မိူဝ်ႈၼႆႉ ဝၼ်းတီႈ 27/10/2023 ယၢမ်းၵၢင်ၼႂ် ၸုမ်းယိပ်းၵွင်ႈၵၢင်ႇ ၸုမ်းဢူၺ်းလီပွတ်းႁွင်ႇ လႄႈသိုၵ်းမၢၼ်ႈပိုတ်းယိုဝ်းၵၼ်ၼႂ်းလၢႆလၢႆၸႄႈဝဵင်း ၸိုင်ႈတႆးပွတ်းႁွင်ႇ ၊ ယၢမ်းၵၢင်ၼႂ် 5:20 မူင်း မၢၵ်ႇလူင် တူၵ်းသႂ်ႇႁိူၼ်းယေးၵူၼ်းဝၢၼ်ႈ လင်ၼိုင်ႈ တီႈပွၵ်ႉတႃႇ ယႃႇၵူင်း ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ လုၵ်ႈဢွၼ်ႇ 3 ပီႈၼွင်ႉ တၢႆထင် တီႈၵိုၵ်းႁိူၼ်း 2 ၵေႃႉလႄႈ မၢတ်ႇၸဵပ်းႁၢဝ်ႈႁႅင်း 1 ၵေႃႉ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းလွႆယိုဝ်းသႂ်ႇတပ်ႉသိုၵ်းမၢၼ်ႈ သၶၢၼ်းတိတ်ႉၵူင်း ။ မၢၵ်ႇၶဝ်ၼၼ်ႉသမ်ႉ ပူၼ်ႉတပ်ႉမၢၼ်ႈမႃး တူၵ်းၸေႃႈ(တူၵ်းသႂ်ႇ) တီႈဝၢၼ်ႈ တႃႇယႃႇၵူင်း။ မၢၵ်ႇတူၵ်းသႂ်ႇႁွင်ႈၼွၼ်းလုၵ်ႈဢွၼ်ႇ 3 ပီႈၼွင်ႉ ၽွင်းတိုၵ်ႉၼွၼ်းလပ်းယူႇၸွမ်းၼၢႆးၶဝ် ။ တၢႆထင်တီႈ 2 ၵေႃႉ မၢတ်ႇၸဵပ်းႁႅင်း ၵေႃႉၼိုင်ႈ ပဵၼ်တီႈၶႅၼ်၊ လႆႈငိၼ်းဝႃႈတေလႆႈတႅပ်းပႅတ်ႈ။ လုၵ်ႈဢွၼ်ႇလူႉတၢႆထင်တီႈ ၼႂ်းႁိူၼ်းၼၼ်ႉ 2 ပီႈၼွင်ႉ ယဝ်ႉၵေႃႈ ထႅင်ႈၵေႃႉၼိုင်ႈ လႆႈတိူဝ်ႉမၢတ်ႇၸဵပ်းႁႅင်းသေ တေလႆႈတႅပ်ႈပႅတ်ႈမိုဝ်းၶွၼ်ၼိုင်ႈ။ ၵေႃႉပဵၼ်ၼၢႆးၶဝ်တႄႉ သိူဝ်ႈၶူဝ်းယွၵ်းၵႂႃႇၵွႆး ဢမ်ႇမၢတ်ႇၸဵပ်းလူႉတၢႆ”- ဝႃႈၼႆ။
လုၵ်ႈဢွၼ်ႇ 3 ပီႈၼွင်ႉၼႆႉ ဢၼ်တၢႆၵႂႃႇပဵၼ် ၼၢင်းမဵဝ်းမဵဝ်းဢေး ဢႃယု 12 ၶူပ်ႇလႄႈ ၸၢႆးမဵဝ်းလိၼ်းၵျေႃႇ ဢႃယု 8 ၶူပ်ႇ ။ ဢၼ်ပဵၼ်ၼွင်ႉလဵၵ်ႉၶဝ် ၸၢႆးမဵဝ်းမိၼ်းၶၢၼ်ႉ ဢႃယု 5 ၶူပ်ႇတႄႉ ၸၢၵ်ႇမၢၵ်ႇတိူဝ်ႉၶႅၼ်မၢတ်ႇၸဵပ်းႁၢဝ်ႈႁႅင်းသေ တေလႆႈတႅပ်ႈပႅတ်ႈ -ဝႃႈၼႆ။
“တင်း 3 ၵေႃႉပီႈၼွင်ႉတႄႉ လႆႈဢဝ်မႃးဝႆႉတီႈႁူင်းယႃၼမ်ႉၶမ်းယဝ်ႉ။ ဝၢႆးဝၼ်းမိူဝ်ႈၼႆႉ တေပူၼ်ႉၶၢပ်ႈတူဝ် သွင်ပီႈၼွင်ႉ ။ ၼွင်ႉလိုၼ်း ဢၼ်တိူဝ်ႉမၢတ်ႇၸဵပ်းႁႅင်းၼၼ်ႉ ဢၢင်ႈဢဝ်သူင်ႇႁူင်းယႃ ဝဵင်းလိူဝ်ႇ ၊ ၶဝ်သမ်ႉဢမ်ႇပၼ်ၵႂႃႇမႃး ပိၵ်ႉသဵၼ်ႈတၢင်း ဝႆႉလႄႈ ၵႃႈတေလႆႈဢဝ်သူင်ႇ ႁူင်းယႃလူင်မိူင်းမၢဝ်းၵူၺ်းယဝ်ႉၶႃႈ ”- ၵူၼ်း ပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈၼႄ ၼင်ႇၼႆ။
