ် မၢၵ်ႇလူင် သိုၵ်းမၢၼ်ႈ တႅၵ်ႇတိူဝ်ႉသႂ်ႇ ႁိူၼ်းလုင်းလူၼ်း၊ လုင်းဢွင်ႇၺုၼ်ႉ တီႈဝၢၼ်ႈမၢၵ်ႇၶီႇၼူထႅင်ႈ ၽႃႁိူၼ်း၊ သိုင်ႇၾႆး ၸိူဝ်းၼႆႉ လူႉၵွႆၼမ်။

မိူဝ်ႈဝႃး ဝၼ်းတီႈ 27 ယၢမ်းဝၢႆးဝၼ်းမွၵ်ႈ 4 မူင်းၶိုင်ႈ သိုၵ်းတဢၢင်းတင်း သိုၵ်းၵူဝ်းၵၢင်ႉ ႁူမ်ႈၵၼ် လေႃႇတိုၵ်း တပ်ႉသိုၵ်း မၢၼ်ႈ ဢၼ်ပၵ်းဝႆႉတီႈၾၢႆႇၼိူဝ်ၵွင်းမူး ဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ သွင်ၾၢႆႇယိုဝ်းၵၼ်ႁိုင်မွၵ်ႈ 10 မိၼိတ်ႉၼႆႉ မၢၵ်ႇလူင် လုၵ်ႈၼိုင်ႈ တူၵ်းၵႂႃႇတၢင်းဝၼ်းတဵင်ႈ ၾင်ႇမိူင်းၶႄႇ ၼႆယဝ်ႉ။

ၽူႈတူင်ႉၼိုင် ၵၢၼ်သိုၵ်း တၢင်းပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ယိုဝ်းၵၼ်ထႅင်ႈ ၼႂ်းၸႄႈဝဵင်းသႅၼ်ဝီ၊ လႃႈ သဵဝ်ႈ ၸိူဝ်းၼႆႉ။ သိုၵ်းမၢၼ်ႈၼႆႉ လုၵ်ႉတၢင်းပွတ်းဢွၵ်ႇၶူင်း – ပွတ်းၸၢၼ်း ၸိူဝ်းၼႆႉ မႃးထႅမ်ထႅင်ႈ။ ဢၼ်လႆႈႁူႉဝႆႉထႅင်ႈ သိုၵ်း မၢၼ်ႈ ႁၢင်ႈႁႅၼ်းၶိူင်ႈမိၼ်ဝႆႉ ဢၼ်တေလုၵ်ႉတၢင်းၼမ်ႉၸၢင်၊ ၶူဝ်လမ်၊ ၼေႇပျီႇတေႃႇလႄႈ လႃႈသဵဝ်ႈ ၸိူဝ်းၼႆႉဝႆႉ။ ပၢင်တိုၵ်း ၼႆႉ တေၸၢင်ႈပဵၼ်ႁႅင်း လိူဝ်ၼႆႉထႅင်ႈၶႃႈဢေႃႈ”- ဝႃႈၼႆ။

တႄႇဢဝ်ဝၼ်းတီႈ 27/10/2023 ယၢမ်းၵၢင်ၼႂ် မွၵ်ႈ 4 မူင်း ၸုမ်းဢူၺ်းလီ ပွတ်းႁွင်ႇ 3 ၸုမ်း ႁူမ်ႈၵၼ် လူမ်ႇယိုဝ်း တပ်ႉ သိုၵ်းမၢၼ်ႈ ၼႂ်းမိူင်းတႆး ပွတ်းႁွင်ႇမႃး လၢႆၸႄႈဝဵင်း မိူၼ်ၼင်ႇ – လႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ ၼမ်ႉၶမ်း၊ မူႇၸေႊ၊ ၵုၼ်လူင်၊ ႁူဝ်ပၢင်ႇ၊ လၢဝ်ႇၵၢႆးလႄႈ ဝဵင်းၼမ်ႉၽႃႈ(ၶျိၼ်းသူၺ်ႇႁေႃႇ) ၸိူဝ်းၼႆႉ ႁၢၼ်ႉတေႃႇထိုင် ယၢမ်းလဵဝ် သဵင်ၵွင်ႈပႆႇယဵၼ်။ ယဝ်ႉၵေႃႈ ၾၢႆႇသိုၵ်းမၢၼ်ႈ သင်ႇပိၵ်ႉဢိုတ်းပႅတ်ႈ လႅင်းၾူၼ်းထႅင်ႈ ၼႆယဝ်ႉ။

ယၢမ်းလဵဝ် တီႈဝဵင်းလႃႈသဵဝ်ႈၼႆႉ ၵူၼ်းမိူင်းဢွၼ်ၵၼ်ပၢႆႈၽေးသိုၵ်း တႄႇဢဝ် မိူဝ်ႈဝႃး ဝၼ်းတီႈ 27 မႃးၼႆႉ ဢမ်ႇယွမ်း 1,000 ယဝ်ႉ ဝႃႈၼႆ။