သိုၵ်းမၢၼ်ႈ ယိုတ်းမိူင်း ယိုဝ်းၵွင်ႈလူင် တူၵ်းၼႂ်းဝၢၼ်ႈ 3 လုၵ်ႈ တႅၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ ၵေႃႉၼိုင်ႈ ႁိူၼ်းယေး ၵူၼ်း ဝၢၼ်ႈလူႉၵွႆၸွမ်းထႅင်ႈ 2 လင်။
ဝၼ်းတီႈ 25/10/2023 ယၢမ်းၵၢင်ၶိုၼ်းလိုၵ်းမွၵ်ႈ 11 မူင်းၶိုင်ႈ သိုၵ်းမၢၼ်ႈ ၶလယ 68 ယိုဝ်းၵွင်ႈလူင် သႂ်ႇၼႂ်းဝၢၼ်ႈႁူဝ် ၼမ်ႉ ဢိူင်ႇႁူဝ်ၼမ်ႉ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ 3 လုၵ်ႈ မၢၵ်ႇလူင်တူၵ်းတႅၵ်ႇ သႂ်ႇၵူၼ်းဝၢၼ်ႈ ၸိုဝ်ႈႁွင်ႉ ပႃႈၸၢမ် ဢႃယု 50 ပၢႆ ၵေႃႉၼိုင်ႈ လူႉတၢႆထင်တီႈၵိုၵ်းႁိူၼ်း ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ႁိူၼ်းယေး ၵူၼ်းဝၢၼ်ႈလူႉၵွႆထႅင်ႈ 2 လင်။
ၵူၼ်းပိုၼ်ႉတီႈ ၼႂ်းဢိူင်ႇႁူဝ်ၼမ်ႉ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ တပ်ႉ 68 ယိုဝ်းမႃးၶႃႈဢေႃႈ တင်းမူတ်း ယိုဝ်းမၢၵ်ႇ လူင်မႃး 3 လုၵ်ႈ။ တႃႇလုၵ်ႈၼိုင်ႈ တူၵ်းသႂ်ႇႁိူၼ်းယေး ပႃႈၸၢမ် ဢႃယု 50 ပၢႆ လူႉတၢႆထင်တီႈၼႂ်းႁိူၼ်း။ ယဝ်ႉၵေႃႈ ႁိူၼ်း ယေး ၸိူဝ်းၼႆႉၵေႃႈ လူႉၵွႆၸွမ်းထႅင်ႈ။ လိူဝ်ၼၼ်ႉ မၢၵ်ႇလူင် တူၵ်းတႅၵ်ႇသႂ်ႇ ႁိူၼ်းလုင်းၶမ်း လူႉၵွႆထႅင်ႈလင်ၼိုင်ႈ။ ၶဝ်ဝႃႈမီး သိုၵ်းၵူဝ်းၵၢင်ႉၼႆသေ ယိုဝ်းမႃး မိူဝ်ႈၽွင်းၵၢင်ဝၼ်းတႄႉ သိုၵ်းၵူဝ်းၵၢင်ႉ ၶဝ်ႈမႃးၼႂ်းဝၢၼ်ႈၵမ်ႉၼိုင်ႈသေ ဢွၵ်ႇဝၢၼ်ႈၵႂႃႇယဝ်ႉ”- ဝႃႈၼႆ။
မိူဝ်ႈဝႃး ဝၼ်းတီႈ 25 ယၢမ်းၵၢင်ဝၼ်း သိုၵ်းၵူဝ်းၵၢင်ႉ MNDAA ဢဵၼ်ႁႅင်းမွၵ်ႈ 100 ၶဝ်ႈမႃးတီႈဝၢၼ်ႈပၢင်ႇၸူင်လႄႈ ဝၢၼ်ႈ ၵုင်းသႃႇ သိုၵ်းမၢၼ်ႈ ဢဝ်ၶိူင်ႈမိၼ် မႃးပၼ်ႇလဵပ်ႈ 2 ၵမ်း ယဝ်ႉၵေႃႈ ယူႇတီႈ တပ်ႉသိုၵ်းမၢၼ်ႈ ၶလယ 68 ၼၼ်ႉ ယိုဝ်းၵွင်ႈ လူင်သႂ်ႇထႅင်ႈ 3 လုၵ်ႈ။
“မိူဝ်ႈဝႃး သိုၵ်းၵူဝ်းၵၢင်ႉ ၶဝ်ႈမႃးမီးတီႈဝၢၼ်ႈပၢင်ႇၸူင်လႄႈဝၢၼ်ႈၵုင်းသႃႇ သိုၵ်းမၢၼ်ႈ ယိုဝ်းၵွင်ႈလူင်သႂ်ႇ တိူဝ်ႉၺႃးၵွင်းမူး 1 သူႇ။ မၢၵ်ႇၶဝ်ဢၼ်ပႆႇတႅၵ်ႇ တူၵ်းဝႆႉၸွမ်းၾင်ႇတၢင်း ၸိူဝ်းၼႆႉၵေႃႈမီးဢေႃႈ။ ၵွင်းမူး မူၺ်ႇတေႃႇတႄႉ တိူဝ်ႉ ၺႃးၸဵင်ႇမၼ်း ၽိတ်ႈၵႂႃႇဢိတ်းၼိုင်ႈ။ ဝၢႆးသဵင်ၵွင်ႈလူင် သိုၵ်းမၢၼ်ႈ ယဵၼ်လူင်းယဝ်ႉ ယူႇတီႈ သိုၵ်းမၢၼ်ႈ ၵပ်းၾူၼ်း ၸူးၵူၼ်းဝၢၼ်ႈသေ လၢတ်ႈဝႃႈ ယႃႇဢွၵ်ႇဝၢၼ်ႈၵၼ် ၵူၼ်းဝၢၼ်ႈတႄႉ ၵူဝ်ဢေႃႈ။ မိူဝ်ႈတႄႇမၼ်း ႁဝ်းၶႃႈ ႁၢင်ႈႁႅၼ်းတေၸတ်းပွႆးဢွၵ်ႇဝႃႇသႃ ၵူၺ်းၵႃႈ တူၺ်းငဝ်းလၢႆးၸိူင်ႉၼႆသေ ႁဝ်းၶႃႈ ၵူၼ်းဝၢၼ်ႈတႄႉ ဢမ်ႇၸတ်းယဝ်ႉ ၵူဝ်ပဵၼ်ပၢင်တိုၵ်းဢေႃႈ”- ဝႃႈၼႆ။
ဢိင်ၼိူဝ် လွင်ႈပၢင်တိုၵ်းၼႆႉသေ မိူဝ်ႈၼႆႉ ဝၼ်းတီႈ 26 ၵူၼ်းဝၢၼ်ႈပၢင်ႇၸူင်၊ ဝၢၼ်ႈၵုင်းသႃလႄႈ ဝၢၼ်ႈႁူဝ်ၼမ်ႉ ဢမ်ႇႁတ်းၵႂႃႇ ႁဵတ်းၵၢၼ် သူၼ်ႁႆႈၼႃးၵၼ် မႆႈၸႂ်ၵူဝ်ပဵၼ်ပၢင်တိုၵ်း ယွၼ်ႉငဝ်းလၢႆး ၵၢၼ်သိုၵ်း ၼႂ်းပိုၼ်ႉတီႈ ပႆႇမီးလွင်ႈ ၼိမ်ယဵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