ပလိၵ်ႈမၢၼ်ႈ မိပ်ႇဢီး ၵူၼ်းၸိူဝ်းလႅၵ်ႈငိုၼ်း ၸွမ်းလႅၼ်လိၼ်တႆး – ၶႄႇ ၼႂ်းၸိုင်ႈတႆးပွတ်းႁွင်ႇ ႁႂ်ႈႁဵတ်းသဵၼ်ႈမၢႆ တၢင်ႇ ပၼ်ၶဝ်ၵူႈဝၼ်း လွင်ႈဢူၼ်းငိုၼ်းၶဝ်ႈငိုၼ်းဢွၵ်ႇ ၸိူဝ်းၼႆႉ ယွၼ်ႉၵူဝ်ဢူၼ်းငိုၼ်းၸွႆႈထႅမ် ၸုမ်း PDF လႄႈ CDM ၸိူဝ်း ၼၼ်ႉ။

တႄႇဢဝ် လိူၼ်ဢွၵ်ႊထိူဝ်ႊပိူဝ်ႊ 2023 ၼႆႉမႃး ႁၢၼ်ႉလႅၵ်ႈငိုၼ်း ၼႂ်းဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ထုၵ်ႇပလိၵ်ႈမၢၼ်ႈ မိပ်ႇဢီး ၸဝ်ႈၶွင်ႁၢၼ်ႉ ႁႂ်ႈႁဵတ်းဝႂ်ၶွၼ်ႇ (အလုပ်ငန်းလိုင်စင်) ယဝ်ႉၵေႃႈ ႁဵတ်းသဵၼ်ႈမၢႆလွင်ႈငိုၼ်းၶဝ်ႈ ဢွၵ်ႇ တၢင်ႇၸူးၶဝ်ထႅင်ႈ ၵူႈဝၼ်း ၵဵဝ်ႇၵပ်းလွင်ႈၼႆႉ ႁၢၼ်ႉလႅၵ်ႈငိုၼ်း မၢင်ၸိူဝ်းလႆႈထုၵ်ႇပိၵ်ႉဢိုတ်းၵႂႃႇ မွၵ်ႈ 10 ႁၢၼ်ႉယဝ်ႉ ဝႃႈၼႆ။

ၵူၼ်းပိုၼ်ႉတီႈ တီႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းတၢင်း 2-3 ဝူင်ႈမႃးၼႆႉ ၶဝ်မိပ်ႇၵူၼ်းလႅၵ်ႈငိုၼ်း ဢမ်ႇဝႃႈ ႁၢၼ်ႉယႂ်ႇႁၢၼ်ႉလဵၵ်ႉ ႁႂ်ႈလႆႈႁဵတ်းဝႂ်ၶွၼ်ႇ (အလုပ်ငန်းလိုင်စင်) ၵၼ်ၵူႈႁၢၼ်ႉ ယဝ်ႉၵေႃႈ တေလႆႈတၢင်ႇသဵၼ်ႈမၢႆ လွင်ႈငိုၼ်းၶဝ်ႈ ငိုၼ်းဢွၵ်ႇ ပၼ်တီႈၶဝ်ပႃးထႅင်ႈ ၵူႈဝၼ်း။ ၶဝ်ၵူဝ် ပိူၼ်ႈဢူၼ်းငိုၼ်းမႃးၸွႆႈ ၸုမ်း PDF, CDM ၸိူဝ်းၼၼ်ႉၶႃႈယူဝ်ႉ ထၢင်ႇ တႄႉ”- ဝႃႈၼႆ။

ဢိင်ၼိူဝ် လွင်ႈၼႆႉ ၵူၼ်းလႅၵ်ႈငိုၼ်း တီႈဝဵင်းၼမ်ႉၶမ်း ထုၵ်ႇပလိၵ်ႈမၢၼ်ႈ တီႉၺွပ်းၵုမ်းတူဝ်ၵႂႃႇ မီးမႃးၵေႃႉသွင်ၵေႃႉယဝ်ႉ ဝႃႈ ၼႆ။

“ၼႂ်းလိူၼ်ၼႆႉ ပလိၵ်ႈမၢၼ်ႈၶဝ် တီႉၺွပ်းဢဝ်ၵႂႃႇ ၵူၼ်းလႅၵ်ႈငိုၼ်း 2 ၵေႃႉယဝ်ႉ။ ၵူၺ်းၵႃႈ တင်းသွင်ၵေႃႉၼၼ်ႉ ၶဝ်ပွႆႇတူဝ်မႃး ၶိုၼ်းယဝ်ႉၼင်ႇၵဝ်ႇ။ တႃႇၵေႃႉၼိုင်ႈတႄႉ ပဵၼ်ၵူၼ်းပွၵ်ႉတႂ်ႈ။ ယဝ်ႉၵေႃႈ ၵူၼ်းလႅၵ်ႈငိုၼ်း ဢၼ်လႆႈပၢႆႈဝႆႉ ယွၼ်ႉဢူၼ်းငိုၼ်းၼႆႉ တေမီးဝႆႉလႂ်ၵေႃႉဢေႃႈ။ ယၢမ်းလဵဝ် တီႈဝဵင်းၼမ်ႉၶမ်းၼႆႉ ႁၢၼ်ႉလႅၵ်ႈငိုၼ်း ဢၼ်လႆႈပိၵ်ႉဢိုတ်းဝႆႉ 7-8 ႁၢၼ်ႉယဝ်ႉ ထိုင်ယၢမ်း လဵဝ် ပႆႇမီးၽႂ်ႁတ်းပိုတ်ႇ”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