ႁိူၼ်းယေး ၵူၼ်းဝၢၼ်ႈ ဢၼ်ထုၵ်ႇမၢၵ်ႇလူင် တူၵ်းသႂ်ႇၶဝ် 3 ၵေႃႉပီႈၼွင်ႉၼႆႉ ပိုတ်ႇႁၢၼ်ႉၶၢႆၶူဝ်း ၵုၼ်ႇယွႆႈဝႆႉၶၢင်ႈတၢင်း- ၼိူဝ်သဵၼ်ႈတၢင်း ၼမ်ႉၶမ်း – ၼမ်ႉၽၵ်းၵႃ ၼႂ်းပွၵ်ႉတႃႇယႃႇၵူင်း၊ မီးႁိမ်းၸမ်တပ်ႉသိုၵ်းမၢၼ်ႈ သၶၢၼ်းတိတ်ႉၵူင်း။ ပေႃႈမႄႈ လုၵ်ႈ ဢွၼ်ႇသမ်ႉ ၸိုဝ်ႈႁွင်ႉ ၵူဝ်ႇမဵဝ်းလႄႈ လူၺ်းထူၺ်းၶမ်း ။
မိူဝ်ႈၼႆႉ ဝၼ်းတီႈ 27 ယၢမ်းၵၢင်ၼႂ် 5 မူင်းပၢႆ မၢၵ်ႇလူင် သိုၵ်းမၢၼ်ႈ တပ်ႉၶလယ 123 တီႈၼမ်ႉၽၵ်းၵႃ လၢမ်းလိမ်းယိုဝ်းလူင် ၵႂႃႇ ၵူႈႁူးၵူႈတၢင်းသေ တူၵ်းသႂ်ႇ ႁိူၼ်းယေး ၵူၼ်းဝၢၼ်ႈ တီႈဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ တႅၵ်ႇတိူဝ်ႉသႂ်ႇ ၵူၼ်းမိူင်း လူႉ တၢႆ မၢတ်ႇၸဵပ်း တင်းမူတ်း 7 ၵေႃႉ။ ၼႂ်းၼၼ်ႉ လူႉတၢႆ 2 ၵေႃႉ ပဵၼ်ဢွၼ်ႇယိင်း ဢႃယု 7 ၶူပ်ႇလႄႈ ၼၢင်းယိင်း ဢႃယု 33 ပီ ၵေႃႉၼိုင်ႈ။ ဢၼ်မၢတ်ႇၸဵပ်း 5 ၵေႃႉၼၼ်ႉသမ်ႉ ဢွၼ်ႇယိင်း ဢႃယု 6 ၶူပ်ႇ ၵေႃႉၼိုင်ႈလႄႈ ဢွၼ်ႇယိင်း ဢႃယု 13 ပီ ၵေႃႉၼိုင်ႈ လိူဝ်ထႅင်ႈ 3 ၵေႃႉၼၼ်ႉတႄႉ ပဵၼ်ၵူၼ်းလူင် ယိင်း 2 ၵေႃႉ ၸၢႆး 1 ၵေႃႉ ဝႃႈၼႆ။
မိူဝ်ႈၼႆႉ ဝၼ်းတီႈ 27 ယၢမ်းၵၢင်ၼႂ်ၸဝ်ႉ 4 မူင်းပၢႆ ၸုမ်းဢူၺ်းလီပွတ်းႁွင်ႇ ဢၼ်ပဵၼ် သိုၵ်းၵူဝ်းၵၢင်ႉ MNDAA ၊ သိုၵ်းတ ဢၢင်း TNLA ၊ သိုၵ်းၶၢင် KIA လႄႈ ၸုမ်းၵႅတ်ႇၶႄၵူၼ်းမိူင်း PDF ၸိူဝ်းၼႆႉ ႁူမ်ႈၵၼ် လူမ်ႇယိုဝ်း တပ်ႉသိုၵ်းမၢၼ်ႈ ၼႂ်းမိူင်း တႆးပွတ်းႁွင်ႇမႃး လၢႆၸႄႈဝဵင်း မိူၼ်ၼင်ႇ – ၸႄႈဝဵင်းလႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ ၼမ်ႉၶမ်း၊ မူႇၸေႊ၊ ၵုၼ်လူင်၊ ႁူဝ်ပၢင်ႇ၊ လၢဝ်ႇၵၢႆးလႄႈ ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ၸိူဝ်းၼႆႉ မႃးႁၢဝ်ႈႁႅင်း ႁၢၼ်ႉတေႃႇထိုင် ယၢမ်းလဵဝ် သဵင်ၵွင်ႈ ပႆႇယဵၼ်။
