မိူဝ်ႈၼႆႉ ဝၼ်းတီႈ 25/10/2023 ယၢမ်းၵၢင်ဝၼ်းမွၵ်ႈ 11 မူင်းၶိုင်ႈ ၵႃးတင်း ရူတ်ႉၶိူင်ႈ ၽႃႇၵၼ် ၼႂ်းၵႄႈဝၢၼ်ႈမိၼ်းမထိ (မြင်းမထိရွာ) လႄႈ ၼၢၼ်းတၢႆး(နန်းတိုင်းရွာ) ၼႂ်းၸႄႈဝဵင်းၵၢတ်ႇလေႃႉ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ၵူၼ်းႁေႃႈရူတ်ႉၶိူင်ႈ လူႉတၢႆၵေႃႉၼိုင်ႈ။

ၽူႈၶဝ်ႈၸုမ်းၸွႆႈထႅမ် ၶႅၵ်ႇလီပၢင်ၸႃႉ ဝဵင်းၵၢတ်ႇလေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပိုၼ်ႉတီႈ ၵပ်းၾူၼ်းၸူးႁဝ်းၶႃႈ သေ လႆႈၵႂႃႇႁပ်ႉမႃး တီႈႁူင်းယႃ။ တေလႆႈဝႃႈ ၶဝ်ၽႃႇၵၼ်ႁႅင်းဢေႃႈ ႁဵတ်းႁိုဝ်လႄႈ ၽႃႇၵၼ်တႄႉ ဢမ်ႇႁူႉ။ တီႈၼၼ်ႈသမ်ႉ ပဵၼ်သဵၼ်ႈတၢင်းၵူတ်ႉဝႆႉ ယွၼ်ႉၶဝ်တေႁေႃႈဝႆးၼင်ႇၵၼ်သေ ၽႃႇၵၼ်ၵေႃႈ ပဵၼ်လႆႈ။ ၵူၼ်းႁေႃႈရူတ်ႉၶိူင်ႈတႄႉ လႆႈမၢတ်ႇ ၸဵပ်းႁႅင်းလႄႈ မိူဝ်ႈၽွင်း ၵႂႃႇႁပ်ႉဢဝ်တူဝ်သေ တေမႃးတီႈႁူင်းယႃၼၼ်ႉ လႆႈသဵင်ႈၵႂႃႇၸွမ်းတၢင်းဢေႃႈ။ ၵူၼ်းႁေႃႈၵႃးတႄႉ ယၢမ်းလဵဝ် ပၢႆႈလွတ်ႈဝႆႉ”- ဝႃႈၼႆ။

ယၢမ်းလဵဝ် ၶၢပ်ႈတူဝ်တၢႆ ၵူၼ်းႁေႃႈရူတ်ႉၶိူင်ႈၼၼ်ႉ ပဵၼ်ၽူႈၸၢႆး မီးဝႆႉတီႈႁူင်းယႃ ဝဵင်းၵၢတ်ႇလေႃႉ။ ၵူၺ်းၵႃႈ ၸိုဝ်ႈဝႃႈႁိုဝ် ပဵၼ်ၵူၼ်းတီႈလႂ် ၸိူဝ်းၼႆႉတႄႉ ပႆႇႁူႉ။

တႄႇဢဝ် ဝၼ်းတီႈ 1 ထိုင် 25 လိူၼ်ဢွၵ်ႊထိူဝ်ႊပိူဝ်ႊ ၼႂ်းၸႄႈဝဵင်းၵၢတ်ႇလေႃႉတင်း ဢွင်ႇပၢၼ်းၼႆႉ ပၼ်ႁႃလွင်ႈရူတ်ႉၽႃႇ ၵၼ်ၼႆႉ တင်းမူတ်းမီး 8 ပွၵ်ႈယဝ်ႉ ၵူၼ်းလူႉတၢႆၸွမ်း 1 ၵေႃႉ မၢတ်ႇၸဵပ်း 24 ၵေႃႉ ၸွမ်းၼင်ႇ လႆႈႁူႉၶေႃႈမုလ်း တီႈၸုမ်း ၸွႆႈထႅမ် ၶႅၵ်ႇလီပၢင်ၸႃႉ ၵဵပ်းဝႆႉၼင်ႇၼႆ။