ၼႂ်းဝဵင်းၼမ်ႉၶမ်းၼႆႉ မီးဝႆႉ ႁၢၼ်ႉလႅၵ်ႈငိုၼ်း ႁၢၼ်ႉယႂ်ႇႁၢၼ်ႉလဵၵ်ႉ ၼႂ်းဝဵင်း တင်းမူတ်း မွၵ်ႈ 20 ႁၢၼ်ႉ။ ၼႂ်းၼၼ်ႉ ဢၼ်လႆႈပိၵ်ႉ ဢိုတ်းၵႂႃႇ မီးမွၵ်ႈ 10 ႁၢၼ်ႉၼႆႉ ဝႃႈၼႆ။

ၵူၼ်းၼုမ်ႇ ဢၼ်ၵႂႃႇႁဵတ်းၵၢၼ်ဝႆႉ တီႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “တေႃႇၼင်ႇ ပီႈၼၢင်းၶႃႈ ယူႇတီႈၼမ်ႉၶမ်းသေ တေဢူၼ်းငိုၼ်းမႃး 15 သႅၼ်ပျႃး တၢင်း K-pay ယူႇတီႈ ၵူၼ်းလႅၵ်ႈငိုၼ်းၶဝ် ဢမ်ႇႁပ်ႉဢူၼ်းလႃးလႃးၶႃႈ ၼႂ်းဝူင်ႈ ပူၼ်ႉမႃးၼႆႉၵူၺ်း ဢၼ်ႁဝ်းၶႃႈၺႃးၼႆႉ။ ၵူၼ်းလႅၵ်ႈငိုၼ်းၶဝ် မႆႈၸႂ် ဢမ်ႇႁူႉဝႃႈ ၽႂ်ပဵၼ်ၽႂ် ပဵၼ်ၸုမ်းသင် ၸိူဝ်းၼၼ်ႉသေ ဢမ်ႇႁတ်းဢူၼ်းႁိုဝ် ဢမ်ႇႁူႉ။ သင်ဝႃႈ ႁဝ်းၶႃႈ တေဢူၼ်းငိုၼ်း ဢမ်ႇၼၼ် တေၵႂႃႇထုတ်ႈငိုၼ်း တီႈ ၵူၼ်းလႅၵ်ႈငိုၼ်းၶဝ် ၼၼ်ႉၸိုင် လႆႈငိၼ်းဝႃႈ တေလႆႈဢဝ်မၢႆၾၢင်ပႃးၵႂႃႇၸွမ်း တေလႆႈလၢတ်ႈပႃး တီႈၵူၼ်းလႅၵ်ႈငိုၼ်း ၼၼ်ႉဝႃႈ ႁဝ်းပဵၼ်ၽႂ် ယူႇ တီႈလႂ် ပွၵ်ႉလႂ် ၸိူဝ်းၼႆႉထႅင်ႈၵွၼ်ႇ”- ဝႃႈၼႆ။

လိူဝ်ၼၼ်ႉ မိူၼ်ၼင်ႇ တၢင်းၸႄႈဝဵင်းမူႇၸေႊၵေႃႈ မိူၼ်ၵၼ် ယူႇတီႈ ပလိၵ်ႈမၢၼ်ႈၶဝ် ဢႅဝ်ႇသွၵ်ႈႁႃ တီႉၺွပ်း ၵူၼ်းလႅၵ်ႈ ငိုၼ်း ၸိူဝ်းၼၼ်ႉမႃး ၶိူဝ်းယႂ်း။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပူၼ်ႉမႃးမွၵ်ႈ 2 ဝူင်ႈၼႆႉ ပလိၵ်ႈမၢၼ်ႈၶဝ် မႃးႁႃတီႉၺွပ်း ၵူၼ်းလႅၵ်ႈငိုၼ်း တီႈၼႂ်းပွၵ်ႉႁဝ်းၼႆႉ 2 ႁိူၼ်း ၶဝ်မႃး ယၢမ်းၵၢင်ၶိုၼ်းလိုၵ်း မွၵ်ႈ 11 မူင်းၼႆႉ။ တီႈၼႂ်းမိုဝ်းၶဝ်ၼၼ်ႉ မီးဝႆႉၸေႈ ဢၼ်ၼိုင်ႈ ပဵၼ်သဵၼ်ႈမၢႆ ၶေႃႈမုလ်း ဢၼ်ၶဝ်တေမႃးၺွပ်းၼၼ်ႉဢေႃႈ။ ၵူၺ်းၵႃႈ ၵူၼ်းလႅၵ်ႈငိုၼ်းၶဝ် ႁူႉတူဝ်ၶိုတ်းသေ ပၢႆႈဝႆႉၶႃႈဢေႃႈ ယၢမ်းလဵဝ်ၼႆႉ”- ဝႃႈၼႆ။

Application ဢၼ်ႁပ်ႉဢူၼ်းငိုၼ်းပၼ်ၵၼ်လႆႈ တၢင်းဢွၼ်ႊလၢႆႊ ၼႂ်းမိူင်းႁူမ်ႈတုမ်ၼႆႉသမ်ႉ မိူၼ်ၼင်ႇ – K-pay ၊ Wave money လႄႈ Wave pay ၸိူဝ်းၼႆႉ။ ဢၼ်ၵူၼ်းမိူင်း ၸႂ်ႉၼမ်တီႈသုတ်းတႄႉ ပဵၼ် K-pay ။ K – pay ၼႆႉသမ်ႉ ၼိုင်ႈဝၼ်း လႂ် ဢူၼ်းလႆႈၼမ်သုတ်း 50 သႅၼ်ပျႃး ၼႆယဝ်ႉ။