ၵႃးႁပ်ႉၸၢင်ႈ တၢင်ႇၵူၼ်းလမ်းၼိုင်ႈ ၺႃးယိုဝ်း တီႈႁိမ်းမိူင်းၼၢင်း ဝဵင်းၵေးသီး လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆ ဢမ်ႇမီး။

ပူၼ်ႉမႃး ဝၼ်းတီႈ 21/10/2023 ယၢမ်းဝၢႆးဝၼ်း 4 မူင်း ၵႃးဢူးဢွင်ႇၵျေႃႇသၢၼ်း (ၸၢဝ်းမၢၼ်ႈ) ထုၵ်ႇၵူၼ်းဢမ်ႇႁူႉ ၾၢႆႇယိုဝ်းသႂ်ႇ တီႈဝၢၼ်ႈၵုင်းပၢင်တိုင် သဵၼ်ႈတၢင်းၵႂႃႇဝၢၼ်ႈဢိတ်း ဢၼ်မီးတၢင်းၾၢႆႇႁွင်ႇမိူင်းၼၢင်းလႄႈ ၾၢႆႇၸၢၼ်းဝၢၼ်ႈၽိူင်း ၼႂ်းၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၵႃးၼၼ်ႉ ထုၵ်ႇယိုဝ်း တင်းမူတ်း 9 လုၵ်ႈ ၼႆယဝ်ႉ။

ၵူၼ်းမိူင်း ဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “လႅင်းၵႃးၼႆႉ လုၵ်ႉႁူဝ်ပူင်းမႃး တေၵႂႃႇၵေးသီး ၼႂ်းၵႃးၼၼ်ႉ ၶီႇမႃး ၸွမ်းၵၼ် တင်းမူတ်း 4 ၵေႃႉ ၸၢႆး 2 ၵေႃႉလႄႈ ယိင်း 2 ၵေႃႉ။ ၵူၼ်းႁၢႆႉၼၼ်ႉ ယိုဝ်းသႂ်ႇၵႃးၶဝ် 2 ၵမ်း။ ၵမ်းထီႉ 1 ၶဝ်ယိုဝ်း သႂ်ႇ 3 လုၵ်ႈ။ ၵမ်းထီႉ 2 ယိုဝ်းသႂ်ႇ 6 လုၵ်ႈ။ မၢၵ်ႇၵွင်ႈတိူဝ်ႉသႂ်ႇ တီႈမၢၵ်ႇၵႃးၾၢႆႇသၢႆႉလႄႈ ႁူဝ်ၵႃး တၢင်းၼႂ်း။ ထိုင်တီႈၵႃးလႆႈ လူႉၵွႆသေ ဢမ်ႇၵႂႃႇလႆႈ ၸင်ႇလႆႈႁွင်ႉၵူၼ်းမႄးၵႃးၶဝ် မႃးၸၼ်ဢဝ်ၵႂႃႇတီႈမိူင်းၼၢင်းၶႃႈဢေႃႈ”- ဝႃႈ ၼႆ။

ၵဵဝ်ႇၵပ်းလွင်ႈၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ်ႁဵတ်းတႄႉ ဢမ်ႇႁူႉ တွၼ်ႈတႃႇ ၵူၼ်းမႃးၸွမ်းၼႂ်းၵႃး တင်းမူတ်းၼၼ်ႉ လွတ်ႈၽေးၵၼ်ၵူႈၵေႃႉယူႇ ဝႃႈၼႆ။

“ပေႃးတူၺ်းမၢၵ်ႇၵွင်ႈတႄႉ တေပဵၼ်ၵွင်ႈၶူင်သၢင်ႈႁဵတ်းဢဝ်ၵူၺ်း ၵူၼ်းႁၢႆႉၼၼ်ႉ ယိုဝ်းသႂ်ႇ ႁေႃႈရူတ်ႉၶိူင်ႈၶဝ် ပၢႆၵႂႃႇတၢင်းမိူင်း ၼၢင်းၶႃႈဢေႃႈ။ ၶူဝ်းၶွင် ဢၼ်မီးၵႃႈၶၼ်ယႂ်ႇ ထူင်ငိုၼ်း ၸိူဝ်းၼႆႉတႄႉ ဢမ်ႇတၼ်းလႆႈၵႂႃႇ ၵူၼ်းၼႂ်းၵႃးတႄႉ လွတ်ႈၽေး ၵၼ်ၵူႈၵေႃႉၶႃႈဢေႃႈ”- ၵူၼ်းပိုၼ်ႉတီႈ ဝဵင်းၵေးသီး သိုပ်ႇလၢတ်ႈၼႄၼင်ႇၼႆ။

ဢွင်ႈတီႈ ပိူင်ၼႆႉသမ်ႉ ပဵၼ်တီႈၼႂ်းၵႄႈ မိူင်းၼွင် – ၵေးသီး တၢင်းသၢႆၼၼ်ႉသမ်ႉ မီးဝႆႉ သိုၵ်းမၢၼ်ႈ ယိုတ်းမိူင်းလႄႈ ၸုမ်းဢူၺ်းလီပွတ်းႁွင်ႇ တူင်ႉၼိုင်ယူႇဝႆႉ ဝႃႈၼႆ။